Ganeshotsav 2026: अपघातात व्हिडिओ नको, मदतीचा हात द्या! ‘सानपाडाचा राजा’ मंडळाचा माणुसकीचा जागर

Ganeshotsav 2026: नवी मुंबईतील सानपाडा सेक्टर ८ येथील ‘सानपाडाचा राजा’ सार्वजनिक गणेशोत्सव मंडळाने यंदा ३२ वर्षे पूर्ण केली आहेत. मंडळाने ‘समुद्र मंथन’ या संकल्पनेवर आधारित प्लास्टिकमुक्त देखावा साकारला आहे. तसेच संकटात सापडलेल्या व्यक्तीला मदतीचा हात देत माणुसकी जपण्याचे आवाहन या देखाव्यातून करण्यात आले आहे.

• ‘माणसातील माणूस हरवलाय’
• अपघातात व्हिडिओ नको, मदतीचा हात द्या!
• सानपाडाच्या राजाचा ‘समुद्र मंथना’तून माणुसकी जपण्याचा संदेश

Ganeshotsav 2026: नवी मुंबईतील सानपाडा सेक्टर ८ येथील प्रसिद्ध ‘सानपाडाचा राजा’ सार्वजनिक गणेशोत्सव मंडळ यंदा 33 वर्ष साजरा करत आहे. १९९४ मध्ये स्थापन झालेल्या या मंडळाने यंदा पौराणिक ‘समुद्र मंथन’ संकल्पनेला आधुनिक सामाजिक वास्तवाची जोड देत माणुसकीचा संदेश देणारा देखावा साकारला आहे. विशेष म्हणजे देखाव्याच्या निर्मितीत प्लास्टिकचा वापर टाळून पर्यावरणपूरक गणेशोत्सवाचा संदेशही देण्यात आला आहे.

‘माणसातील माणूस हरवलाय’ हा यंदाच्या देखाव्याचा केंद्रबिंदू आहे. एखादा अपघात किंवा दुर्घटना घडल्यानंतर मदतीसाठी पुढे येण्याऐवजी मोबाईलमध्ये व्हिडिओ काढण्याची वाढती प्रवृत्ती, सोशल मीडियावर तो व्हिडोओ व्हायरल करण्याची घाई आणि गर्दीत असूनही संकटग्रस्ताला मदत न मिळणे, या मुद्द्यांकडे देखाव्यातून लक्ष वेधण्यात आले आहे.

Ganeshotsav 2026 : बाप्पाच्या विसर्जनसाठी घरी तयार करा ‘केसर मलाई मोदक’, ही आहे हलवाई स्टाईल रेसिपी

…मोबाईलचा कॅमेरा आधी पुढे

पूर्वी एखाद्या व्यक्तीवर संकट ओढवल्यानंतर आजूबाजूचे नागरिक मदतीसाठी धावून येत होते. मात्र, आज काही घटनांमध्ये मदतीच्या हातापेक्षा मोबाईलचा कॅमेरा आधी पुढे येताना दिसतो. या प्रवृत्तीचा उल्लेख देखाव्यात ‘कॅमेरा-मॅन कल्चर’ असा करण्यात आला आहे. तसेच मानसशास्त्रातील ‘बायस्टँडर इफेक्ट’ या संकल्पनेचीही माहिती देण्यात आली आहे. गर्दीत प्रत्येक व्यक्तीला दुसरे कोणीतरी मदत करेल असे वाटते आणि परिणामी प्रत्यक्ष मदतीसाठी कोणीही पुढे येत नाही, याकडे मंडळाने लक्ष वेधले आहे.

‘दुःख हे कंटेंट नाही, रक्त हे मनोरंजन नाही आणि माणसाचे आयुष्य व्ह्यूज आणि लाईक्सपेक्षा मोठे आहे,’ असा प्रभावी संदेश देखाव्यातून देण्यात आला आहे. अपघात दिसल्यानंतर व्हिडिओ काढण्यापेक्षा सर्वप्रथम आपत्कालीन यंत्रणेशी संपर्क साधावा आणि शक्य असेल तेवढी प्रत्यक्ष मदत करावी, असे आवाहन करण्यात आले आहे.

कलियुगाची ‘समुद्र मंथना’शी सांगड

मंडळाने पौराणिक समुद्र मंथनाची संकल्पना आजच्या समाजाशी जोडण्याचा प्रयत्न केला आहे. कलियुगातील समाज आणि मानवी मनाला ‘क्षीरसागर’, तर द्वेष, हिंसा, स्वार्थ, अहंकार आणि दुसऱ्याच्या संकटाचे व्हिडिओ काढण्याच्या प्रवृत्तीला मंथनातून बाहेर पडणाऱ्या ‘विषा’ची उपमा देण्यात आली आहे.

दुसरीकडे नामस्मरण, भक्ती, शांतता आणि माणुसकीला ‘अमृत’ मानण्यात आले आहे. रोजच्या जीवनातील तणाव, स्वार्थ आणि नकारात्मकतेवर मात करत माणुसकी जपण्याचा संदेश गणेशभक्तांपर्यंत पोहोचवण्याचा मंडळाचा प्रयत्न आहे.

गणरायाला दरवर्षी मोदक अर्पण करताना यंदा ‘आपले मोठे मन’ अर्पण करण्याचा संकल्प करूया, असे आवाहनही करण्यात आले आहे. अपघातग्रस्ताला मदत करणे, शेजाऱ्याची विचारपूस करणे, वृद्धांना आधार देणे, गरजू व्यक्तीच्या मदतीला धावणे आणि सोशल मीडियाचा वापर तमाशासाठी नव्हे तर सकारात्मक संदेश पसरवण्यासाठी करणे, या छोट्या कृतींमधून माणुसकी जिवंत ठेवता येईल, असा संदेश मंडळाने दिला आहे.

‘माणसातील माणूस हरवलेला नाही, त्याला फक्त जागे करण्याची गरज आहे,’ या संदेशासह यंदाचा ‘समुद्र मंथन’ देखावा श्रद्धा, सामाजिक जाणीव आणि पर्यावरणपूरकतेची सांगड घालणारा ठरत आहे.

श्रीगणेशाच्या कृपेसाठी गणेशयाग का करतात? जाणून घ्या महत्त्व आणि विधी