Amravati Accident News: क्षणार्धात घात झाला! अप्पर वर्धा कालव्यात पाय घसरला अन् ५२ वर्षीय शेतकरी पाण्याच्या तीव्र प्रवाहात गायब

Amravati Accident News: अमरावती जिल्ह्यातील तिवसा शहरातून जाणाऱ्या अप्पर वर्धा धरणाच्या मुख्य कालव्यात हातपाय धुताना पाय घसरून पिंटू उर्फ दिवाकर माहोरे (५२) हा शेतकरी पाण्याच्या जोरदार प्रवाहात वाहून गेला. रब्बीसाठी सोडलेल्या पाण्यामुळे कालव्याचा वेग जास्त असल्याने कालपासून सुरू असलेल्या शोधमोहिमेत अद्यापही त्याचा शोध...

• तिवसा येथे अप्पर वर्धा कालव्यात ५२ वर्षीय शेतकरी वाहून गेला
• पाण्याचा वेग जास्त असूनही प्रशासनाकडून शोधमोहीम सुरू आहे
• या दुर्देवी घटनेमुळे परिसरात तीव्र हळहळ व्यक्त होत आहे

Amravati Accident News: अमरावती जिल्ह्यातून एक अत्यंत दुर्दैवी आणि मन हेलावून टाकणारी घटना समोर आली आहे. जिल्ह्यातील तिवसा शहरातून जाणाऱ्या अप्पर वर्धा धरणाच्या मुख्य कालव्यात पाण्याच्या जोरदार प्रवाहात एक ५२ वर्षीय शेतकरी वाहून गेल्याची घटना घडली आहे. पिंटू उर्फ दिवाकर माहोरे असे वाहून गेलेल्या दुर्दैवी शेतकऱ्याचे नाव असून, कालपासून प्रशासनाकडून त्यांचा कसून शोध घेतला जात आहे, मात्र अद्यापही त्यांचा शोध लागलेला नाही.

हेही वाचा: Pune Drugs Arrest News: बँकॉक ते पुणे… तस्करीची अशी पद्धत की अधिकारीही चक्रावले! शूजच्या सोलमधून हशिशची धक्कादायक तस्करी

नेमकी कशी घडली घटना?

मिळालेल्या सविस्तर माहितीनुसार, सध्या रब्बी हंगामासाठी अप्पर वर्धा धरणाच्या मुख्य कालव्यात पाणी सोडण्यात आलेले आहे. काल दुपारच्या सुमारास पिंटू उर्फ दिवाकर माहोरे हे कालव्याजवळ गेले होते. यादरम्यान ते कालव्यात हातपाय धुण्यासाठी खाली उतरले असता अचानक त्यांचा पाय घसरला. कालव्यातील पाण्याचा प्रवाह अतिशय वेगवान असल्यामुळे ते क्षणात पाण्याच्या प्रवाहात ओढले गेले आणि पाहता पाहता बेपत्ता झाले. घटना घडताच परिसरातील स्थानिकांनी मोठी आरडाओरड केली, परंतु पाण्याचा प्रचंड वेग आणि खोली जास्त असल्याने उपस्थितांना त्यांना वाचवणे शक्य झाले नाही.

हेही वाचा: Tiger Shroff Firing Case Update: सुरक्षा रक्षकांशिवाय फुटबॉल खेळत होता टायगर! शूटर अगदी जवळ, तरीही का नाही झाला हल्ला?

युद्धपातळीवर शोधमोहीम सुरू, पण पाण्याचा अडथळा

या दुर्घटनेची माहिती मिळताच स्थानिक प्रशासनाने आणि आपत्कालीन यंत्रणेने तात्काळ घटनास्थळी धाव घेतली. कालपासून प्रशासनाचे बचाव पथक कालव्यात पिंटू माहोरे यांचा शोध घेण्यासाठी युद्धपातळीवर मोहीम राबवत आहे. परंतु, रब्बीसाठी कालव्यात सोडण्यात आलेल्या पाण्यामुळे पाण्याचा विसर्ग आणि वेग खूप जास्त आहे, ज्यामुळे बचावकार्यात मोठे अडथळे निर्माण होत आहेत. सध्या प्रशासनाकडून कालव्याच्या दोन्ही काठांवर आणि पाण्याच्या प्रवाहाच्या दिशेने शोध मोहीम तीव्र करण्यात आली आहे. एका निष्पाप शेतकऱ्याचा असा दुर्दैवी घात झाल्याने तिवसा परिसरात सर्वत्र हळहळ व्यक्त होत आहे.