Accident News: रूमचा शोध ठरला अखेरचा प्रवास; दौलताबाद घाटातील बस-दुचाकी अपघातात तरुणाचा मृत्यू

रूम पाहण्यासाठी छत्रपती संभाजीनगरात आलेल्या दोन मित्रांचा परतीचा प्रवास काळ ठरला. दौलताबाद घाटात बस आणि स्पोर्ट्स बाईकची भीषण धडक होऊन ३० वर्षीय अक्षय दवंगे याचा उपचारादरम्यान मृत्यू झाला, तर त्याचा मित्र गंभीर जखमी झाला.

• दौलताबाद घाटात बस-दुचाकीची समोरासमोर धडक
• रूम पाहून गावाकडे परतताना अपघात
• घाटी रुग्णालयात उपचार सुरू

छत्रपती संभाजीनगर : भाड्याने रूम पाहण्यासाठी छत्रपती संभाजीनगरात आलेल्या दोन मित्रांचा परतीचा प्रवास दुर्दैवी ठरला. दौलताबाद घाटातील मलिक हॉटेलसमोर बस आणि स्पोर्ट्स बाईकची समोरासमोर जोरदार धडक होऊन झालेल्या भीषण अपघातात ३० वर्षीय तरुणाचा उपचारादरम्यान मृत्यू झाला. अक्षय साहेबराव दवंगे (३०, रा. मनूर, ता. वैजापूर) असे मृत तरुणाचे नाव आहे. त्याचा मित्र अक्षय कारभारी बोडखे (३३) गंभीर जखमी झाला असून, त्याच्यावर घाटी रुग्णालयात उपचार सुरू आहेत. रविवारी दुपारी साडेतीनच्या सुमारास हा अपघात झाला. पोलिसांनी दिलेल्या माहितीनुसार, अक्षय दवंगे आणि अक्षय बोडखे हे दोघेही मनूर येथील रहिवासी आहेत. अक्षय दवंगे एका कंपनीत कामाला असून, काही दिवसांपासून तो सुटीवर होता. पुन्हा कंपनीत रुजू होण्यासाठी त्याने छत्रपती संभाजीनगर परिसरात भाड्याने रूम शोधण्यास सुरुवात केली होती. त्यासाठी रविवारी दोघे मित्र दुचाकीवरून वाळूज-गंगापूर एमआयडीसी परिसरात आले होते. रूम पाहिल्यानंतर दोघेही दुचाकीवरून गावाकडे मनूरच्या दिशेने परत निघाले. दौलताबाद-खुलताबाद मार्गावरील मलिक हॉटेलसमोर आल्यानंतर त्यांच्या स्पोर्ट्स बाईकची समोरून येणाऱ्या बसशी जोरदार धडक झाली. धुळे येथून छत्रपती संभाजीनगरकडे जाणारी बस (एमएच २० बीसी ३४३१) दौलताबाद घाटातून खाली येत होती. बसमध्ये सुमारे ५० ते ५५ प्रवासी असल्याची माहिती आहे. घाटातील वळणावर बस आणि दुचाकीची धडक झाल्याने दोन्ही दुचाकीस्वार गंभीर जखमी झाले.

हेही वाचा: Dhule Crime: जुन्या वादातून दोन गटांत धुमश्चक्री; धारदार शस्त्रांनी हाणामारी, गोळीबाराने नागरिकांमध्ये दहशत

रुग्णालयात उपचारादरम्यान मृत्यू

अपघाताची माहिती मिळताच दौलताबाद पोलिस ठाण्याचे पोलिस उपनिरीक्षक अशोक सोनवणे, दीपक मते यांच्यासह पोलिस कर्मचारी घटनास्थळी दाखल झाले. जखमींना तातडीने रुग्णालयात हलविण्यात आले. यासाठी १०८ रुग्णवाहिकेसह नरेंद्र महाराज संस्थानच्या रुग्णवाहिकेचीही मदत घेण्यात आली. दोन्ही जखमींना घाटी रुग्णालयात दाखल करण्यात आले. अक्षय दवंगे याच्यावर उपचार सुरू असताना त्याचा मृत्यू झाला. अक्षय बोडखे याच्यावर सध्या घाटी रुग्णालयात उपचार सुरू आहेत. त्याची प्रकृती गंभीर असल्याची माहिती आहे.

हेही वाचा: Pune Crime: पुण्यात बिग बॉस फेम रीलस्टारला अटक; डॉक्टरांच्या घरात घुसून मारहाण, ५ लाखांची मागणी

कामावर रुजू होण्यासाठी रूमचा शोध

अक्षय दवंगे काही दिवसांपासून कंपनीच्या कामातून सुटीवर होता. पुन्हा कामावर रुजू होण्यासाठी त्याला छत्रपती संभाजीनगर परिसरात राहण्याची व्यवस्था करायची होती. त्यासाठी तो मित्र अक्षय बोडखे याच्यासोबत रूम पाहण्यासाठी शहरात आला होता. रूम पाहून गावी परतताना दौलताबाद घाटात त्यांच्यावर काळाने घाला घातला. दोन्ही तरुण अविवाहित होते. या दुर्दैवी घटनेमुळे मनूर परिसरात हळहळ व्यक्त होत आहे. अपघात नेमका कशामुळे झाला, याचा पुढील तपास दौलताबाद पोलिसांकडून सुरू आहे.