रविवार, 27 सप्टेंबर 2026
म्हसवडजवळ भीषण तिहेरी कार अपघात; एकाचा मृत्यू तर नऊजण जखमी
म्हसवड : वडजल (ता. माण) गावच्या हद्दीत वडजल-म्हसवड मार्गावर एच. पी. पेट्रोलपंपाच्या पुढे सुमारे ५०० मीटर अंतरावर शनिवारी (दि.२६) सकाळी ११.३० वाजण्याच्या सुमारास तीन कारचा भीषण अपघात झाला. या अपघातात संजय दिनकर पाटील (वय ४८, रा. वडगाव हवेली, ता. कराड; सध्या रा. पलूस, जि. सांगली) यांचा उपचारादरम्यान मृत्यू झाला असून, दोन्ही वाहनांमधील मिळून नऊ जण जखमी झाले आहेत.
पोलिसांनी दिलेल्या माहितीनुसार, संजय पाटील हे एमएच-१० एफए-०६२८ क्रमांकाची स्विफ्ट कार चालवत होते. त्यांनी रस्त्याच्या परिस्थितीकडे दुर्लक्ष करून भरधाव वेगाने वाहन चालवत तक्रारदार गणेश रामचंद्र जाधव यांच्या एमएच-१० बीएम-३७३५ क्रमांकाच्या इर्टिगा कारला ओव्हरटेक करून पुढे जात असताना समोरून येणाऱ्या एमएच-४२ एच-७१२१ क्रमांकाच्या स्विफ्ट डिझायर कारला जोरदार धडक दिली.
धडकेनंतर स्विफ्ट कार-इर्टिगा कारच्या समोरील भागावर जोराने आदळल्याने तिन्ही वाहनांचे मोठे नुकसान झाले. अपघातात स्विफ्ट कारमधील अर्चना संजय पाटील (वय ३६), हर्षद संजय पाटील (वय १७), अशोक आकाराम सूर्यवंशी (वय ५४), अरुणा अशोक सूर्यवंशी (वय ४३) आणि अंकिता अशोक सूर्यवंशी (वय २१) हे जखमी झाले.
तसेच स्विफ्ट डिझायर कारमधील गणेश केशव कांबळे (वय ३५), आकाश मोहन कांबळे, विद्या मोहन कांबळे आणि मीनल मोहन कांबळे (सर्व रा. म्हसवड/देवापूर परिसर) हेही जखमी झाले आहेत. जखमींवर म्हसवड येथील संचित हॉस्पिटलमध्ये उपचार करण्यात आले.
या प्रकरणी गणेश रामचंद्र जाधव यांच्या फिर्यादीवरून म्हसवड पोलीस ठाण्यात गु.र.नं. २७६/२०२६, भारतीय न्याय संहिता कलम १०६(१), २८१, १२५(अ)(ब), ३२४(४) तसेच मोटार वाहन कायदा कलम १८४ अन्वये गुन्हा दाखल करण्यात आला आहे. मात्र, गुन्ह्यातील आरोपी संजय पाटील यांचा अपघातानंतर उपचारादरम्यान मृत्यू झाला आहे.
घटनेचा पुढील तपास पोलीस हवालदार डी. पी. खाडे (ब.नं. ३७६) करत असून, म्हसवड पोलीस ठाण्याचे सहाय्यक पोलिस निरीक्षक पोमण यांच्या मार्गदर्शनाखाली तपास सुरू आहे. अपघातानंतर परिस्थिती नियंत्रणात असल्याचे पोलिसांनी सांगितले.
