पुणे महापालिकेच्या भवनात महिला उपायुक्तांना शिवीगाळ, नेमकं काय घडलं?

पुणे महानगरपालिकेच्या शिवाजीनगर येथील मुख्य इमारतीत (मनपा भवन) महिलेने महिला उपायुक्तांच्या दालनात घुसून त्यांना शिवीगाळ केल्याची खळबळजनक घटना बुधवारी (दि .८) दुपारी घडली आहे.

पुणे : पुणे महानगरपालिकेच्या शिवाजीनगर येथील मुख्य इमारतीत (मनपा भवन) महिलेने महिला उपायुक्तांच्या दालनात घुसून त्यांना शिवीगाळ केल्याची खळबळजनक घटना बुधवारी (दि .८) दुपारी घडली आहे. यामुळे महापालिकेत चांगलाच गोंधळ उडाला होता. तर, काही काळ तणावाचे वातावरण निर्माण झाले होते. याप्रकरणी शिवाजीनगर पोलिस ठाण्यात कविता पटेकर (रा. मांगडेवाडी, कात्रज) हिच्यावर गुन्हा दाखल करण्यात आला आहे. याबाबत महापालिका कर्मचारी राकेश विटकर (५३) यांनी तक्रार दिली आहे. बुधवारी दुपारी दीडच्या सुमारास ही घटना घडली आहे.

 

मिळालेल्या माहितीनुसार, पुणे महानगरपालिकेच्या सांस्कृतिक, क्रीडा व सुरक्षा विभागाच्या उपायुक्त आशा राऊत आपल्या दालनात शासकीय कामकाज पाहत होत्या. यावेळी आरोपी महिला पटेकर हिने कोणत्याही पूर्वपरवानगीशिवाय राऊत यांच्या दालनात प्रवेश केला. दालनात शिरल्यानंतर आरोपी महिलेने उपायुक्तांना अर्वाच्य भाषेत शिवीगाळ सुरु केली. मोठ्या आवाजात आरडाओरडा आणि अरेरावीची भाषा वापरत तिने कार्यालयातील शासकीय कामकाजात अडथळा निर्माण केला.

अचानक झालेल्या या गोंधळामुळे विभागातील इतर कर्मचाऱ्यांचीही धावपळ उडाली आणि काही काळ कार्यालयीन कामकाज पूर्ण ठप्प झाले. गोंधळ सुरू असतानाच, आरोपी महिलेने आपल्या मोबाईलवर या संपूर्ण घटनेचा व्हिडिओ चित्रीत केला. व्हिडिओ सोशल मीडियावर प्रसारित करून महिला अधिकाऱ्याची आणि पालिकेची बदनामी करण्याचा प्रयत्न केल्याचा ठपकाही तिच्यावर ठेवला आहे. घटनेची माहिती मिळताच शिवाजीनगर पोलिस ठाण्याचे पोलिस निरीक्षक गिरीशकुमार दिघावकर यांनी घटनास्थळी भेट दिली. शिवाजीनगर पोलिस पुढील तपास करीत आहेत.

हे सुद्धा वाचा : वाघोली पोलीस ठाण्यातील तीन पोलिसांचे तडकाफडकी निलंबन; धक्कादायक कारणही समोर

आईनेच प्रियकराच्या मदतीने 6 वर्षांच्या मुलाला संपवलं

आई आणि तिच्या प्रियकराने संगनमत करून सहा वर्षांच्या निष्पाप बालकाची निर्घृण हत्या केल्याची धक्कादायक घटना समोर आली आहे. मुलाचा खून केल्यानंतर त्याचा मृत्यू हृदयविकाराच्या धक्क्याने झाला असल्याचे महिलेने नातेवाईकांना भासवले. ही घटना ४ एप्रिल रोजी रात्री ११.३० वाजण्याच्या सुमारास कुरुळी, ता. खेड येथील एका भाड्याच्या खोलीत घडली आहे. अवेज मेहबूब शेख (वय ६ वर्ष) असे खून झालेल्या मुलाचे नाव आहे. या प्रकरणात इसाक महमद शेख (४९, पुस, ता. आंबेजोगाई, जि. बीड) यांनी फिर्याद दिली आहे. पोलिसांनी बसरीन मेहबुब शेख (२७, कुरुळी, ता. खेड, जि. पुणे, मूळ – धर्मापुरी, ता. परळी, जि. बीड) हिला अटक केली असून, तिचा प्रियकर राम विनायक कजेवाड (कुरुळी, ता. खेड, मूळ – पुस, ता. आंबेजोगाई, जि. बीड) याच्यावर गुन्हा दाखल केला आहे.