विद्यार्थ्यांना घेऊन जाणाऱ्या स्कूल व्हॅनचा अपघात; चालकाचे नियत्रंण सुटले अन् थेट…

काळेपडळ परिसरात विद्यार्थ्यांना शाळेतून घरी घेऊन निघालेल्या स्कूल व्हॅनचा अपघात झाल्याची घटना घडली आहे. चालकाचे नियत्रंण सुटल्याने स्कूल व्हॅन एका लाईटच्या पोलला जाऊन धडकली.

पुणे : राज्यासह देशभरात अपघाताच्या घटनांमध्ये मोठी वाढ झाली आहे. दररोज वेगवेगळ्या भागात अपघातांमध्ये नागरिकांना आपला जीव गमवावा लागत आहे. अशातच आता पुण्यातून एक धक्कादायक घटना समोर आली आहे. काळेपडळ परिसरात विद्यार्थ्यांना शाळेतून घरी घेऊन निघालेल्या स्कूल व्हॅनचा अपघात झाल्याची घटना घडली आहे. चालकाचे नियत्रंण सुटल्याने स्कूल व्हॅन एका लाईटच्या पोलला जाऊन धडकली. या अपघातात बस चालकासह चार विद्यार्थी जखमी झाल्याची माहिती पोलिसांनी दिली.

 

गुरूवारी दुपारी दीडच्या सुमारास हा अपघात झाला. याप्रकरणी काळेपडळ पोलिस ठाण्यात चालक अमोल विनायक बोराटे (रा. काळेपडळ) याच्यावर गुन्हा दाखल करण्याचे काम रात्री उशिरापर्यंत सुरू होते.

पोलिसांच्या माहितीनुसार, साधना विद्यालयाची ही खासगी विद्यार्थी बस होती. विद्यार्थ्यांना घेऊन बसचालक अमोल हा घरी सोडण्यास जात होता. व्हॅनमध्ये जवळपास ३० ते ३५ विद्यार्थी होते. सर्व विद्यार्थी आठवी ते दहावीमधील होते. व्हॅन म्हसोबा चौकात आल्यानंतर अचानक चालकाचे नियत्रंण सुटून बस एका लाईटच्या पोलला धडकली. त्यात बसचा पुढील भाग तुटला गेला. बसचा स्पीड मोठा होता. त्यामुळे बस चालक अमोल याच्यासह तीन ते चार विद्यार्थी जखमी झाले आहेत. नागरिकांनी तत्काळ पोलिसांना याची माहिती देत जखमी विद्यार्थ्यांना रुग्णालयात दाखल केले. एका विद्यार्थ्याला फॅक्चर झाल्याचे माहिती असल्याचे पोलिसांनी सांगितले. तर चालकही जखमी झाला आहे. दरम्यान, अपघाताची माहिती मिळताच पोलिसांनी क्रेनच्या मदतीने स्कूल व्हॅन बाजूला करून वाहतूक सुरळीत केली.

हे सुद्धा वाचा : पुतळा हटवण्यास ग्रामस्थांचा तीव्र विरोध; दुसऱ्या दिवशीही माढ्यात तणाव कायम

दिवे घाटात भीषण अपघातात बाप-लेकीचा मृत्यू

दिवे घाटात झालेल्या भीषण अपघातात बाप-लेकीचा दुर्दैवी मृत्यू झाल्याची घटना घडली आहे. एका भरधाव ट्रकने त्यांच्या दुचाकीला धडक दिल्यामुळे हा अपघात झाला आहे. या अपघातात दुचाकीवरील त्यांचा मुलगा गंभीर जखमी झाला आहे. याप्रकरणी फुरसुंगी पोलिसांनी ट्रक चालकाला अटक केली आहे. सोमवारी मध्यरात्री हा अपघात झाला आहे. सुंदर कैलास गंगावणे (वय ३८, रा. उंड्री-पिसोळी) व अनन्या सुंदर गंगावणे (वय १२) अशी मृत्यू झालेल्यांची नावे आहेत. तर, अपघातात सोहम सुंदर गंगावणे जखमी झाला असून, त्याच्यावर रुग्णालयात उपचार सुरू आहेत. याप्रकरणी ट्रक चालक हनुमंत बाबूराव मलकापुरे (वय ३२, रा. नागेवाडी, ता. शिरुर अनंतपाळ, जि. लातूर) याला अटक करण्यात आली आहे. याबाबत अश्विनी उत्तम पवार (वय ३०, रा. कमलविहार सोसायटी, धनकवडी) यांनी फुरसुंगी पोलिस ठाण्यात तक्रार दिली आहे.