पिंपरी-चिंचवडमध्ये टिप्परचा कहर, एकाच दिवशी तीन अपघात; एकाचा मृत्यू

पिंपरी-चिंचवड शहरातील बेफाम व अनियंत्रित टिप्पर वाहतुकीमुळे नागरिकांच्या सुरक्षिततेचा प्रश्न पुन्हा ऐरणीवर आला असून, सोमवारी एकाच दिवशी घडलेल्या तीन भीषण अपघातांनी संतापाची लाट उसळली आहे.

पिंपरी : पिंपरी-चिंचवड शहरातील बेफाम व अनियंत्रित टिप्पर वाहतुकीमुळे नागरिकांच्या सुरक्षिततेचा प्रश्न पुन्हा ऐरणीवर आला असून, सोमवारी एकाच दिवशी घडलेल्या तीन भीषण अपघातांनी संतापाची लाट उसळली आहे. या अपघातांमध्ये एका निष्पाप नागरिकाचा जागीच मृत्यू झाला आहे, तर अन्य दोघे गंभीर जखमी झाले असून, त्यापैकी एकाची प्रकृती चिंताजनक आहे. बर्ड व्हॅली चौक येथे झालेला अपघात सर्वाधिक धक्कादायक ठरला. भरधाव टिप्परने धडक दिल्याने एका नागरिकाचा घटनास्थळीच मृत्यू झाला.

 

विशेष म्हणजे, या ठिकाणी शाळा असूनही वाहतूक नियंत्रणाच्या आवश्यक सुविधा अपुऱ्या असल्याचे समोर आले आहे. याच चौकात एकाच दिवशी सलग अपघात होणे ही प्रशासनाच्या दृष्टीने गंभीर बाब मानली जात आहे. या घटनांची दखल घेत आमदार अमित गोरखे यांनी तातडीने पोलीस आयुक्त व महापालिका प्रशासनाशी संपर्क साधून ठोस उपाययोजनांची मागणी केली आहे. “बर्ड व्हॅली चौकात कायम वाहतूक कोंडी असते. झेब्रा क्रॉसिंगची अवस्था बिकट आहे, तसेच सिग्नल व योग्य स्पीड ब्रेकरचा अभाव आहे. अशा परिस्थितीत अपघात टाळणे कठीण आहे,” असे त्यांनी सांगितले.

गोरखे यांनी शहरातील जड वाहनांवर निर्बंध आणण्याची गरज अधोरेखित केली. रहिवासी भाग व शाळांच्या परिसरात टिप्परच्या वेगावर नियंत्रण ठेवणे, सिग्नल, झेब्रा क्रॉसिंग व गतिरोधक बसविणे, तसेच गर्दीच्या वेळेत जड वाहनांच्या प्रवेशावर कडक नियम लागू करणे आवश्यक असल्याचे त्यांनी नमूद केले. अपघातप्रवण ठिकाणी विशेष गस्त व वाहतूक रक्षक नेमण्याची मागणी करत, “केवळ सांत्वन न करता ठोस कृती करणे गरजेचे आहे. भविष्यात अशा घटना टाळण्यासाठी प्रशासनाने तातडीने उपाययोजना कराव्यात,” असेही गोरखे यांनी स्पष्ट केले.

हे सुद्धा वाचा : गुंजवणीच्या पाण्यासाठी मी किडनी घालवली, पण…; विजय शिवतारेंनी रुग्णालयातून व्यक्त केल्या भावना

​ओतूरमध्ये काळजाचा ठोका चुकवणारी घटना!

जुन्नर तालुक्यातील ओतूर येथील मोनिका चौकात शुक्रवारी सकाळी ट्रक आणि स्कुटी यांच्यात झालेल्या भीषण धडकेत एका २८ वर्षीय तरुणीचा दुर्दैवी अंत झाला आहे. स्नेहल रवींद्र अहिनवे (रा. अहिनेवाडी, ता. जुन्नर) असे मृत तरुणीचे नाव आहे. या अपघाताचा अंगावर काटा आणणारा थरार सीसीटीव्ही कॅमेऱ्यात कैद झाला आहे. शुक्रवारी (दि. ३) सकाळी ११: २० ते ११:३० च्या सुमारास स्नेहल अहिनवे या आपल्या सासऱ्यांसोबत स्कुटीने मोनिका चौकातून जात होत्या. यावेळी कल्याणकडून ओतूरकडे येणाऱ्या एका भरधाव ट्रकने स्कुटीला धडक दिली. धडक इतकी भीषण होती की, स्कुटीच्या मागील सीटवर बसलेल्या स्नेहल या रस्त्यावर फेकल्या गेल्या आणि दुर्दैवाने ट्रकचे पाठीमागील चाक त्यांच्या डोक्यावरून गेले. यात त्यांना गंभीर दुखापत होऊन मोठ्या प्रमाणावर रक्तस्राव झाला. ​अपघात घडताच परिसरातील स्थानिक नागरिकांनी तात्काळ मदतीसाठी धाव घेतली. गंभीर जखमी अवस्थेत स्नेहल यांना जवळच्या खासगी रुग्णालयात हलवण्यात आले. मात्र, रुग्णालयात पोहोचण्यापूर्वीच त्यांची प्राणज्योत मालवली होती. डॉक्टरांनी त्यांना मृत घोषित केले.