फ्लॅट देण्याच्या बहाण्याने एकाची फसवणूक; तब्बल लाखो रुपयांना घातला गंडा

फ्लॅट देण्याच्या बहाण्याने विश्वास संपादन करून ३२ लाख रुपये घेऊन तोच फ्लॅट दुसऱ्या व्यक्तीला विक्री केला. नंतर ३२ पैकी २० लाख रुपये परत देऊन उर्वरित १२ लाख रुपये परत न देता फसवणूक केल्याचा प्रकार समोर आला आहे.

पुणे : राज्यासह देशभरात फसवणुकीच्या घटनांमध्ये मोठी वाढ झाली आहे. दररोज सायबर चोरटे नागरिकांच्या लाखो रुपयांवर डल्ला मारत आहेत. अशातच आता पुण्यातून एक मोठी घटना समोर आली आहे. फ्लॅट देण्याच्या बहाण्याने विश्वास संपादन करून ३२ लाख रुपये घेऊन तोच फ्लॅट दुसऱ्या व्यक्तीला विक्री केला. नंतर ३२ पैकी २० लाख रुपये परत देऊन उर्वरित १२ लाख रुपये परत न देता फसवणूक केल्याचा प्रकार समोर आला आहे. याप्रकरणी वारजे माळवाडी पोलिस ठाण्यात ४४ वर्षीय व्यक्तीने तक्रार दिली आहे. त्यानूसार, रविंद्र सखाराम तागुंदे (रा. वारजे) व कैलास दत्तात्रय भुंडे (रा. बावधन) असे गुन्हा दाखल करण्यात आलेल्याची नावे आहेत.

पोलिसांच्या माहितीनुसार, तक्रारदार यांना फ्लॅट घ्यायचा होता. दरम्यान, त्यांची आरोपींसोबत भेट झाली होती. त्यांनी तक्रारदारांना फ्लॅट देण्याची बतावणी केली. त्यांचा विश्वास संपादन केला. नंतर फ्लॅटसाठी म्हणून त्यांच्याकडून ३२ लाख ३२ हजार ६७२ रुपये घेतले. पण, मध्येच तक्रारदार यांना दिलेला फ्लॅट त्यांच्या परस्पर दुसऱ्याच व्यक्तीला विक्री करून त्यांची फसवणूक केली. यानंतर तक्रारदारांनी त्यांना पैसे परत करणे गरजेचे असताना त्यांना केवळ २० लाख रुपये दिले. मात्र, उर्वरित १२ लाख ३२ हजार ६७२ रुपये परत न देता त्यांची फसवणूक केली आहे. अधिक तपास पोलिस करत आहेत.

हे सुद्धा वाचा : ‘डिजिटल अरेस्ट’च्या भीतीने २५ लाखांना गंडा; तिघांविरुद्ध गुन्हा दाखल

पुणे शहरात सायबर चोरट्यांचा सुळसुळाट

पुण्यात सायबर चोरट्यांचा सुळसुळाट वाढत असून गेल्या काही दिवसाखाली दोन वेगवेगळ्या प्रकरणांत नागरिकांची लाखो रुपयांची फसवणूक झाल्याचे उघडकीस आले आहे. कारवाईची भीती दाखवून एका तरुणाकडून ४ लाख ८१ हजार रुपये उकळल्याची घटना समोर आली आहे. तर शेअर बाजारात गुंतवणुकीच्या आमिषाने ज्येष्ठ नागरिकाची १७ लाख रुपयांची फसवणूक करण्यात आली आहे. या दोन्ही प्रकरणांत संबंधित पोलीस ठाण्यांमध्ये गुन्हे दाखल करण्यात आले आहेत.