पोलीस भरतीची तयारी करणाऱ्या तरुणावर खुनी हल्ला, डोक्यात सपासप वार; कारण…

व्यसनाधीनतेच्या आहारी गेलेल्या मुलांना भेटण्यास नकार दिल्याच्या कारणातून, त्यांनी पोलिस भरतीची तयारी करणार्‍या एका तरुणावर धारधार शस्त्राने खूनी हल्ला केल्याचा प्रकार घडला आहे.

पुणे : राज्यासह देशभरात गुन्हेगारीच्या घटनांमध्ये मोठी वाढ झाली आहे. दररोज वेगवेगळ्या भागातून खून, खुनाचा प्रयत्न, गोळीबार यासारख्या घटना उघडकीस येत आहेत. गुन्हेगांरामुळे परिसरातील नागरिकांमध्ये भिती पसरत आहे. पोलिसही गुन्हेगारीला आळा घालण्यासाठी गस्त घालत आहेत. अशातच आता पुण्यातील उत्तमनगर परिसरातून एक धक्कादायक घटना समोर आली आहे. व्यसनाधीनतेच्या आहारी गेलेल्या मुलांना भेटण्यास नकार दिल्याच्या कारणातून, त्यांनी पोलिस भरतीची तयारी करणार्‍या एका तरुणावर धारधार शस्त्राने खूनी हल्ला केल्याचा प्रकार घडला आहे.

प्रथमेश चिंटू आढळ (वय. 19,रा. कोंढवे धावडे) असे जखमी तरुणाचे नाव असून, सद्या त्याच्यावर खासगी रुग्णालयात उपचार सुरू आहेत. ही घटना गुरूवारी (दि. 11) रात्री आठ वाजताच्या सुमारास आर. आर. वाईन्स जवळ उत्तमनगर परिसरात घडली आहे. यावेळी टोळक्याने तीक्ष्ण शस्त्रे उगारून परिसरात दहशत माजविली. याप्रकरणी, उत्तमनगर पोलिसांनी करणसिंह सुरेंद्रसिंह गचंड (वय. 20,रा. आरती निवास, मनिषा थेटर जवळ उत्तमगर) याला अटक केली असून, त्याच्यासोबतच्या तिघा अल्पवयीन साथीदारांवर खूनाचा प्रयत्न केल्याचा गुन्हा दाखल केला आहे.

पोलिसांनी दिलेल्या माहितीनुसार, फिर्यादी तरुण आढळ हा बारावी उत्तीर्ण असून, पोलिस भरतीची तयारी करतो. तो आरोपी करणसिंह आणि इतरांना ओळखतो. त्यातील काही पोरांना व्यसनाचा नाद असल्यामुळे आढळ त्यांना भेटण्याचे टाळत होता. आरोपीपैकी एकाने आढळ याला फोन करून तु आमच्यात येत नाहीस, आपल्यात काही गैरसमज झाले असून, ते आपआपसात मिटवून घेऊ असे म्हणून आर. आर. वाईन्स येथे भेटायला बोलावले होते. त्यानुसार आढळ हा आरोपींना भेटण्यासाठी गेला होता. त्यावेळी आरोपींनी आढळ याला तु आता मोठा झाला,आमच्यात बसत उठत नाही असे म्हणून लाथा-बुक्यांने मारहाण करून डोक्यात धारधार शस्त्राने वार केला. तसेच आढळ याच्या दोन्ही हातावर वार केले. आरोपींनी शस्त्र हवेत फिरवून आम्ही येथील भाई असून, आमच्या नादी कोणी लागले तर त्याला सोडणार नाही असे म्हणून परिसरात दहशत निर्माण केली.

टोळक्याच्या दहशतीमुळे दुकानदारांनी आपली दुकाने बंद केली होती. आढळ याला त्याच्या घरच्यांनी उपचारासाठी खासगी रुग्णालयात दाखल केले. दरम्यान, घटनेची माहिती मिळताच उत्तमनगर पोलिसांनी घटनास्थळी धाव घेतली. यानंतर गुन्हा दाखल होताच पोलिसांनी एका आरोपीला अटक केली असून, त्याच्यासोबतच्या अल्पवयीन साथीदाराला ताब्यात घेतले आहे. पुढील तपास पोलिस उपनिरीक्षक चेतन धनवडे करीत आहेत.