पाकिस्तानातून ड्रोनद्वारे हेरॉईन पंजाबमध्ये दाखल, पोलिसांकडून 9 कोटींचा मुद्देमाल जप्त
“नशा मुक्त भारत २०२८” या अभियानाच्या अनुषंगाने पंजाब राज्यातून ट्रक तसेच रेल्वे मार्गाने हेरॉईन व अफू यांसारख्या अमली पदार्थांची तस्करी करणाऱ्या टोळ्यांविरुद्ध नवी मुंबई पोलीस आयुक्तालयात आतापर्यंत ६ गुन्हे दाखल करण्यात आले असून एकूण ४० आरोपींना अटक करण्यात आली आहे. या कारवाईत आतापर्यंत एकूण सुमारे ६ कोटी रुपयांचा मुद्देमाल जप्त करण्यात आला आहे. या प्रकरणातील तपास तळोजा पोलीस ठाणे गुन्हा रजिस्टर क्रमांक ३८४/२०२५ एनडीपीएस अॅक्ट अंतर्गत सुरू असताना पहिला आरोपी बलजीत सिंह आणि त्याचा साथीदार गोपी हे दोघे पंजाबचे रहिवासी असून ते नवी मुंबई, मुंबई आणि पुणे परिसरात अमली पदार्थांची तस्करी करत असल्याचे निष्पन्न झाले. तसेच हे आरोपी मध्य प्रदेश मार्गे महाराष्ट्रात येत असल्याची माहिती पोलिसांना मिळाली.
मिळालेल्या माहितीच्या आधारे पोलिसांनी नाशिक येथे ट्रकचा पाठलाग करून पुणे जिल्ह्यातील चाकण एमआयडीसी , डिंगोजे गाव (पिंपरी-चिंचवड परिसर) येथे कारवाई केली. या कारवाईत १) बलजीतसिंग सतविंदर सिंग उर्फ मोनू, 2) गुरुप्रतापसिंग शरणजीत सिंग उर्फ गोपी, ३) ट्रक चालक करमजितसिंग नरिंदरसिंग, रा. अमृतसर, पंजाब या तिघांना पोलिसांनी ताब्यात घेतले. झडतीदरम्यान आरोपींकडून ८२.६ ग्रॅम उच्च प्रतीचे हेरॉईन (किंमत सुमारे ४९ लाख ३० हजार रुपये), ऑस्ट्रियन बनावटीचे ग्लॉक पिस्तूल (८ लाख रुपये), २ मॅगझिन, ४ जिवंत काडतुसे (२ लाख ५० हजार रुपये), ट्रेलर (५० लाख रुपये), तसेच ४ मोबाईल फोन व वजनकाटा असा एकूण १ कोटी ३ लाख रुपयांचा मुद्देमाल जप्त करण्यात आला. अटक करण्यात आलेल्या आरोपींना न्यायालयाने १८ तारखे पर्यंत पोलीस कोठडी सुनावली असून या प्रकरणाचा पुढील तपास सुरू आहे. ही कारवाई सहाय्यक पोलीस उपायुक्त (गुन्हे शाखा) धर्मपाल बनसोडे यांच्या मार्गदर्शनाखाली अमली पदार्थ विरोधी कक्षाचे वरिष्ठ पोलीस निरीक्षक संदीप निगडे, तसेच सहायक पोलीस निरीक्षक निलेश धुमाळ, पोलीस हवालदार तायडे, पोलीस शिपाई धांडे, पोलीस शिपाई पालवे आणि पोलीस शिपाई चव्हाण यांनी केली.
.png "Videos"){kind=small}
