व्यवसायासाठी पैसे न दिल्याने चुलतीवर चाकूने हल्ला; खडक पोलिसांनी दोघांना ठोकल्या बेड्या

व्यवसायासाठी एक लाख रुपये देण्यास नकार दिल्याच्या रागातून चुलतीच्या घरात घुसून तिच्यावर चाकूने वार करून गंभीर जखमी केल्याचा प्रकार समोर आला आहे.

पुणे : राज्यात गुन्हेगारी वाढली असून, अशातच आता पुण्यातून एक मोठी बातमी समोर आली आहे. व्यवसायासाठी एक लाख रुपये देण्यास नकार दिल्याच्या रागातून चुलतीच्या घरात घुसून तिच्यावर चाकूने वार करून गंभीर जखमी केल्याचा प्रकार समोर आला आहे. तसेच, त्यांच्या कानातील सोन्याचे वेल जबरदस्तीने हिसकावून नेण्यात आले आहे. याप्रकरणी खडक पोलिसांनी दोघांना अटक केली आहे.

जखमी महिलेचे नाव गुणवंती सुरेश सुराणा (वय ६६) असे आहे. त्यांनी खडक पोलिसांत तक्रार दिली आहे. त्यानुसार त्यांचा पुतण्या दिनेश जुगराज सुराणा (वय ५८) आणि फर्मान मन्सूर पारकर (वय २८) यांच्यावर गुन्हा दाखल करण्यात आला असून, दोघांनाही अटक करण्यात आली आहे. ही घटना १५ ऑगस्ट रोजी दुपारी साडेतीनच्या सुमारास एकबोटे कॉलनी परिसरात घडली आहे.

पोलिसांच्या माहितीनुसार, दिनेश सुराणा फिर्यादी यांचा पुतण्या आहे. तो तक्रारदार गुणवंती सुराणा यांच्या घरी आला होता. त्याने व्यवसायासाठी त्यांच्याकडे एक लाख रुपयांची मागणी केली. मात्र, सुराणा यांनी पैसे नसल्याचे सांगत पैसे देण्यास नकार दिला. याचा राग आल्याने दिनेश याने खिशातून चाकू काढून त्यांच्या डाव्या हाताच्या मनगटावर तसेच गळ्यावर वार केले. या हल्ल्यात त्या गंभीर जखमी झाल्या. त्याचवेळी दिनेशसोबत असलेल्या फर्मान पारकर याने त्यांच्या डाव्या कानातील सुमारे ५५ हजार रुपये किमतीचे सोन्याचे वेल जबरदस्तीने हिसकावून घेतले. यावेळी त्यांच्या कानालाही दुखापत झाली. या प्रकरणी खडक पोलिसांनी दोन्ही आरोपींना अटक केली असून, पुढील तपास सहाय्यक पोलिस निरीक्षक अमोल वळसंग करीत आहेत.

हे सुद्धा वाचा  : महिलेच्या कपाळावर चाकूने वार, चौघांवर गुन्हा दाखल; नेमकं काय घडलं?

दारू पिण्यासाठी पैसे न दिल्याचा राग अनावर

पुण्यातून एक मोठी बातमी समोर आली आहे. दारू पिण्यास पैसे न दिल्याने तरुणाच्या डोक्यात दगड घातल्याची घटना गुलटेकडीतील डायसप्लॉट परिसरात घडली आहे. यामुळे परिसरात तणावाचे वातावरण निर्माण झाले होते. दरम्यान खुनाचा प्रयत्न केल्याप्रकरणी पोलिसांनी एकाला अटक केली. राजू शिवलिंगप्पा इककळकी (वय ३०, रा. डायसप्लाॅट, गुलटेकडी) असे गंभीर जखमी झालेल्याचे नाव आहे. याप्रकरणी प्रेम संजय काळे (वय २८, रा. डायसप्लाॅट, गुलटेकडी) याला अटक करण्यात आली आहे. याबाबत इककळकी याची आई लक्ष्मीबाई (वय ५८) यांनी स्वारगेट पोलिस ठाण्यात तक्रार दिली आहे.