महावितरणच्या कर्मचाऱ्याला बुक्क्यांनी मारहाण, परतूर येथील घटनेनं खळबळ; तिघांविरोधात गुन्हा दाखल

कर्तव्य बजावत असताना एका महावितरणच्या कर्मचाऱ्याला तिघांनी मारहाण केल्याची घटना परतूर शहरात घडली आहे. याप्रकरणी परतूर पोलिस ठाण्यात तीन अज्ञात व्यक्तींविरोधात अदखलपात्र गुन्हा नोंदवण्यात आला आहे. 

परतूर : राज्यासह देशभरात गुन्हेगारी वाढली असून, दररोज वेगवेगळ्या भागात मारहाणीच्या घटना घडत आहेत. वाढत्या गुन्हेगारीमुळे नागरिकांमध्ये भिती निर्माण होत आहे. अशातच आता कर्तव्य बजावत असताना एका महावितरणच्या कर्मचाऱ्याला तिघांनी मारहाण केल्याची घटना परतूर शहरात घडली आहे. याप्रकरणी परतूर पोलिस ठाण्यात तीन अज्ञात व्यक्तींविरोधात अदखलपात्र गुन्हा नोंदवण्यात आला आहे.

 

पोलिसांत दिलेल्या तक्रारीनुसार, संभाजी प्रल्हाद शिंदे (वय ४१ वर्षे, रा. विठ्ठल रुखमाई मंदिर, परतूर) हे महावितरण कार्यालय परतूर येथे गेल्या सहा वर्षांपासून वरिष्ठ तंत्रज्ञ म्हणून कार्यरत आहेत. दिनांक १४ सप्टेंबर रोजी रात्री १०:३० वाजेच्या सुमारास मोंढा भागातून श्री गणेशाची स्थापना मिरवणूक जात होती. या मिरवणुकीदरम्यान सुरक्षिततेच्या कारणास्तव व कोणताही अपघात घडू नये म्हणून वरिष्ठांच्या परवानगी व आदेशानुसार मोंढा भागातील वीजपुरवठा २० मिनिटांसाठी बंद करण्यात आला होता. या दरम्यान संभाजी शिंदे हे मोंढा भागातील ट्रान्सफॉर्मरजवळ कर्तव्यावर उभे होते.

मिरवणूक पुढे निघून गेल्यानंतर रात्री १०:३० च्या सुमारास अचानक तीन अनोळखी व्यक्ती त्यांच्याजवळ आल्या. त्यांनी अंधाराचा गैरफायदा घेत शिंदे यांना शिवीगाळ करत चापट आणि बुक्क्यांनी मारहाण केली आणि घटनास्थळावरून पळ काढला. या घटनेनंतर संभाजी शिंदे यांनी परतूर पोलिस ठाण्यात धाव घेऊन रीतसर फिर्याद नोंदवली आहे.

हे सुद्धा वाचा  : दिल्ली हादरली! ५० वर्षीय महिलेकडे २०० कोटींची खंडणी; परदेशात बसलेल्या गुंडांना टार्गेटची माहिती मिळते तरी कशी?

जामखेड तालुक्यात भरदिवसा रक्तरंजित थरार!

खर्डा येथील जातेगाव फाट्‌याजवळ शुक्रवारी (दि. ११) सकाळी सव्वानऊच्या सुमारास दूध वाहतूक करणाऱ्या चालकावर कोयत्याने प्राणघातक हल्ला करण्यात आल्याचा प्रकार समोर आला आहे. यात गंभीर जखमी झालेल्या चालकाचा उपचारासाठी नेत असताना मृत्यू झाला आहे. भरदिवसा घडलेल्या खुनामुळे परिसरात खळबळ उडाली आहे. तानाजी भास्कर बोराटे (वय ४०, रा. माळेवाडी, ता. भूम) असे मृत व्यक्तीचे नाव आहे. बोराटे हे माळेवाडी येथील कैलास धर्मा आल्हाट यांच्या पिकअपवर (एमएच १२ केपी ५६२६) चालक होते. ते रोज संकलित दूध घेऊन खर्डा येथे येत होते. शुक्रवारी ते नेहमीप्रमाणे दूध घेऊन आले होते. काही अनोळखी व्यक्तींनी त्यांना जातेगाव फाट्याजवळ बोलावून घेतल्याची माहिती आहे. जातेगाव फाट्याजवळ बोराटे आणि संशयितांत काही कारणावरून वाद झाल्याचे समोर आली आहे. बोराटे यांना मारहाण करताना एकाने त्यांच्या मानेवर कोयत्याने वार केल्याने बोराटे रक्ताच्या थारोळ्यात कोसळले.