आमिष दाखवत सायबर चोरट्यांकडून फसवणूक; तब्बल सव्वा कोटींचा घातला गंडा

आमिषे दाखवून सायबर चोरटे नागरिकांची फसवणूक करत आहेत. चोरट्यांनी वेगवेगळ्या घटनेत नागरिकांची एक कोटी २६ लाख रुपयांची फसवणूक केल्याचा प्रकार उघडकीस आला आहे.

पुणे : पोलीस, सीबीआय कारवाईची भीती दाखविणे, तसेच घरातून कामाची संधी अशा प्रकारची आमिषे दाखवून सायबर चोरटे नागरिकांची फसवणूक करत आहेत. चोरट्यांनी वेगवेगळ्या घटनेत नागरिकांची एक कोटी २६ लाख रुपयांची फसवणूक केल्याचा प्रकार उघडकीस आला आहे.

कोथरुड भागातील एका महिलेची घरातून ऑनलाइन पद्धतीने कामाची संधी (ऑनलाइन टास्क) असे आमिष दाखवून चोरट्यांनी चार लाख ३२ हजार रुपयांची फसवणूक करण्यात आल्याचा प्रकार उघडकीस आला. सुरुवातीला महिलेला चोरट्यांनी परतावा दिला. परतावा मिळाल्यानंतर आणखी रक्कम गुंतविली. फसवणूक झाल्याचे उघडकीस आल्यानंतर महिलेने कोथरुड पोलीस ठाण्यात तक्रार दिली.

वाघोली भागातील एका तरुणाला अटक करण्याची भीती दाखवून चोरट्यांनी त्याच्याकडून ४१ लाख ४० हजार रुपये उकळले. एका प्रकरणात पोलिसांकडून कारवाई करण्यात येणार आहे. त्वरीत पैसे दिल्यास कारवाईला सामाेरे जावे लागेल, अशी भीती दाखवून चोरट्यांनी तरुणाची फसवणूक केली. याबाबत तरुणाने वाघोली (लोणीकंद) पोलीस ठाण्यात फिर्याद दिली. परदेशी चलन व्यवहारात (फाॅरेक्स ट्रेडिंग) गुंतवणुकीच्या आमिषाने वाघोलीतील एका तरुणाची ३३ लाख ७८ हजार ३२० रुपयांची फसवणूक केली. याबाबत तरुणाने वाघोली पोलीस ठाण्यात फिर्याद दिली.

हे सुद्धा वाचा : पुण्यात चाललंय काय? व्हाट्सअ‍ॅपवर डीपी ठेवल्याने तरुणावर कोयत्याने सपासप वार

वर्षभरानंतर गुन्हा दाखल

शेअर बाजारात गुंतवणुकीच्या आमिषाने हडपसर परिसरातील एकाची सायबर चोरट्यांनी ४९ लाख ५५ हजार रुपयांची फसवणूक केली. हा प्रकार २१ डिसेंबर २०२३ ते फेब्रुवारी २०२४ या कालावधीत घडला होता. चोरट्यांनी शेअर बाजारात गुंतवणूक केल्यास चांगला परतावा मिळेल, असे आमिष दाखवून तक्रारदाराला पैसे भरण्यास सांगितले. सुरुवातीला त्याला परतावा दिला. त्यानंतर तक्रारदाराने आणखी रक्कम चोरट्यांच्या बँक खात्यात जमा केली. पैसे जमा केल्यानंतर परतावा दिला नाही. फसवणूक झाल्याचे लक्षात आल्यानंतर त्यांनी पोलिसांकडे तक्रार दिली.

पुण्यात फसवणूकीचे प्रमाण वाढले

पुण्यात फसवणूकीचे प्रमाण मोठ्या प्रमाणात वाढले आहे. दरम्यान गेल्या काही दिवसाखाली व्यवसायासाठी चार कोटी रुपयांचे कर्ज मिळवून देण्याच्या आमिषाने एकाची ७ लाख रुपयांची फसवणूक केल्याचा प्रकार उघडकीस आला आहे. याप्रकरणी समर्थ पोलिसांनी तन्मय रमेश जाधव (रा. ओैंदुबर दर्शन सोसायटी, फातिमानगर, वानवडी) याच्यावर गुन्हा दाखल केला आहे. याबाबत समर्थ पोलीस ठाण्यात ६१ वर्षीय व्यक्तीने तक्रार दिली आहे. पोलिसांच्या माहितीनुसार, तक्रारदार व्यावसायिक आहेत. त्यांची एका परिचितामार्फत तन्मय जाधवशी ओळख झाली होती.

तक्रारदाराला व्यवसायासाठी चार कोटी रुपयांचे कर्ज हवे होते. जाधवने व्यंकटेश्वरा एंटरप्रायजेस या खासगी वित्तीय संस्थेतून १५ दिवसात चार कोटी रुपयांचे कर्ज मिळवून देतो, असे आमिष दाखविले. त्यानंतर तक्रारदारांना त्याने रास्ता पेठेतील एका हॉटेलमध्ये बोलावून घेतले. तेथे त्यांच्याबरोबर मुद्रांकावर करारनामा केला. कर्ज मंजुरीसाठी त्यांच्याकडून वेळोवेळी ६ लाख ८७ हजार रुपये जाधवने घेतले. मात्र, त्यांना कर्ज दिले नाही. याबाबत व्यावसायिकाने त्याच्याकडे विचारणा केली. तेव्हा त्याने टाळाटाळ केली. फसवणूक झाल्याचे लक्षात आल्यानंतर त्यांनी पोलिसांकडे तक्रार दिली. पोलीस उपनिरीक्षक जे. आर. फडतरे तपास करत आहेत.