शासनाला घातला बारा लाखाचा गंडा, तिघांविरुद्ध गुन्हा दाखल; नेमकं प्रकरण काय?

संगनमत करून शासनाची १२ लाख ८० हजार १३६ रुपयांची फसवणूक केल्याचे उघड झाले आहे. याप्रकरणी जिल्हा आरोग्य अधिकारी डॉ. संजयकुमार पांचाळ यांच्या फिर्यादीवरून गुन्हा दाखल करण्यात आला आहे. 

परभणी : राज्यासह देशभरात फसवणुकीच्या घटना वाढल्या असून, असातच आता एक मोठी बातमी समोर आली आहे. परभणी येथील जिल्हा सहाय्यक संचालक आरोग्यसेवा कुष्ठरोग कार्यालयात नेमणुकीस असलेल्या कनिष्ठ लिपिक, तत्कालीन आहरण व संवितरण अधिकारी आणि विद्यमान आहरण व संवितरण अधिकारी यांनी संगनमत करून शासनाची १२ लाख ८० हजार १३६ रुपयांची फसवणूक केल्याचे उघड झाले आहे. याप्रकरणी जिल्हा आरोग्य अधिकारी डॉ. संजयकुमार पांचाळ यांच्या फिर्यादीवरून गुरुवारी (दि. १३) नवा मोंढा पोलिसात संबंधित तीनही अधिकारी – कर्मचाऱ्याविरुद्ध गुन्हा दाखल करण्यात आला आहे.

फिर्यादीत नमूद केले आहे की, परभणी येथील जिल्हा सहाय्यक संचालक आरोग्यसेवा कुष्ठरोग कार्यालयात नेमणुकीस असलेले कनिष्ठ लिपिक वीरेंद्र मोरेश्वर सुतवणे, तत्कालीन आहरण व संवितरण अधिकारी डॉ. विद्या भोजराज सरपे (कुलदीपक) आणि विद्यमान आहरण व संवितरण अधिकारी डॉ. पंढरीनाथ हरिभाऊ लक्कमवार यांनी लेखा व कोषागार कार्यालयातून २९ मे २०२० रोजी अधिकचे ३ लाख ३१ हजार ८६० रुपये, ३ जून २०२२ रोजी ३ लाख ३१ हजार ८६० रुपये, ३ मे २०२४ रोजी ३ लाख ३१ हजार ८६० रुपये आणि २५ ऑक्टोबर २०२४ रोजी २ लाख ८४ हजार ५५६ रुपये असे एकूण १२ लाख ८० हजार १३६ रुपये एरिअसची अधिकची रक्कम कार्यालयातील लिपिक वीरेंद्र सुतवणे याने स्वतःच्या वैयक्तिक खात्यावर वळती करून शासनाची आर्थिक फसवणूक केली.

हे सुद्धा वाचा  : माजी उपमुख्यमंत्री बांदल यांच्यावरील हल्लाप्रकरणी मोठी अपडेट; आरोपीबाबत धक्कादायक माहिती समोर

रक्कम केली वळती

या प्रकरणात उपसंचालक आरोग्यसेवा छत्रपती संभाजीनगर यांनी त्रिस्तरीय चौकशी समिती स्थापन करून चौकशी केली असता या चौकशीत सुद्धा कनिष्ठ लिपिक वीरेंद्र सुतवणे यांनी वैयक्तिक लाभासाठी चारवेळा शासनाची अधिकची रक्कम स्वतःच्या वैयक्तिक खात्यावर वळती करून आहरण व संवितरण अधिकारी डॉ. विद्या सरपे (कुलदिपक) व विद्यमान आहरण संवितरण अधिकारी डॉ. पंढरीनाथ लक्कमवार यांनी कर्तव्यात कसूर व हलगर्जीपणा केल्याचे निष्पन्न झाले. शासनाचे तब्बल १२ लाख ८० हजार १३६ रुपयांची आर्थिक फसवणूक केल्याप्रकरणी त्या तिघांविरुद्ध नवा मोंढा पोलिसात भारतीय न्याय संहिता कायद्याच्या कलम ३१६ (५), ३४४, ३१८, २३६(३) आणि ३(५) अन्वये गुन्हा दाखल करण्यात आला आहे. पुढील तपास नवा मोंढा पोलिसांचे पोलीस निरीक्षक कमल शिंदे करीत आहेत.