Crime News: गणपती दर्शनाला मित्र-मैत्रिणींसोबत गेल्याच्या संशयातून पतीचा पत्नीवर चाकूने हल्ला
डोंबिवली: घटस्फोटाची प्रक्रिया न्यायालयात सुरू असतानाच पत्नीवर चाकूने जीवघेणा हल्ला केल्याची धक्कादायक घटना डोंबिवलीतील विष्णूनगर परिसरात घडली आहे. मित्र-मैत्रिणींसोबत गणपती बाप्पाच्या दर्शनासाठी गेल्याच्या कारणावरून पतीने पत्नीला मारहाण केली. त्यानंतर तिच्या छातीवर चाकूने वार केल्याची माहिती पोलिसांनी दिली आहे. या हल्ल्यात महिला गंभीर जखमी झाली असून तिच्यावर ठाणे सिव्हिल रुग्णालयात उपचार सुरू आहेत. आरोपी पती संतोष पेटेकर याला विष्णूनगर पोलिसांनी अटक केली आहे.
मिळालेल्या माहितीनुसार, २००९ मध्ये ज्योती यांचा संतोष पेटेकर यांच्यासोबत प्रेमविवाह झाला होता. मात्र, लग्नानंतर संतोष हा पत्नीवर संशय घेत असल्याचा आरोप आहे. या संशयातून दोघांमध्ये वारंवार वाद होत होते. पतीकडून होत असलेल्या सततच्या त्रासाला कंटाळून २०२० मध्ये ज्योती आपल्या चार मुलांसह पतीपासून वेगळ्या राहू लागल्या.
वेगळं राहिल्यानंतर ज्योती स्वतः कष्ट करून चारही मुलांचा सांभाळ करत होत्या. दरम्यान, पती-पत्नीमधील वादामुळे दोघे अधिकृतरित्या विभक्त होणार होते. त्यासाठी न्यायालयात घटस्फोटाची प्रक्रिया देखील सुरू होती. मात्र, या काळातही आरोपीकडून पत्नीला त्रास दिला जात असल्याची माहिती समोर आली आहे.
दरम्यान, ज्योती या मित्र-मैत्रिणींसोबत गणपती बाप्पाच्या दर्शनासाठी गेल्या होत्या. याचा राग मनात धरून संतोष त्यांच्या राहत्या घरी गेला. ‘मित्रांसोबत फिरायला का गेलीस?’ असा जाब विचारत त्याने पत्नीला मारहाण केली. त्यानंतर चाकूने तिच्या छातीवर वार केल्याची माहिती पोलीस निरीक्षक अभिजीत मोरे यांनी दिली.
हल्ल्यानंतर ज्योती गंभीर जखमी होऊन रक्ताच्या थारोळ्यात पडल्या. आईवर हल्ला होत असल्याचे पाहून चारही मुलांनी आरडाओरड केली. त्यांचा आवाज ऐकून आजी, मावशी, नातेवाईक आणि शेजाऱ्यांनी घटनास्थळी धाव घेतली. यावेळी आरोपीने ज्योती यांच्या बहिणीलाही मारहाण केल्याची माहिती आहे. जखमी ज्योती यांच्यावर ठाणे सिव्हिल रुग्णालयात उपचार सुरू असून त्यांची प्रकृती चिंताजनक असल्याची माहिती आहे. विष्णूनगर पोलिसांनी या प्रकरणी गुन्हा दाखल करून संतोष पेटेकरला अटक केली. आरोपीला कल्याण न्यायालयात हजर करण्यात आल्यानंतर न्यायालयाने त्याला दोन दिवसांची पोलीस कोठडी सुनावली आहे.
.png "Videos"){kind=small}
