कचरा गोळा करणारी घंटागाडीच मद्यधुंद चालकाच्या ताब्यात; पुण्यात गुन्हा दाखल

नागरिकांच्या घराघरातून कचरा संकलित करण्यासाठी रस्त्यावर धावणाऱ्या पुणे महापालिकेच्या घंटागाडीचा चालकच दारूच्या नशेत वाहन चालविताना आढळून आल्याचा प्रकार कोंढवा खुर्द येथे समोर आला आहे.

• पुण्यात घंटागाडी चालकाची गंभीर चूक
• कोंढव्यात धक्कादायक प्रकार उघडकीस
• मद्यप्राशन करून वाहन चालवल्याने गुन्हा दाखल

पुणे : नागरिकांच्या घराघरातून कचरा संकलित करण्यासाठी रस्त्यावर धावणाऱ्या पुणे महापालिकेच्या घंटागाडीचा चालकच दारूच्या नशेत वाहन चालविताना आढळून आल्याचा प्रकार कोंढवा खुर्द येथे समोर आला आहे. दारूचे सेवन करून वाहन चालवून स्वतःसह इतरांच्या जीवितास धोका निर्माण केल्याप्रकरणी सचिन संभाजी गंडले (वय ४१, रा. उंड्री) याच्यावर कोंढवा पोलिस ठाण्यात गुन्हा दाखल करण्यात आला आहे. याबाबत मेहबूब अजमेर पटेल (वय २८, रा. कोंढवा खुर्द) यांनी तक्रार दिली आहे.

 

२ ऑक्टोबर रोजी गल्ली क्रमांक तीन, फातिमा मशिदीच्या कमानीसमोर, शिवनेरीनगर, कोंढवा खुर्द येथे हा प्रकार उघडकीस आला आहे. मिळालेल्या माहितीनुसार, गंडले हा पुणे महापालिकेच्या घंटागाडीवर चालक आहे. महापालिकेची कचरा वाहतूक करणारी वाहने शहरातील वर्दळीच्या रस्त्यांवर तसेच अरुंद गल्लीबोळांतून दररोज धावत असतात. या वाहनांमुळे यापूर्वीही अपघातांच्या घटना घडल्या आहेत. त्यामुळे चालकाची दक्षता आणि वाहनांची सुरक्षितता हा नागरिकांच्या दृष्टीने महत्त्वाचा विषय आहे. अशा परिस्थितीत महापालिकेच्या घंटागाडीचा चालकच मद्यप्राशन करून वाहन चालविताना आढळल्याने महापालिकेच्या देखरेख यंत्रणेवर प्रश्नचिन्ह निर्माण झाले आहे.

घंटागाडी चालकांची ड्युटीपूर्वी मद्यपान तपासणी केली जाते का? चालकांची नियमित वैद्यकीय तपासणी आणि वाहनांची फिटनेस तपासणी होते का? चालकांना वाहन ताब्यात देण्यापूर्वी त्यांची जबाबदारी निश्चित करण्याची यंत्रणा आहे का, असे प्रश्न या घटनेनंतर उपस्थित होत आहेत. कोंढवा पोलिस पुढील तपास करीत आहेत.

हे सुद्धा वाचा  : १२ वर्षाची मुलगी भावासोबत खेळत होती, दोघांनी दुचाकीवरून नेले अन्…; संभाजीनगरमधील घटनेनं खळबळ