पुण्यात चाललंय काय? व्हाट्सअ‍ॅपवर डीपी ठेवल्याने तरुणावर कोयत्याने सपासप वार

वॉट्सअ‍ॅपला डीपीवर "तु कुत्ता है", असा डीपी ठेवणार्‍या तरुणावर टोळक्याने हल्ला केला आहे. यात तरुण गंभीर जखमी झाला आहे. हा प्रकार ४ डिसेंबरच्या मध्यरात्री सय्यदनगर येथे घडला आहे.

पुणे : वॉट्सअ‍ॅपला डीपीवर “तु कुत्ता है”, असा डीपी ठेवणार्‍या तरुणावर टोळक्याने हल्ला केला आहे. यात तरुण गंभीर जखमी झाला आहे. हा प्रकार ४ डिसेंबरच्या मध्यरात्री सय्यदनगर येथे घडला आहे. यावेळी टोळक्याने हातात कोयते घेऊन परिसरात दहशतीचे वातावरण निर्माण करून दुचाकीवरून निघून गेले.

याप्रकरणी आरीफ उर्फ तालीम आसमहंमद (वय २३), साहिल खान (वय २०), टप्पू खान (वय १९), आयान आरीफ शेख (वय १९), गुलाम गौसखान (वय २२, सर्व रा. सय्यदनगर, हडपसर) यांच्यावर गुन्हा दाखल करण्यात आला आहे. याबाबत समीर इक्बाल शेख (१९, रा. गल्ली नंबर 28, सय्यदनगर, महमंदवाडी रोड, हडपसर) यांनी काळेपडळ पोलीस ठाण्यात याबाबत तक्रार दिली.

पोलिसांच्या माहितीनुसार, दोन दिवसांपूर्वी रात्री साडेबारा वाजण्याच्या सुमारास समीर व मित्र आयान इरफान शेख, अस्लम, फरदिन असे गल्ली नंबर 28 येथे बोलत थांबले होते. तेव्हा मुख्य आरोपी तालीमसह त्याचे साथीदार टोळके तेथे आले. तालीमचे आणि तक्रारदार याच्या एका मित्राचे पूर्वीपासुनचे वाद होते. तसेच वॉट्सअ‍ॅपवर समीरने तु कुत्ता है असा डीपी ठेवल्याचा राग होता. त्यातून तालीम आणि त्याच्या साथीदारांनी कोयत्याने समीर शेखवर सपासप वार करत खुनाचा प्रयत्न केला. तसेच लाथा बुक्क्यांनी मारहाण केली.

यावेळी लोखंडी कोयते हवेत फिरवून टोळके दुचाकीवर पसार झाले. गुन्हा दाखल झालेल्यांपैकी गुलाम गौस खान व आयान आरीफ शेख यांना अटक करण्यात आली आहे. त्यांना न्यायालयाने सोमवारपर्यंत पोलीस कोठडी सुनावली आहे. काळेपडळ पोलीस ठाण्याचे वरिष्ठ निरीक्षक मानसिंग पाटील यांच्या मार्गदर्शनाखाली सहायक निरीक्षक अमित शेटे अधिक तपास करत आहेत.

हे सुद्धा वाचा : पुण्यात जावयानेच लावली सासऱ्याच्या घराला आग; कारण वाचून बसेल धक्का

राज्यात गुन्हेगारीचे प्रमाण वाढले

राज्यात गुन्हेगारीचे प्रमाण मोठ्या प्रमाणात वाढले आहे. दरम्यान गेल्या काही दिवसाखाली भरदुपारी कर्वे रस्त्यावरील प्रसिद्ध महाविद्यालय परिसरात फिल्मीस्टाईल टोळक्याने हातात कोयते घेऊन पाठलाग करत दोन तरुणांवर कोयत्याने वार केले. यात एका तरुणाची प्रकृती चिंताजनक असून, त्याच्यावर अतिदक्षता विभागात उपचार सुरू आहेत. तर, दुसऱ्याला डोक्यात वार करून जखमी केले आहे. भरदुपारी घडलेल्या याघटनेमुळे महाविद्यालय परिसरात चांगलाच गोंधळ निर्माण झाला होता. धक्कादायक म्हणजे, मैत्रिणीबद्दल अफवा पसरवतोय या संशयावरून टोळक्याने वार केले आहेत. घटनेची माहिती मिळताच परिमंडळ एकचे उपायुक्त संदिपसिंह गिल्ल व डेक्कन पोलीस घटनास्थळी दाखल झाले. पोलिसांनी जखमी असलेल्या तरुणांकडे चौकशी केली आहे. त्यानुसार गुन्हा दाखल करण्याची प्रक्रिया सुरू आहे. दरम्यान, पसार झालेल्या तरुणांचा शोध घेतला जात आहे.