Amgaon Murder Case: माजी प्राध्यापकाची विटांनी ठेचून निर्घृण हत्या! बोथली शेतशिवारातील घटनेने गोंदिया हादरले…

Amgaon Murder Case: आमगावजवळील बोथली गावातील शेतशिवारात माजी प्राध्यापक चंद्रशेखर दहीकर यांची अज्ञात व्यक्तींनी विटांनी ठेचून निर्घृण हत्या केल्याची धक्कादायक घटना घडली आहे. शेतात कुक्कुटपालन करत एकटेच राहणाऱ्या दहीकर यांचा रक्ताच्या थारोळ्यात मृतदेह आढळल्याने परिसरात खळबळ उडाली आहे.

• गोंदियात बोथलीत माजी प्राध्यापक चंद्रशेखर दहीकर यांची हत्या
• सकाळी घरासमोर त्यांचा मृतदेह रक्ताच्या थारोळ्यात आढळला
• पोलिसांनी अज्ञात आरोपींचा शोध सुरू केला आहे

Amgaon Murder Case: आमगाव पोलीस स्टेशनच्या हद्दीत येणाऱ्या बोथली गावातील शेतशिवारातून एक अतिशय धक्कादायक आणि सुन्न करणारी घटना समोर आली आहे. सेवानिवृत्त/माजी प्राध्यापक चंद्रशेखर दहीकर यांची अज्ञात हल्खोरांनी विटांनी ठेचून अतिशय निर्घृण हत्या केली आहे. शेतातील त्यांच्या निवासस्थानासमोरच रक्ताच्या थारोळ्यात त्यांचा मृतदेह आढळून आल्याने संपूर्ण बोथली गावामध्ये भीतीचे आणि दहशतीचे वातावरण निर्माण झाले आहे.

हेही वाचा: Crime News Mumbai: तीन मुलांची आई, जुना प्रियकर अन् मुंबईतील फसवणूक! नाल्यात सापडलेल्या मृतदेहाने उघड केली खळबळजनक कहाणी

नेमकी कशी घडली घटना?

मिळालेल्या सविस्तर माहितीनुसार, चंद्रशेखर दहीकर हे ठाणाटोला-जवरी मार्गावर असलेल्या बोथली गावाच्या शेतशिवारात आपले घर बांधून एकटेच राहत होते. शेतातील या निवासस्थानी राहून ते कुक्कुटपालनाचा (Poultry Farming) व्यवसाय सांभाळत होते. रात्रीच्या सुमारास अज्ञात इसमांनी त्यांच्या शेतातील घरावर येऊन त्यांच्यावर अचानक हल्ला चढवला. हल्खोरांनी विटांनी त्यांच्या डोक्यावर व शरीरावर बेदम मारहाण केली. या प्राणघातक हल्ल्यात गंभीर दुखापत झाल्याने चंद्रशेखर दहीकर यांचा जागीच दुर्दैवी मृत्यू झाला.

शेतकऱ्याला दिसला रक्ताच्या थारोळ्यात पडलेला मृतदेह

सकाळी नेहमीप्रमाणे शेजारील शेतात कामासाठी जाणाऱ्या एका शेतकऱ्याला चंद्रशेखर दहीकर यांचा मृतदेह त्यांच्या घरासमोरील वनविभागाच्या जमिनीवर रक्ताच्या थारोळ्यात पडलेला दिसला. हे भीषण दृश्य पाहताच हादरलेल्या शेतकऱ्याने लागलीच बोथली ग्रामपंचायतीच्या सरपंचांशी संपर्क साधून घटनेची कल्पना दिली. सरपंचांनी क्षणाचाही विलंब न लावता आमगाव पोलिसांना या हत्याकांडाची माहिती दिली.

हेही वाचा: Jalgaon Accident News: संसाराची सुरुवात होण्यापूर्वीच नियतीने साधला घाला; पाळधी-तरसोद बायपासवर तरुणाचा करुणास्पद अंत

आमगाव पोलिसांकडून हत्येचा तपास सुरू; आरोपींचे आव्हान

घटनेची बातमी मिळताच आमगाव पोलीस ठाण्याचे वरिष्ठ अधिकारी आपल्या ताफ्यासह तातडीने घटनास्थळी दाखल झाले. पोलिसांनी पंचनामा करून मृतदेह शवविच्छेदनासाठी पाठवला आहे. माजी प्राध्यापकाची हत्या जुन्या वैमनस्यातून झाली, चोरीच्या उद्देशाने झाली की त्यामागे आणखी काही कारण आहे, याचा शोध पोलीस घेत आहेत. एकट्या राहणाऱ्या माजी प्राध्यापकाची अशा प्रकारे हत्या झाल्याने परिसरात हळहळ व्यक्त होत असून, अज्ञात आरोपींचा सुगावा लावून त्यांना लवकरात लवकर बेड्या ठोकण्याचे मोठे आव्हान आमगाव पोलिसांसमोर उभे राहिले आहे.