वाराणसी विमानतळ गोळीबार प्रकरणात मोठी अपडेट; शिंदे गटाच्या नेत्याला सुरक्षा यंत्रणांनी घेतलं ताब्यात
वाराणसी : वाराणसीच्या लालबहादूर शास्त्री आंतरराष्ट्रीय विमानतळावर रविवारी सकाळी शिवसेनेचे (शिंदे गट) नेते कमलेश राय यांच्या लायसन्स असलेल्या पिस्तुलातून अचानक गोळी सुटल्याने एका महिलेसह दोन विमानतळ कर्मचारी जखमी झाले आहेत. सुरक्षा यंत्रणांनी कमलेश राय यांना ताब्यात घेतले असून, स्थानिक पोलिसांमार्फत पुढील कायदेशीर कारवाई व चौकशी सुरू असल्याची माहिती समोर आली आहे, दरम्यान अचानक घडलेल्या या घटनेमुळे विमानतळावर मोठं गोंधळाचं वातावरण निर्माण झाल्याचं पहायला मिळालं.
कमलेश राय हे एअर इंडिया एक्स्प्रेसच्या विमानाने मुंबईला जाण्यासाठी सकाळी पावणेदहाच्या सुमारास विमानतळावर पोहोचले. तपासणीदरम्यान राय पिस्तूलची मॅगझिन काढत असतानाच अचानक ट्रिगर दाबला गेल्याने गोळी सुटली, अशी माहिती जखमी सुरक्षा कर्मचारी रोहितने दिली. या गोळीबारात महिला कर्मचारी सुमन यांच्या पायाला गोळी, तर रोहित यांच्या पायाला गोळीचे छर्रे लागले. प्रवाशाने तो ट्रिगर जाणूनबुजून दाबला की त्याच्याकडून चुकून हे घडले, हे मी खात्रीशीर सांगू शकत नाही, असे रोहितने स्पष्ट केले.
गुन्हा दाखल करण्याची तयारी
विमानतळ प्रशासन या प्रकरणात गुन्हा दाखल करण्याची तयारी करत आहे. निष्काळजीपणा दाखवल्याप्रकरणी ही कारवाई केली जाणार असून त्यांच्यावर गंभीर कलमांखाली गुन्हा दाखल केला जाऊ शकतो. यासोबतच त्यांचा शस्त्र परवाना निलंबित करण्याची प्रक्रियाही राबवली जाऊ शकते. या घटनेत दोन जण जखमी झाले आहेत.
हे सुद्धा वाचा : पुणे विभागात अन्न व औषध प्रशासनाची मोठी कारवाई; तब्बल 16 आस्थापनांचे परवाने निलंबित
चार वेळा नगरसेवक
कमलेश राय हे मूळचे आझमगडचे रहिवासी असून सध्या मुंबईतील मरोळ भागात त्यांचे दोन हॉटेल आहेत. ते शिवसेनेकडून चार वेळा नगरसेवक राहिलेले असून त्यांच्या पत्नीही दोन वेळा नगरसेवक राहिल्या आहेत. त्यांचा मुलगाही राजकारणात सक्रिय आहे. यापूर्वी ते एक सुरक्षा एजन्सी चालवत होते, परंतु शिवसेनेत पडलेल्या फुटीनंतर ते काँग्रेसमध्ये गेले होते.
.png "Videos"){kind=small}
