शिवसेना शहरप्रमुख नाना भानगिरे यांच्यावर गुन्हा दाखल; नेमकं प्रकरण काय?

जमिनीचा विकसन करारात ३७ कोटी ४८ लाखांची फसवणूक केल्याप्रकरणात शिंदेंच्या शिवसेनेचे पुणे शहर प्रमुख नाना भानगिरे यांच्यासह इतरांवर गुन्हा दाखल झाला आहे.

पुणे : जमिनीचा विकसन करारात ३७ कोटी ४८ लाखांची फसवणूक केल्याप्रकरणात शिंदेंच्या शिवसेनेचे पुणे शहर प्रमुख नाना भानगिरे यांच्यासह इतरांवर गुन्हा दाखल झाला आहे. याप्रकरणी कोरेगांव पार्क पोलिस ठाण्यात नाना भानगिरे, गोयल, पटेल आणि ठकवाणी भागीदारी संस्थेच्या संचालकांवर हा गुन्हा दाखल झाला आहे. याप्रकरणी पुणे पोलिसांच्या आर्थिंक गुन्हे शाखेने आरोपींवर गुन्हा नोंदवला आहे.

 

पोलिसांच्या माहितीनुसार, महमंदवाडीतील तब्बल ३०० कोटीचे बाजारमूल्य असलेली जमीन आरोपींनी विकसनासाठी घेतली होती. या बदल्यात तक्रारांकडून २२ कोटी रूपये संस्थेच्या खात्यात स्वीकारले. मात्र, करारानुसार आवश्यक असलेले खाते उघडण्यास आणि जमिनीचे निर्वेध मालकी हक्क करून देण्यास टाळाटाळ केली. याउलट त्यांना संबंधित जागेवर प्लॅन सॅक्शन आणि कमेंसमेंट सर्टिफिकेटसाठी १५ कोटी ४८ लाख रूपये खर्च करण्यास भाग पाडले. मागील १४ वर्षापासून ३७ कोटी ४८ लाख रूपयांची फसवणूक केली असल्याचे तक्रारीत म्हंटले आहे.

परस्पर विक्री आणि थर्ड पार्टी इंटरेस्टचा बनाव

तक्रारदारासोबत अधिकृत करार अस्तित्वात असताना यातील आरोपींनी सर्व्हे नं. १८/१/१ मधील १२ गुंठे जमीन परस्पर नाना भानगिरे यांना विकली. विशेष म्हणजे, या व्यवहारासाठी कोणताही मोबदला घेतला गेला नाही. केवळ तक्रारादारांचा हक्क डावलण्यासाठी आणि थर्ड पार्टी इंटरेस्ट निर्माण करण्यासाठी हा व्यवहार झाल्याचे पोलिसांचे म्हणणे आहे.

याप्रकरणाची पोलिस चौकशी सुरू झाली. हा बेकायदेशीर व्यवहार कायदेशीर दाखविण्यासाठी २८ डिसेंबर २०२५ रोजी आरोपींनी भानगिरे यांच्याकडून ९६ लाख रूपये स्वीकारल्याचे दाखवले. मात्र, मुळ खरेदी खतावेळी कोणताही पैसा दिला नसल्याने हा संपूर्ण प्रकार पूर्वनियोजित कट असल्याचे पोलिसांच्या तपासातून समोर आले असल्याचे सांगण्यात आले आहे.

हे सुद्धा वाचा : डोळ्यात तिखट, चाकूने वार आणि दगडाने ठेच; संतापलेल्या पती-पत्नीने मिळून तरुणाची केली हत्या

पुणे शहरात सायबर चोरट्यांचा सुळसुळाट

पुण्यात सायबर चोरट्यांचा सुळसुळाट वाढत असून दोन वेगवेगळ्या प्रकरणांत नागरिकांची लाखो रुपयांची फसवणूक झाल्याचे उघडकीस आले आहे. कारवाईची भीती दाखवून एका तरुणाकडून ४ लाख ८१ हजार रुपये उकळल्याची घटना समोर आली आहे. तर शेअर बाजारात गुंतवणुकीच्या आमिषाने ज्येष्ठ नागरिकाची १७ लाख रुपयांची फसवणूक करण्यात आली आहे. या दोन्ही प्रकरणांत संबंधित पोलीस ठाण्यांमध्ये गुन्हे दाखल करण्यात आले आहेत.

हे सुद्धा वाचा : प्रेयसीच्या फोनवरुन मेसेज आला, तरुण कोथरुडला भेटायला गेला अन्…; पुण्यातील धक्कादायक घटना