घरातून बाहेर पडले अन् परतलेच नाहीत! कळंब तालुक्यात दोन तरुणांच्या अपहरणाने खळबळ

कळंब तालुक्यातील दोन वेगवेगळ्या गावांमधून दोन तरुणांचे अज्ञात व्यक्तींनी अपहरण केल्याच्या धक्कादायक घटना उघडकीस आल्या आहेत. डिकसळ येथील ३२ वर्षीय तरुण आणि देवधानोरा येथील २९ वर्षीय तरुण बेपत्ता झाला आहे.

• घरातून बाहेर पडले अन् परतलेच नाहीत
• कळंब तालुक्यात दोन तरुणांच्या अपहरणाने खळबळ
• डांबून ठेवण्यासाठी पळवून नेल्याचा संशय

कळंब : कळंब तालुक्यातील दोन वेगवेगळ्या गावांमधून दोन तरुणांचे अज्ञात व्यक्तींनी अपहरण केल्याच्या धक्कादायक घटना उघडकीस आल्या आहेत. डिकसळ येथील ३२ वर्षीय तरुण आणि देवधानोरा येथील २९ वर्षीय तरुण बेपत्ता झाला असून, दोघांनाही अज्ञात कारणासाठी डांबून ठेवण्याच्या उद्देशाने पळवून नेल्याचा संशय कुटुंबीयांनी व्यक्त केला आहे. या दोन्ही प्रकरणांत कळंब आणि शिराढोण पोलीस ठाण्यात अपहरणाचे स्वतंत्र गुन्हे दाखल करण्यात आले आहेत.

 

कळंब तालुक्यातील डिकसळ येथील एकतानगर भागातील रहिवासी संदीप बाबुराव फकीर (वय ३२) हा तरुण ४ नोव्हेंबर रोजी रात्री १० वाजेच्या सुमारास ‘हैदराबाद येथे फिरायला जातो,’ असे सांगून घरातून बाहेर पडला होता. मात्र, तो परत न आल्याने तसेच त्याच्याशी संपर्क न झाल्याने कुटुंबीयांची चिंता वाढली आहे.

हे सुद्धा वाचा : अतुल बोऱ्हाडे आत्महत्या प्रकरणाला गंभीर वळण; पत्नीच्या फिर्यादीवरून आठ जणांवर गुन्हा दाखल

देवधानोरा येथून २९ वर्षीय तरुण बेपत्ता

दुसऱ्या घटनेत, कळंब तालुक्यातील देवधानोरा येथील रहिवासी अमोल मनोहर काळे (वय २९) हा तरुण ७ नोव्हेंबर रोजी सकाळी ९ वाजेच्या सुमारास गावातून अचानक बेपत्ता झाला. सर्वत्र शोध घेऊनही त्याचा पत्ता न लागल्याने, कोणीतरी अज्ञात व्यक्तीने अज्ञात कारणासाठी त्याला डांबून ठेवण्याच्या उद्देशाने गुप्तपणे पळवून नेल्याचा संशय व्यक्त करण्यात आला आहे. याप्रकरणी मनोहर मलाप्पा काळे (वय ५५, रा. देवधानोरा) यांनी १२ नोव्हेंबर रोजी शिराढोण पोलीस ठाण्यात फिर्याद दिली. त्यांच्या तक्रारीवरून शिराढोण पोलिसांनी अज्ञात व्यक्तीविरुद्ध भारतीय न्याय संहिता (BNS) कलम १४० (३) अन्वये अपहरणाचा गुन्हा दाखल केला आहे. एकाच तालुक्यात दोन तरुणांच्या अपहरणाचे गुन्हे दाखल झाल्याने खळबळ उडाली असून, कळंब व शिराढोण पोलीस दोन्ही तरुणांचा कसून शोध घेत आहेत.

हे सुद्धा वाचा : मोर्शी नगर परिषदेच्या छतावरील पार्टी चर्चेत, अधिकारी-कर्मचारी सहभागी असल्याची चर्चा; व्हायरल व्हिडीओने खळबळ

घरफोडीचा तपास करताना पोलिसांवर जीवघेणा हल्ला

घरफोडीच्या गुन्ह्याचा तपास करण्यासाठी शहरात आलेल्या फुलंब्री पोलिसांच्या तपास पथकावर चौघांनी हल्ला चढविल्याची घटना ११ नोव्हेंबर रोजी सायंकाळी ६.३० वाजेच्या सुमारास मिसारवाडीतील अण्णाभाऊ साठे चौकाजवळ घडली आहे. पोलिसांनी ओळखपत्र दाखवूनही हल्लेखोरांनी एका कर्मचाऱ्याच्या डोक्यात दगड घालून त्याला गंभीर जखमी केले आहे. तसेच अन्य दोन कर्मचाऱ्यांना लाथाबुक्क्यांनी मारहाण करून कारची चावी हिसकावून घेतली आहे. या घटनेने परिसरात खळबळ उडाली आहे. रवि मिसाळ, यश मिसाळ आणि त्यांचे दोन साथीदार अशी पोलिस पथकावर हल्ला चढविणाऱ्यांची नावे असून त्यांच्याविरोधात एमआयडीसी सिडको पोलिस ठाण्यात गुन्हा दाखल करण्यात आला आहे.