बोअरच्या मोटरवरून झालेल्या वादातून कुटुंबावर हल्ला; लाकडी बांबू अन् लाथाबुक्क्यांनी बेदम मारहाण

बोअरची मोटर काढून नेल्याच्या कारणावरून झालेल्या जुन्या भांडणाचा राग मनात धरून एका कुटुंबाला लाकडी बांबू, लाथाबुक्क्यांनी मारहाण करण्यात आली आहे.

पिंपरी : राज्यात गुन्हेगारीच्या घटना दिवसेंदिवस वाढत असून, अशातच आता पुणे जिल्ह्यातून एक मोठी बातमी समोर आली आहे. बोअरची मोटर काढून नेल्याच्या कारणावरून झालेल्या जुन्या भांडणाचा राग मनात धरून एका कुटुंबाला लाकडी बांबू, लाथाबुक्क्यांनी मारहाण करण्यात आली, तसेच लोखंडी हत्याराने वार करून आयफोन फोडण्यात आला आहे. ही घटना गुरुवारी (६ ऑगस्ट) रात्री ८:३० वाजण्याच्या सुमारास म्हाळुंगे येथील उत्तम स्वीट होम दुकानासमोर घडली आहे.

या प्रकरणात राजश्री कुंदन रावत (४२, म्हाळुंगे) यांनी बावधन पोलीस ठाण्यात फिर्याद दिली आहे. त्यानुसार राहुल बाळु पवार (वय २७), रमेश बाळु पवार (वय २५), अस्लम शेख आणि सम्राट शिंदे (सर्व रा. उत्तम स्वीट होम दुकान जवळ, म्हाळुंगे) यांच्या विरोधात गुन्हा दाखल करण्यात आला आहे.

पोलीस दिलेल्या माहितीनुसार, आरोपींनी फिर्यादी, त्यांचे पती आणि दोन मुलांना शिवीगाळ करत लाथाबुक्क्यांनी व बांबूने मारहाण केली. आरोपी राहुल पवार याने फिर्यादीचा मुलगा हर्ष याच्या डोक्यावर, गालावर व खांद्यावर लोखंडी हत्याराने मारून जखमी केले आणि त्याचा आयफोन फोडून नुकसान केले. भांडण सोडवायला आलेल्या नातेवाईकांनाही आरोपींनी मारहाण केली. बावधन पोलीस या प्रकरणाचा तपास करत आहेत.

हे सुद्धा वाचा  : महिलांची बैठक लावण्यावरून वाद, कांदळीतील कलाकेंद्रात गाेळीबाराचा थरार; नेमकं काय घडलं?

पुण्यातील वाघोलीत व्यावसायिकावर गोळीबार

जमीन खरेदी विक्री करणाऱ्या व्यवसायिकावर दुचाकीवरून येऊन गोळीबार करत तिघांनी त्यांच्याकडील ११ लाख रुपये किंमतीचे २२ तोळे वजनाचे सोन्याचे दागिणे लुटल्याची धक्कादायक घटना समोर आली आहे. व्यावसायिक त्यांच्या कारमध्ये होता तरीही चोरट्यांनी त्यांच्या खिडकीजवळ येऊन गोळी झाडली. गोळीबारात काच फुटून त्यांना लागली. गोळीबारात व्यवसायिक संतोष ज्ञानोबा गावडे (वय ५०, रा. गावडेवाडी, शिरसवाडी, ता. शिरुर) हे जखमी झाले आहेत. त्यांच्या तोंडाला गोळी लागली आहे. त्यांच्यावर सध्या खासगी रुग्णालयात उपचार सुरू आहेत. याप्रकरणी संतोष यांचे चुलत बंधू दत्तात्रय गावडे (वय ५०) यांनी लोणीकंद पोलिसांत तक्रार दिली आहे. त्यानुसार पोलिसांनी तिघा अनोळखी चोरट्यांविरुद्ध आर्म ॲक्टनुसार खूनाच्या प्रयत्नाचा गुन्हा दाखल केला आहे. ही घटना बुधवारी (दि.5) रात्री साडे आठ वाजताच्या सुमारास गावडेवाडी शिरसवाडी येथील पंडीत गावडे यांच्या बंगल्यासमोर घडली आहे.