संग्रहित फोटो
पुणे : राज्यात गुन्हेगारी वाढली आहे. पुण्यातही दररोज गुन्हेगारीच्या घटना उघडकीस येत आहेत. अशातच आता पुण्यातील कोथरुडमध्ये एक धक्कादायक घटना घडली आहे. प्रेमप्रकरणाच्या रागातून एका तरुणाला प्रेयसीच्या नातेवाईकांनी घरी बोलावून बेदम मारहाण करुन त्याची हत्या केली आहे. कोथरूड भागात मेगा सिटी इमारतीत ही घटना घडली आहे. याप्रकरणी पोलिसांनी गुन्हा दाखल करण्यात आला आहे.
नागेश संजय जाधव (वय २३, रा. जुनी वडारवाडी, मंजाळकर चौक, शिवाजीनगर) असे खून झालेल्या तरुणाचे नाव आहे. याबाबत त्याची आई सुरेखा संजय जाधव (वय ४५, रा. जुनी वडारवाडी) यांनी कोथरुड पोलिस ठाण्यात तक्रार दिली आहे. यानुसार पोलिसांनी वृषाली अनिल शिंदे, सुनिता सुनिल शिंदे, जयश्री लक्ष्मण शिंदे, तुळशी योगेश शिंदे, गंगा संजय पवार, माणिक संजय पवार, सुनिल शिंदे, पोपट शिंदे, योगेश शिंदे, अनिल शिंदे (सर्व रा. मेगासिटी, एसएनडीटीजवळ, कोथरुड) यांच्यावर गुन्हा दाखल करण्यात आला आहे.
पोलिसांच्या माहितीनुसार, नागेश जाधव हा शिवाजीनगर येथील एका खासगी कार्यालयात ‘ऑफिस बॉय’ म्हणून काम करत होता. पौड फाटा चौक परिसरातील मेगा सिटी इमारतीत राहणाऱ्या एका तरुणीशी त्याचे प्रेमसबंध होते. प्रेमसंबधाला तरुणीच्या नातेवाईकांनी विरोध केला होता. शनिवारी (१४ मार्च) सायंकाळी सव्वासातच्या सुमारास नागेशच्या मोबाइलवर संपर्क साधून तरुणीच्या नातेवाईकांनी त्याला पौड फाटा चौक परिसरात असलेल्या मेगा सिटी इमारतीत बोलावून घेतले. त्याला तीच बोलवत असल्याचे वाटल्याने नागेश दुचाकीवरुन तेथे गेला. नंतर रात्री आठच्या सुमारास आरोपींनी नागेशच्या आईच्या मोबाइलवर संपर्क साधला.
’तुमच्या मुलाला आम्ही मारले आहे. दहा मिनिटात मुलाला घेऊन जा. अन्यथा त्याला आम्ही इमारतीतून फेकून देऊ”, अशी धमकी आरोपींनी नागेशच्या आईला दिली. नंतर आरोपींनी मोबाइल बंद केला. नागेशची आई घाबरली. त्या कर्वे रस्त्यावरील मेगा सिटी इमारतीच्या आवारात आल्या. त्यांनी रहिवाशांकडे विचारणा केली. तेव्हा नागेशला मेगा सिटी इमारतीच्या गच्चीवर आरोपी मारहाण करत असल्याचे आईने पाहिले. नागेश गंभीर जखमी झाला होता. त्याने आईला मारहणीबाबत माहिती दिली. नागेशला तातडीने खासगी रुग्णालयात दाखल करण्यासाठी त्याला घेउन त्या रिक्षाने निघाल्या.
माझे एका मुलीशी प्रेमसंबंध होते, असे नागेशने आईला सांगितले. तिने त्याला मेगा सिटी परिसरात बोलावून घेतले. तिची आई, काकू, तसेच नातेवाईकांनी नागेशला दांडक्याने मारहाण केल्याने तो गंभीर जखमी झाल्याचे नागेशच्या आईने तक्रारीत म्हटले आहे. नागेशला खासगी रुग्णलायातून ससून रूग्णालयात दाखल करण्यात आले. उपचारादरम्यान त्याचा मृत्यू झाला. गुन्हे शाखेचे पोलिस निरीक्षक अनिल माने अधिक तपास करत आहेत.
