Image
Mahabaleshwar Environment News: महाबळेश्वर हे पर्यावरणाच्या दृष्टीने अतिसंवेदनशील क्षेत्र म्हणून ओळखले जाते. त्यामुळे येथील नैसर्गिक संपदा, जैवविविधता आणि पर्यावरणाचे संरक्षण करण्यासाठी असलेल्या नियमांची काटेकोर अंमलबजावणी होणे आवश्यक आहे. मात्र, महाबळेश्वर नगरपरिषद हद्दीतील काही खासगी व व्यावसायिक मिळकतींभोवती १० ते १५ फुटांपर्यंत उंच पत्रे तसेच उंच वॉल कंपाउंड उभारण्यात आल्याचा आरोप सामाजिक व पर्यावरण बचाव कार्यकर्ते सूर्यकांत (बाळासो) पांचाळ यांनी केला आहे. उंच आणि अपारदर्शक पत्रे तसेच भिंतींच्या आडून नेमकी कोणती कामे सुरू आहेत, याची प्रशासनाने तातडीने तपासणी करावी, अशी मागणी पांचाळ यांनी जिल्हाधिकारी तसेच महाबळेश्वर नगरपरिषद प्रशासनाकडे केली आहे.
महाबळेश्वर परिसरातील पर्यावरणीय संवेदनशीलता लक्षात घेता मिळकती भोवती करण्यात येणाऱ्या कुंपणांबाबतच्या नियमांची तपासणी होणे गरजेचे आहे. काही ठिकाणी उंच पत्रे आणि भिंतींमुळे आतील भाग पूर्णपणे झाकला जात असल्याने संबंधित ठिकाणी सुरू असलेल्या बांधकामांची अथवा विकासकामांची माहिती सहजपणे उपलब्ध होत नसल्याचे पांचाळ यांनी निवेदनात म्हटले आहे.वृक्षतोड, उत्खनन अन् अनधिकृत बांधकामाची शक्यता?
उंच पत्रे व कंपाउंडच्या आडून रात्रीच्या वेळी वृक्षतोड करणे, जुन्या वृक्षांच्या मुळांना नुकसान पोहोचविणे, डोंगरउतार कापणे, मातीचे उत्खनन करणे, नैसर्गिक जलस्रोतांमध्ये बदल करणे किंवा परवानगीपेक्षा अधिक बांधकाम करण्यासारखे प्रकार होण्याची शक्यता नाकारता येत नाही, असा दावा पांचाळ यांनी केला आहे. त्यामुळे अशा सर्व मिळकतींची प्रत्यक्ष पाहणी करण्याबरोबरच संबंधित मिळकतींच्या बांधकाम परवानग्या, मंजूर नकाशे, बांधकामाची व्याप्ती आणि प्रत्यक्ष करण्यात आलेले बांधकाम यांची कागदोपत्री तपासणी करावी, अशी मागणी करण्यात आली आहे.
महाबळेश्वर नगरपरिषदेच्या बांधकाम विभागाने उंच पत्रे किंवा अवाजवी उंच कंपाउंड असलेल्या सर्व मिळकतींचे सर्वेक्षण करावे. संबंधित मिळकतींमध्ये सुरू असलेल्या विकासकामांची कायदेशीरता तपासावी. नियमांचे उल्लंघन आढळल्यास संबंधितांवर तातडीने कायदेशीर कारवाई करावी, अशी मागणी पांचाळ यांनी केली आहे.
तसेच नियमबाह्य आणि अपारदर्शक पत्र्यांची कुंपणे हटवून आवश्यकतेनुसार पारदर्शक जाळीचे कुंपण करण्याबाबत प्रशासनाने कार्यवाही करावी, असेही निवेदनात नमूद करण्यात आले आहे.
महाबळेश्वर नगरपरिषद प्रशासनाने या प्रकरणाकडे गांभीर्याने पाहून संबंधित मिळकत धारकांना नोटिसा बजावाव्यात. पर्यावरणीय अथवा बांधकामविषयक नियमांचे उल्लंघन आढळल्यास संबंधितांवर पर्यावरण संरक्षण कायदा तसेच महाराष्ट्र प्रादेशिक व नगररचना कायद्यानुसार (MRTP) कारवाई करावी, अशी मागणी पांचाळ यांनी केली आहे.
Ans: महाबळेश्वर नगरपरिषद हद्दीतील काही खासगी व व्यावसायिक मिळकतींभोवती १० ते १५ फुटांपर्यंत उंच पत्रे आणि भिंती उभारून त्याच्या आडून वृक्षतोड, डोंगर कापणे व अनधिकृत बांधकामे केली जात असल्याचा आरोप त्यांनी केला आहे.
Ans: पर्यावरण संरक्षण कायदा तसेच महाराष्ट्र प्रादेशिक व नगररचना कायद्यानुसार (MRTP) कठोर कायदेशीर कारवाई करण्याची मागणी करण्यात आली आहे.
.png "Videos"){kind=small}
