पणदरेत ३० वर्षीय विवाहितेचा घरात खून; अज्ञात मारेकऱ्याविरोधात गुन्हा
माळेगाव : बारामती तालुक्यातील पणदरे येथे घरातील खोलीत ३० वर्षीय विवाहितेचा डोक्यात व चेहऱ्यावर हत्याराने वार करून तसेच टॉवेलने गळा आवळून खून केल्याची धक्कादायक घटना शनिवारी (दि.१२) रात्री उघडकीस आली. या घटनेने पणदरे परिसरात खळबळ उडाली असून, माळेगाव पोलिसांनी अज्ञात मारेकऱ्याविरुद्ध खुनाचा गुन्हा दाखल केला आहे.
वैशाली तानाजी पवार (वय ३०, रा. पणदरे, ता. बारामती) असे खून झालेल्या महिलेचे नाव आहे. याप्रकरणी तिच्या सासू रंजना लक्ष्मण पवार (वय ५०, रा. खडकआळी, पणदरे) यांनी माळेगाव पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, शनिवारी दुपारी अडीच ते रात्री ७.४५ वाजण्याच्या दरम्यान पणदरे गावच्या हद्दीत तानाजी लक्ष्मण पवार यांच्या राहत्या घरातील खोलीत वैशाली पवार यांच्यावर अज्ञात व्यक्तीने हल्ला केला. अज्ञात कारणातून त्यांच्या डोक्यात व चेहऱ्यावर कसल्यातरी हत्याराने मारहाण करण्यात आली. त्यानंतर टॉवेलने गळा आवळून त्यांचा खून करण्यात आल्याचे फिर्यादीत नमूद करण्यात आले आहे. सदर महिलेचा पती कामासाठी वडगाव निंबाळकर या ठिकाणी गेला होता, रात्री तो घरी आल्यानंतर, पत्नी रक्ताच्या थारोळ्यात पडल्याचे दिसून आले.
दरम्यान, या घटनेची माहिती मिळताच माळेगाव पोलिसांनी घटनास्थळी धाव घेतली. पोलिसांनी पंचनामा करून तपासाला सुरुवात केली आहे. खून करण्यासाठी नेमके कोणते हत्यार वापरण्यात आले, तसेच हल्ल्यामागील कारण काय, याचा तपास सुरू आहे.
याप्रकरणी माळेगाव पोलीस ठाण्यात गुन्हा रजिस्टर क्रमांक २४६/२०२५, भारतीय न्याय संहिता कलम १०३(१) अन्वये गुन्हा दाखल करण्यात आला आहे. गुन्हा दाखल करण्याची कारवाई पोलीस उपनिरीक्षक ओमासे यांनी केली असून, पुढील तपास सहाय्यक पोलीस निरीक्षक कुलदीप संकपाळ करीत आहेत.
उपविभागीय पोलिस अधिकाऱ्यांची घटनास्थळी भेट
उपविभागीय पोलीस अधिकारी कदम यांनी घटनास्थळी भेट देऊन पाहणी केली. पोलिसांकडून अज्ञात आरोपीचा शोध घेण्यासाठी तपासाची चक्रे वेगाने फिरविण्यात येत आहेत.
.png "Videos"){kind=small}
