शेतकरी चंद्रकांत शिंदे हत्या प्रकरणात मोठी अपडेट, तिघांना अटक; मुख्य आरोपीचा शोध सुरू

माळकौठा येथील शेतकरी चंद्रकांत शिंदे यांच्या अपहरणानंतर हत्या केल्याच्या प्रकरणाने नांदेड जिल्ह्यात खळबळ उडाली आहे. या प्रकरणात वजिराबाद पोलिसांनी तिघांना अटक केली असून, न्यायालयाने त्यांना २९ तारखेपर्यंत पोलीस कोठडी सुनावली आहे.

• शेतकरी चंद्रकांत शिंदे यांचे अपहरण करून हत्या
• तिघांना अटक; २९ तारखेपर्यंत पोलीस कोठडी
• मुख्य आरोपीचा पोलिसांकडून शोध सुरू

नांदेड : माळकौठा येथील शेतकरी चंद्रकांत शिंदे यांच्या अपहरणानंतर हत्या केल्याच्या प्रकरणाने नांदेड जिल्ह्यात खळबळ उडाली आहे. या प्रकरणात वजिराबाद पोलिसांनी तिघांना अटक केली असून, न्यायालयाने त्यांना २९ तारखेपर्यंत पोलीस कोठडी सुनावली आहे. दरम्यान, या प्रकरणातील मुख्य आरोपीचा शोध घेण्यासाठी पोलिसांची विविध पथके रवाना झाली असून, लवकरच त्याला जेरबंद करण्यात येईल, अशी माहिती पोलीस निरीक्षक अजित कुंभार यांनी दिली. या प्रकरणात वजिराबाद पोलिसांनी जयकुमार ऊर्फ शेरा गायकवाड, आमेर शेख आणि इम्रान खान यांना अटक केली आहे.

 

मुदखेडमध्येही स्वतंत्र गुन्हा दाखल

या तिघांना न्यायालयात हजर केले असता त्यांची २९ तारखेपर्यंत पोलीस कोठडीत रवानगी करण्यात आली आहे. मुख्य आरोपीचा माग काढण्यासाठी वजिराबाद पोलीस ठाण्याची दोन पथके तसेच स्थानिक गुन्हे शाखेची पथके तपासात सक्रिय झाली आहेत. मुख्य आरोपीच्या अटकेसाठी पोलिसांकडून शोधमोहीम तीव्र करण्यात आली आहे. दरम्यान, या प्रकरणाला आणखी एक वळण मिळाले आहे. मुदखेड पोलिसांनी दत्ता गायकवाड यांच्या फिर्यादीवरून अपहरण करून मारहाण केल्याप्रकरणी चार जणांविरुद्ध गुन्हा दाखल केला आहे. त्यामुळे या प्रकरणाशी संबंधित घटनांची व्याप्ती वाढण्याची शक्यता व्यक्त होत आहे. या गुन्ह्याच्या अनुषंगानेही तपासाला महत्त्व प्राप्त झाले आहे.

हे सुद्धा वाचा : चिमुरडीच्या हातापायांवर सिगारेटचे चटके, डोक्याचे केसही कापले; आरोपी वडिलांना अटक

‘के.एफ. एंटरप्रायजेस’चीही पडताळणी

या प्रकरणाच्या पार्श्वभूमीवर ‘के.एफ. एंटरप्रायजेस’ या नावाचीही चर्चा सुरू झाली आहे. संबंधित संस्था आणि प्रकरणात चर्चेत आलेली संस्था एकच आहे का, याची पडताळणी पोलिसांकडून सुरू असल्याचे वृत्त आहे. या संस्थेचा प्रकरणाशी नेमका काय संबंध आहे, हे तपासातून स्पष्ट होणार आहे. शेतकरी चंद्रकांत शिंदे यांच्या अपहरण व हत्या प्रकरणातील मुख्य आरोपीची अटक, मुदखेडमध्ये दाखल झालेल्या स्वतंत्र गुन्ह्याचा तपास आणि संस्थेच्या संबंधांबाबतची पडताळणी या सर्व बाबींकडे आता जिल्ह्याचे लक्ष लागले आहे.

हे सुद्धा वाचा : कामावर जाताना काळाचा घाला, भीषण अपघातात दोन कामगारांचा मृत्यू; खेड तालुक्यातील धक्कादायक घटना