पिंपरीत ‘मेड इन पाकिस्तान’ गोरी ब्यूटी क्रीमची विक्री, दहशतवाद विरोधी शाखेची कारवाई; तब्बल 23 क्रीम जप्त

भारतात विक्रीस प्रतिबंधित असलेल्या ‘मेड इन पाकिस्तान’ नमूद केलेल्या ‘गोरी ब्यूटी क्रीम’ची विक्री पिंपरीतील दुकानातून होत असल्याचा प्रकार समोर आला आहे. पिंपरी-चिंचवड पोलिसांच्या दहशतवाद विरोधी शाखेने क्रीम जप्त केल्या आहेत.

• पिंपरीत ‘मेड इन पाकिस्तान’ गोरी ब्यूटी क्रीमची विक्री
• दहशतवाद विरोधी शाखेची कारवाई
• तब्बल 23 क्रीम केल्या जप्त

पिंपरी : भारतात विक्रीस प्रतिबंधित असलेल्या ‘मेड इन पाकिस्तान’ नमूद केलेल्या ‘गोरी ब्यूटी क्रीम’ची विक्री पिंपरीतील दुकानातून होत असल्याचा प्रकार समोर आला आहे. पिंपरी-चिंचवड पोलिसांच्या दहशतवाद विरोधी शाखेने (एटीबी) बुधवारी (दि. २३ सप्टेंबर) पिंपरीतील रिव्हर रोड परिसरात कारवाई करून १२ हजार ६५० रुपये किमतीच्या २३ क्रीम जप्त केल्या आहेत. याप्रकरणी विक्रेत्याविरोधात पिंपरी पोलिस ठाण्यात गुन्हा दाखल केला आहे. प्रकाश मनोहरलाल गुरु (वय ३९, रा. गेलार्ड चौक, पिंपरी) असे गुन्हा दाखल झालेल्याचे नाव आहे. ‘गोरी ब्यूटी क्रीम’च्या भारतातील कंपनीचे अधिकृत तपासणी अधिकारी रईसोदीन इनामदार यांनी याप्रकरणी बुधवारी (दि. २३ सप्टेंबर) पिंपरी पोलिस ठाण्यात फिर्याद दिली आहे.

 

पिंपरी-चिंचवड विशेष शाखेचे पोलिस उपायुक्त धीरज पाटील यांनी दिलेल्या माहितीनुसार, पिंपरी पोलिस ठाण्याच्या हद्दीतील रिव्हर रोडवरील पीएमपीएमएल बस थांब्याजवळ असलेल्या शक्ती कॉस्मेटिक्स दुकानात ‘मेड इन पाकिस्तान’ नमूद असलेल्या आणि भारतात विक्रीस परवानगी नसलेल्या बनावट गोरी ब्यूटी क्रीमची विक्री होत असल्याची माहिती पिंपरी-चिंचवड दहशतवाद विरोधी शाखेला मिळाली. त्यानुसार एटीबीच्या पथकाने पिंपरी पोलिसांच्या मदतीने दुकानात कारवाई केली आहे.

तपासणीदरम्यान दुकानात प्रत्येकी ५५० रुपये किमतीच्या २३ क्रीम आढळून आल्या आहेत. त्यांची एकूण किंमत १२ हजार ६५० रुपये आहे. याप्रकरणी पिंपरी पोलिस ठाण्यात भारतीय न्याय संहितेच्या कलम ३१८ (४) तसेच कॉपीराइट कायद्याच्या कलम ५१ आणि ६३ अन्वये गुन्हा दाखल करण्यात आला आहे. पोलिस उपनिरीक्षक अभिजीत केणे तपास करीत आहेत. पोलिस आयुक्त विनय कुमार चौबे, सह आयुक्त डॉ. शशिकांत महावरकर, अपर आयुक्त सारंग आवाड, अपर आयुक्त डॉ. बसवराज तेली आणि उपायुक्त धीरज पाटील यांच्या मार्गदर्शनाखाली दहशतवाद विरोधी शाखेने पिंपरी पोलिसांच्या मदतीने ही कारवाई केली आहे.

हे सुद्धा वाचा : मानलेल्या बहिणीची छेड काढल्याचा राग, तरुणाचा खून; वाकड पोलिसांनी 4 तासांत लावला गुन्ह्याचा छडा

पाकिस्तानातून वस्तूंच्या आयातीवर बंदी

केंद्र सरकारच्या वाणिज्य आणि उद्योग मंत्रालयाच्या २ मे २०२५च्या अधिसूचनेनुसार पाकिस्तानातून भारतात सर्व प्रकारच्या वस्तूंच्या आयातीवर बंदी आहे. पिंपरी-चिंचवड पोलिस आयुक्तालयाच्या हद्दीत ‘मेड इन पाकिस्तान’ नमूद असलेल्या वस्तूंची विक्री होत असल्याचे आढळल्यास नागरिकांनी पिंपरी-चिंचवड दहशतवाद विरोधी शाखेशी संपर्क साधावा, असे आवाहन पोलिसांनी केले आहे.