सौजन्य - सोशल मिडीया
प्लॉटच्या कागदपत्रांसाठी जीवे मारण्याची धमकी
अविनाश अमर कामदार (वय ५४, व्यवसाय रिअल इस्टेट, रा. लातूर) यांनी १६ नोव्हेंबर २०२६ रोजी एमआयडीसी पोलीस ठाण्यात दिलेल्या तक्रारीत हा घटनाक्रम नमूद केला आहे. त्यांच्या तक्रारीनुसार, त्यांचा रिअल इस्टेटचा व्यवसाय असून व्यवसायातील आर्थिक गरज भागविण्यासाठी जून-जुलै २०२६ मध्ये त्यांना पैशांची आवश्यकता होती. त्यावेळी लातूर येथील परिचित विश्वास अंबेकर यांनी रायवाडी येथील गणेश बोमणे याची त्यांच्याशी ओळख करून दिली. एक कोटी दहा लाख रुपये परत दिल्यानंतरही गणेश बोमणे याने आपण प्रतिदिवस एक टक्का व्याजदराने पैसे दिले असल्याचे सांगून, दिलेली रक्कम सोडून व्याज आणि मुद्दल असे एकूण तीन कोटी रुपये बाकी असल्याचे सांगितल्याचा आरोप तक्रारदाराने केला आहे. ही रक्कम तातडीने द्यावी, अन्यथा अपहरण करून घेऊन जाऊन पैसे वसूल करू, अशा स्वरूपाच्या धमक्या फोनवरून दिल्या जात होत्या. बोमणे याच्यासोबत स्वप्नील, आणि खरोसेअप्पा, हे दोघेही येत होते.
सुरुवातीला दोन व पाच लाखांचे व्यवहार
गणेश बोमणे याने सुरुवातीला दोन लाख आणि त्यानंतर पाच लाख रुपये व्याजाने दिले होते. तक्रारदाराने हे पैसे व्याजासह परत केल्याचे जबाबात नमूद केले आहे. त्यानंतर अधिक पैशांची तातडीची गरज निर्माण झाल्याने त्यांनी गणेश बोमणे याच्याकडे एक कोटी रुपयांची मागणी केली. त्यानुसार बोमणे याने लातुरातील एक नंबर चौक परिसरातील टीटीएस शोरूमच्या बाजूला कारमध्ये बसून टप्प्याटप्याने वारंवार रोख स्वरूपात एक कोटी रुपये दिल्याचे तक्रारदाराने म्हटले आहे. या व्यवहारात प्रतिदिवस एक टक्का व्याज ठरले होते, असे तक्रारीत नमूद आहे. आतापर्यंत टप्प्याटप्प्याने व्याजासह एक कोटी दहा लाख रुपये रोख स्वरूपात परत दिल्याचा दावा अविनाश कामदार यांनी केला आहे.
प्लॉटची मूळ रजिस्ट्री बळजबरीने नेली
या प्रकरणातील आणखी एक गंभीर बाब म्हणजे देशीकेंद्र शाळेजवळील प्लॉटच्या मूळ रजिस्ट्रेशनची कागदपत्रे ५ ऑक्टोबर २०२६ रोजी धमकी देऊन गणेश बोमणे याने बळजबरीने घेऊन गेल्याचे तक्रारदाराने म्हटले आहे. त्यानंतर १४ नोव्हेंबर रोजी गणेश बोमणे हा एमजी हेक्टर कारमधून त्यांच्या कार्यालयात आला. त्यावेळी तीन कोटी रुपये देण्याची मागणी केली. पैसे दिले नाहीत तर देशीकेंद्र शाळेजवळील प्लॉट त्याच्या नावावर करून देण्यासाठी नोंदणी करून घ्यावी, असा दबाव आणल्याचे तक्रारीत नमूद आहे.






