गस्तीवरील पोलिसावर आठ जणांच्या टोळक्याचा हल्ला; तरुणीने चाकूने केले सपासप वार

 मध्यरात्री गस्त घालणाऱ्या पोलिसांनी हटकल्याचा राग मनात धरून आठ जणांच्या टोळक्याने थेट पोलिसांवरच हल्ला केला आहे. पोलिस अंमलदाराला दोघांनी घट्ट पकडून ठेवले, तर एका तरुणीला याला जिवंत सोडू नको असे म्हणत चिथावणी दिली.

• गस्तीवर असलेल्या पोलिसावर टोळक्याचा हल्ला
• तरुणीने चाकूने केले सपासप वार
• करोडी भागातील घटनेनं खळबळ

छत्रपती संभाजीनगर : राज्यासह देशभरात गुन्हेगारीचे प्रमाण वाढले असून, दररोज वेगवेगळ्या भागात गुन्हेगारीच्या गंभीर घटना घडत आहेत. असातच आता एक मोठी बातमी समोर आली आहे. मध्यरात्री गस्त घालणाऱ्या पोलिसांनी हटकल्याचा राग मनात धरून आठ जणांच्या टोळक्याने थेट पोलिसांवरच हल्ला केला आहे. पोलिस अंमलदाराला दोघांनी घट्ट पकडून ठेवले, तर एका तरुणीला याला जिवंत सोडू नको असे म्हणत चिथावणी दिली. त्यानंतर तरुणीने चाकूने पोलिस अंमलदाराच्या पाठीवर सपासप पाच वार केले आहेत. डाव्या बरगडीसह दोन्ही हातांवरही वार झाल्याने ते गंभीर जखमी झाले आहेत.

 

करोडीतील आंबेडकर चौकात गुरुवारी मध्यरात्री १.१० वाजता हा प्रकार घडला आहे. शाहरुख ऊर्फ जावेद, रोहिणी सुभाष बेळगे, अश्विनी सुभाष बेळगे, सागर संजय इंगळे, अभि गायकवाड, रोहित चव्हाण (सर्व रा. कमळापूर, रांजणगाव) आणि त्यांच्या दोन साथीदारांविरुद्ध दौलताबाद पोलिस ठाण्यात गुन्हा दाखल करण्यात आला आहे. तर सागर इंगळेसह एकूण चार आरोपींना पोलिसांनी अटक केली आहे. फकीरा नब्बास तडवी (३७, रा. पोलिस कॉलनी, मिल कॉर्नर) असे जखमी अंमलदाराचे नाव आहे. ते दौलताबाद पोलिस ठाण्यात कार्यरत असून, ७ ऑक्टोबरच्या रात्री अंमलदार गाडे व होमगार्ड नईम यांच्यासह वाहनातून गस्तीवर होते.

हे सुद्धा वाचा : कामावरून निघाले, पण घरी पोहोचलेच नाहीत! आरशाचे तुकडे अन् इंडिकेटरमुळे उलगडले बेपत्ता होण्याचे रहस्य…

मध्यरात्री १२.२२ वाजता भांगसीमाता गडाकडे जाणाऱ्या रस्त्यावरील मोकळ्या मैदानात तीन महिला व पाच पुरुष आढळले. पोलिसांनी त्यांना रात्रीच्या वेळी तेथे थांबण्याचे कारण विचारून घरी जाण्यास सांगितले. आंबेडकर चौकात चोर आल्याची माहिती मिळाल्याने तडवी पथकासह तेथे गेले. शाहरुख ऊर्फ जावेद व अभि गायकवाड यांनी तडवी यांना पकडून ठेवले आणि अश्विनी बेळगे हिला चाकूने भोसकण्यास चिथावले. त्यानंतर अश्विनीने चाकूने वार केले.