सोमवार, 14 सप्टेंबर 2026
संग्रहित फोटो
हेही वाचा:स्टॉक रजिस्टर प्रकरणाने सावंतवाडी पालिकेत खळबळ; ‘मोठे मासे लपले आहेत’ नगरसेविकांचा आरोप
दैनंदिन कचऱ्यावर प्रक्रिया करण्याच्या ४३.३६ कोटी रुपयांच्या कामासाठी निविदेत अत्यंत क्लिष्ट आणि विशिष्ट स्वरूपाच्या अटी व शर्ती ठेवण्यात आल्याचे लेखापरीक्षणात नमूद आहे. या अटी एखाद्या विशिष्ट निविदाधारकाला पात्र करण्याच्या उद्देशाने तयार केल्या असाव्यात, असा गंभीर आक्षेप घेण्यात आला आहे. त्यामुळे महापालिकेला स्पर्धात्मक दराचा लाभ मिळाला नसल्याचे अहवालात म्हटले आहे. या कामासाठी एकमेव निविदाधारकाचा आर्थिक लखोटा उघडल्यानंतर ७७२ रुपये प्रति मेट्रिक टन दर प्राप्त झाला. त्यानंतर वाटाघाटी करून हा दर ७२० रुपये करण्यात आला. जुन्या कचऱ्याच्या बायोमायनिंगसाठी ४१९ रुपये प्रति टन आणि दैनंदिन कचरा प्रक्रियेसाठी ७२० रुपये प्रति टन दर निश्चित करण्यात आला. हे दर अवास्तव असल्याचेही लेखापरीक्षणात नमूद करण्यात आले आहे.
जुन्या साचलेल्या कचऱ्याच्या बायोमायनिंगसाठीच्या ३६.१३ कोटींच्या निविदेत समडोळी आणि मिरज-बेडग रोड डेपोतील सुमारे ८ लाख ४२ हजार २२३ घनमीटर कचऱ्यावर प्रक्रिया करण्याचे नियोजन होते. या निविदेत ‘कृष्णा ग्रीन’ आणि ‘झिग्मा ग्लोबल’ सहभागी झाल्याची नोंद आहे. कृष्णा ग्रीन ही भागीदारी संस्था असून तिच्या तांत्रिक व आर्थिक पात्रतेसाठी ‘भूमी ग्रीन’ची कागदपत्रे सादर करण्यात आली. कृष्णा ग्रीन ही भूमी ग्रीनची एसपीव्ही असल्याचे दाखविण्यासाठी ५०० रुपयांच्या स्टॅम्प पेपरवर करार करण्यात आल्याचे लेखापरीक्षणात नमूद आहे. मात्र, निविदेच्या अटी-शर्तींमध्ये एसपीव्हीचा समावेश नसल्याचा आक्षेप घेण्यात आला आहे. कृष्णा ग्रीनकडे घनकचरा व्यवस्थापनाचा पूर्वानुभव, वित्तीय पात्रता आणि भागभांडवल दिसून येत नसतानाही सुमारे ३६ कोटींचे काम देण्यात आल्याचे दिसते, असा गंभीर आक्षेप लेखापरीक्षण अहवालात नोंदविण्यात आला आहे. याशिवाय कामगार विमा आणि सेसची कमी कपात केल्याप्रकरणी ४१.८८ लाख रुपये, तर दैनंदिन कचरा प्रक्रिया कामातील विम्याच्या कमी कपातीपोटी १०.६० लाख रुपये, असे एकूण ५२.४८ लाख रुपये वसूलपात्र ठरविण्यात आले आहेत.
