Mumbai Crime News: मैदानात खेळत होता १२ वर्षीय मुलगा; मागून आले अन् मानेत इंजेक्शन टोचलं, घाटकोपरमध्ये खळबळ
मुंबई: मुंबईतील घाटकोपरच्या बर्वेनगर परिसरात शाळेसमोर मित्रांसोबत खेळणाऱ्या १२ वर्षीय विद्यार्थ्याच्या मानेत काही जणांनी कथितरीत्या नशेचे इंजेक्शन टोचल्याचा धक्कादायक प्रकार समोर आला आहे. यश चौरसिया असे विद्यार्थ्याचे नाव असून तो बर्वेनगर येथील महापालिकेच्या शाळा क्रमांक ३ मध्ये शिकतो. या घटनेनंतर परिसरात भीतीचे वातावरण निर्माण झाले आहे.
मिळालेल्या माहितीनुसार, यश शाळेसमोरील मैदानात मित्रांसोबत खेळत होता. या मैदानात सहा ते सात जण नशा करण्यासाठी बसत असल्याचे स्थानिकांकडून सांगण्यात येते. यश खेळत असताना याच गटातील काही जण मागून आले आणि त्यांनी त्याच्या मानेत इंजेक्शन टोचल्याचा आरोप आहे. या प्रकारानंतर काही वेळातच यशला चक्कर येऊ लागली. त्याला तापही आला आणि तो मैदानातच खाली बसला.
यशची प्रकृती अचानक बिघडल्याचे लक्षात आल्यानंतर स्थानिकांनी त्याच्या कुटुंबीयांना माहिती दिली. त्यानंतर कुटुंबीयांनी त्याला जवळच्या महापालिकेच्या मुक्ताबाई रुग्णालयात उपचारासाठी दाखल केले. सध्या त्याच्यावर वैद्यकीय उपचार सुरू असल्याची माहिती आहे. घटनेमुळे कुटुंबीयांमध्येही चिंता निर्माण झाली आहे.
घटनेची माहिती मिळाल्यानंतर पोलिसांनी तपास सुरू केला आहे. यशचा जबाब नोंदवण्याची प्रक्रिया सुरू असून, त्याच्या जबाबाच्या आधारे संबंधितांविरोधात गुन्हा दाखल करून पुढील कारवाई करण्यात येणार असल्याची माहिती आहे. शाळा आणि मैदानाच्या परिसरात नशेखोरांचा वावर होत असल्याच्या तक्रारी असल्यास त्याबाबतही तपास केला जाण्याची शक्यता आहे.
अल्पवयीन विद्यार्थी खेळत असलेल्या मैदानातच अशा प्रकारची घटना घडल्याने पालकांच्या सुरक्षेचा प्रश्न ऐरणीवर आला आहे. शाळा परिसर आणि सार्वजनिक मैदानांमध्ये नशा करणाऱ्यांवर कठोर कारवाई करावी, अशी मागणी स्थानिकांकडून होण्याची शक्यता आहे. दरम्यान, मुलाच्या मानेत नेमके कोणते इंजेक्शन टोचण्यात आले आणि हा प्रकार का करण्यात आला, याचा तपास पोलिसांकडून केला जात आहे.
.png "Videos"){kind=small}
