'त्या' अपघातप्रकरणी मोठी अपडेट; आरोपींची येरवडा कारागृहात एकत्रित चौकशी
पुणे : पुण्यातील कल्याणीनगर भागात घडलेल्या अपघातप्रकरणी मोठी बातमी समोर आली आहे. आता पुणे पोलीस आरोपींची येरवडा कारागृहात जाऊन एकत्रित चौकशी करणार आहेत. अल्पवयीन मुलाचे रक्ताचे नमुने बदलून पुरावे नष्ट केल्याप्रकरणात १० जणांना अटक केली आहे. त्यात पोलिसांकडून एकत्रित चौकशी केली जाणार आहे. तपास अधिकारी सहाय्यक आयुक्त गणेश इंगळे यांनी बुधवारी न्यायालयात अर्ज केला असून, विशेष न्यायाधीश यू. एम. मुधोळकर यांनी पोलिसांना चौकशी करण्यास परवानगी देखील दिली आहे.
कल्याणीनगर येथे १९ मे रोजी मध्यरात्री एका भरधाव आलिशान कारने आयटी इंजिनिअर तरुणी व तरुणाला धडक दिली होती. त्यात दोघांचाही मृत्यू झाला होता. प्रसिद्ध बांधकाम व्यावसायिक विशाल अगरवाल यांच्या मुलाकडून हा अपघात झाला होता. त्याला ताब्यात घेतले होते. मात्र, त्याला वाचविण्यासाठी अगरवाल कुटूंबिय तसेच इतरांनी अनेक गोष्टी केल्या. त्यात ससून रुग्णालयात या चालक मुलाच्या रक्ताच्या नमुने बदल केले होते. त्याच्या जागी त्याच्या आईचे रक्त घेतले होते. हे ससूनच्या डॉक्टरांना हाताशी धरून करण्यात आले होते.
याप्रकरणी विशाल सुरेंद्रकुमार अगरवाल, पत्नी शिवानी (दोघे रा. बंगला क्रमांक एक, ब्रह्मा सनसिटी, वडगाव शेरी), ससूनच्या न्यायवैद्यक विभागाचा प्रमुख डॉ. अजय तावरे, आपत्कालीन विभागाचा मुख्य वैद्यकीय अधिकारी डॉ. श्रीहरी हाळनोर, शिपाई अतुल घटकांबळे, तसेच अश्पाक मकानदार, अमर गायकवाड, कारमधील इतर मुलांच्या रक्ताच्या नमुन्यात बदल करणारे आदित्य अविनाश सूद (वय ५२, रा. बंगला क्रमांक ३, सोपानबाग सोसायटी, घोरपडी), आशिष सतीश मित्तल (वय ३७, रा. बेलवेडर सोसायटी, विमाननगर) आणि अरुणकुमार सिंग यांना अटक केली.
आरोपी सध्या येरवडा कारागृहात न्यायालयीन कोठडीत आहेत. याप्रकरणात नऊ आरोपींवर आरोपपत्र दाखल केले आहे. आरोपी आशिष मित्तलला रक्ताचे नमुने देण्यास सांगणारा अरुणकुमार देवनाथ सिंग याच्याविरोधात आरोपपत्र दाखल करण्यात आले नाही. आरोपपत्र दाखल झाल्यानंतर सर्व आरोपींच्या विरोधात एकत्रित खटला चालविला जाणार आहे. अल्पवयीन मुलाचे रक्ताचे नमुने बदलून पुरावे नष्ट करण्यासाठी डॉ. अजय तावरे, डॉ. श्रीहरी हाळनोर, शिपाई अतुल यांना किती रक्कम दिली जाणार होती, तसेच आरोपींनी त्यांना काही आमिष दाखविले होते का ? यादृष्टीने तपास करायचा आहे. सर्व आरोपींची येरवडा कारागृहात एकत्रित चौकशी करायची आहे, असा अर्ज न्यायालायत दाखल करण्यात आला. तो न्यायालयाने मान्य केला.
हे सुद्धा वाचा : पुणे हादरलं! ४८ तासात ५ खून; ‘या’ भागात घडल्या घटना
डॉ. तावरेचा न्यायालायत अर्ज
ससूनच्या न्यायवैद्यक विभागाचा प्रमुख डॉ. अजय तावरेने याप्रकरणातून वगळण्यात यावे, याबाबत न्यायालायत अर्ज दाखल केला आहे. आशिष मित्तलने खासगी रुग्णालयात वैद्यकीय उपचार करण्यासाठी बुधवारी न्यायालायात अर्ज केल्याची माहिती सहायक आयुक्त गणेश इंगळे यांनी दिली.
.png "Videos"){kind=small}
