संग्रहित फोटो
लाचलुचपत प्रतिबंधक विभागाने दिलेल्या माहितीनुसार, तक्रारदार यांच्या भावाविरुद्ध भारतीय न्याय संहितेच्या कलम १०९ (ii), ३५२ आणि ३(५) अन्वये गुन्हा दाखल करण्यात आला होता. सदर गुन्ह्याचा तपास पोलीस उपनिरीक्षक नाथा केकाण यांच्याकडे होता. या गुन्ह्याच्या तपासात मदत करण्यासाठी तसेच गुन्ह्याची कलमे कमी करण्यासाठी आरोपी पोलीस उपनिरीक्षकाने वेळोवेळी १ लाख ३० हजार रुपये स्वीकारल्याचे तक्रारीत नमूद करण्यात आले आहे. त्यानंतर दिनांक १४ नोव्हेंबर २०२६ रोजी संबंधित गुन्ह्याचे दोषारोपपत्र (चार्जशीट) लवकर न्यायालयात पाठविण्यासाठी पोलीस उपनिरीक्षक नाथा केकाण यांनी तक्रारदाराकडे आणखी ३० हजार रुपयांच्या लाचेची मागणी केली होती. त्यानंतर तडजोड होऊन २० हजार रुपये देण्याचे ठरले.
तक्रारदाराने याबाबत लाचलुचपत प्रतिबंधक विभाग, पुणे यांच्याकडे तक्रार दिल्यानंतर विभागाच्या पथकाने तक्रारीची पडताळणी करून सोमवार, दि. १६ नोव्हेंबर रोजी लोणावळा येथील मॅप्रो गार्डन परिसरात सापळा रचला. सायंकाळी ७.१५ वाजण्याच्या सुमारास पंचांसमक्ष २० हजार रुपयांची लाच स्वीकारताना पोलीस उपनिरीक्षक नाथा केकाण यांना एसीबीच्या पथकाने रंगेहात पकडले. त्यानंतर त्यांना ताब्यात घेऊन अटक करण्यात आली.
अटक करण्यात आलेले आरोपी पोलीस उपनिरीक्षक नाथा रामकिसन केकाण (वय ३८) हे लोणावळा ग्रामीण पोलीस स्टेशन, मावळ येथे कार्यरत आहेत. ते फ्लॅट क्रमांक ४०१, साई व्हिजन सोसायटी, भोंडवेबाग, रावेत, पुणे येथे राहण्यास आहेत. ते वर्ग-२ अधिकारी असल्याची माहिती देण्यात आली आहे. या प्रकरणी लोणावळा शहर पोलीस स्टेशन येथे गुन्हा दाखल करण्यात आला असून, पुढील तपास लाचलुचपत प्रतिबंधक विभाग, पुणे करीत आहे.
लाचखोरीच्या घटनांमुळे नागरिकांमध्ये संताप
मावळ तालुक्यात शासकीय कार्यालयांमधील काही अधिकारी व कर्मचाऱ्यांकडून विविध कामांसाठी लाचेची मागणी होत असल्याच्या घटना वारंवार समोर येत आहेत. सर्वसामान्य नागरिकांना शासकीय कामे करून घेण्यासाठी कार्यालयांचे उंबरठे झिजवावे लागत असताना काही अधिकारी व कर्मचारी आर्थिक लाभासाठी नागरिकांची अडवणूक करीत असल्याच्या तक्रारी पुढे येत आहेत. मावळ तालुक्यातील विविध शासकीय कार्यालयांमध्ये अधिकारी व कर्मचाऱ्यांच्या बदल्या होऊनही भ्रष्टाचाराच्या तक्रारी थांबताना दिसत नाहीत. काही अधिकारी-कर्मचारी पदाचा गैरवापर करून मोठ्या प्रमाणात आर्थिक माया जमवत असल्याचे आरोप नागरिकांकडून केले जात आहेत. त्यामुळे अशा भ्रष्ट अधिकारी व कर्मचाऱ्यांवर कठोर कारवाई होण्याची मागणी नागरिकांकडून होत आहे. लोणावळा ग्रामीण पोलीस स्टेशनमधील पोलीस उपनिरीक्षकावर झालेली ही कारवाई प्रशासनातील भ्रष्टाचाराचा प्रश्न पुन्हा ऐरणीवर आणणारी ठरली आहे. लाचलुचपत प्रतिबंधक विभागाच्या या कारवाईमुळे लाचखोर अधिकारी व कर्मचाऱ्यांना धडा मिळणार का? मावळ तालुक्यातील शासकीय कार्यालयांमधील लाचखोरीला आळा बसणार का? असे प्रश्न नागरिकांकडून उपस्थित केले जात आहेत.
वरिष्ठ अधिकाऱ्यांच्या मार्गदर्शनाखाली कारवाई
सदर कारवाई लाचलुचपत प्रतिबंधक विभाग, पुणे येथील पोलीस अधीक्षक शिरीष देशपांडे, अपर पोलीस अधीक्षक अजित पाटील, पोलीस उपअधीक्षक सतीश वाळके यांच्या मार्गदर्शनाखाली करण्यात आली. या कारवाईत पोलीस निरीक्षक मिथुन म्हात्रे, पोलीस हवालदार वनिता गोरे, दगडू सोनवणे, पोलीस अंमलदार रवी दिवेकर आदी अधिकारी व कर्मचाऱ्यांनी सहभाग घेतला.
लाचेची मागणी झाल्यास १०६४ वर संपर्क साधा
कोणत्याही शासकीय अधिकारी किंवा कर्मचाऱ्याने शासकीय काम करून देण्यासाठी लाचेची मागणी केल्यास नागरिकांनी घाबरून न जाता लाचलुचपत प्रतिबंधक विभागाशी संपर्क साधावा. लाचेची मागणी झाल्यास १०६४ या टोल फ्री क्रमांकावर तक्रार नोंदविण्याचे आवाहन लाचलुचपत प्रतिबंधक विभाग, पुणे यांच्याकडून करण्यात आले आहे.
Ans: पोलीस उपनिरीक्षक नाथा रामकिसन केकाण (वय ३८) यांना २० हजार रुपयांची लाच स्वीकारताना लाचलुचपत प्रतिबंधक विभागाच्या पथकाने रंगेहात पकडून अटक केली.
Ans: गुन्ह्याचे दोषारोपपत्र लवकर न्यायालयात पाठविण्यासाठी त्यांनी सुरुवातीला ३० हजार रुपयांची मागणी केली होती. तडजोडीनंतर २० हजार रुपये देण्याचे ठरले.
Ans: शासकीय अधिकारी किंवा कर्मचाऱ्याने लाचेची मागणी केल्यास नागरिकांनी लाचलुचपत प्रतिबंधक विभागाशी संपर्क साधावा. यासाठी १०६४ या टोल फ्री क्रमांकावर तक्रार नोंदविता येते.






