Pune News: मंगेशकर रुग्णालयाच्या बेफिकरीमुळे गर्भवतीचा मृत्यू; बावनकुळे म्हणाले, “… ही तर मुघलशाही”

दीनानाथ मंगेशकर रुग्णालयाच्या प्रशासनाच्या मुजोरपणामुळे एका गर्भवती महिलेचा मृत्यू झाल्याची माहिती समोर आली आहे. पुण्यातील दीनानाथ मंगेशकर रुग्णालयाच्या प्रशासनाने रुग्णाच्या उपचारासाठी १० लाख रुपयांची मागणी केली होती.

पुणे: शहरातील दीनानाथ मंगेशकर रुग्णालयाच्या प्रशासनाच्या मुजोरपणामुळे एका गर्भवती महिलेचा मृत्यू झाल्याची माहिती समोर आली आहे. पुण्यातील दीनानाथ मंगेशकर रुग्णालयाच्या प्रशासनाने रुग्णाच्या उपचारासाठी १० लाख रुपयांची मागणी केली होती. महिलेला प्रसूतीच्या कळा सुरू झाल्यानंतर रुग्णाकडे उपचारांसाठी दहा लाखांची मागणी केली होती. हातात असलेले अडीच लाख भरायला तयार असतानाही प्रशासन महिलेला दाखल करण्यास तयार नव्हते. दरम्यान आता यावर महसूल मंत्री चंद्रशेखर बावनकुळे यांनी प्रतिक्रिया दिली आहे.

मंगेशकर रूग्णालायतील प्रकरणावर महसूल मंत्री चंद्रशेखर बावनकुळे म्हणाले, “कालच्या प्रकरणानंतर आंदोलन करणे हा सर्वांचा अधिकार आहे. कालच जो प्रकार घडला त्यांनंतर सरकार रूग्णालयावर कारवाई करेल. मुजोरी करणे ही मुघलशाही आहे. मात्र या प्रकरणात नेमकी काय चूक झाली आहे ते सरकार तपासणार आहे.”

पुढे बोलताना मंत्री बावनकुळे म्हणाले, “सर्वसामान्य नागरिकांना उपचार मिळणे हा त्यांचा अधिकार आहे. या प्रकरणातील जबाबदार व्यक्तीला आम्ही सोडणार नाही. कोणालाही या प्रकरणात माफ केले जाणार नाही. त्यांच्यावर कडक कारवाई केली जाईल. माझे जिल्हाधिकाऱ्यांशी बोलणे झाले आहे. या प्रकरणात कोणालाही सोडणार नाही हे मी सांगतो. शंभर टक्के कारवाई होणारच, हे मी संजय राऊत यांना सांगतो.”

भाजप आमदाराच्या ‘पीए’लाच फटका, गर्भवतीचा मृत्यू

 

सुशांत भिसे हे भाजपचे विधान परिषदेचे आमदार अमित गोरखे यांचे स्वीय सहाय्यक म्हणून काम पाहतात. त्यांची पत्नी मोनाली या सात महिन्यांच्या गर्भवती होत्या.  दरम्यान अचानक रक्तस्त्राव होऊ लागल्याने त्या तत्काळ जवळ असलेल्या दिनानाथ मंगेशकर रुग्णालयात उपचारासाठी गेल्या होत्या. परंतु, त्यांना क्रिटीकल परिस्थिती असून, डिपॉझिट म्हणून १० लाख रुपये भरा असे सांगितले. तरच पुढील प्रक्रिया सुरू करू म्हणून उपचारासाठी दाखलकरून घेतले नाही. त्यांनी ३ लाख रुपये भरण्याची तयारी दाखवली. नंतर मुख्यमंत्री सहाय्यता कक्षातून रुग्णालय प्रशासनाला संपर्क देखील करण्यात आला.

मात्र, तरीही रुग्णालय प्रशासनाने याबाबत काहीही पावले उचलली नाही. सकाळी ९ वाजता आलेली महिला दुपारी दोनपर्यंत त्याच ठिकाणी होती, अशी माहिती नातेवाईकांनी दिली. नंतर महिला अतिरक्तस्त्राव होत असल्याने वाकड येथील एका रुग्णालयात दाखल झाली. त्याठिकाणी उपचार सुरू झाल्यानंतर महिलेला दोन जुळ्या मुली झाल्या. परंतु, मोनाली यांचा मृत्यू झाला.

दिनानाथ मंगेशकर रुग्णालयाची आडमुठी भूमिका; भाजप आमदाराच्या ‘पीए’लाच फटका, गर्भवतीचा मृत्यू

दरम्यान, गुरूवारी याबाबत आमदार अमित गोरखे यांनी माध्यमांशी संवाद साधत दिनानाथ मंगेशकर रुग्णालयाच्या या कारभाराबाबत गंभीर आरोप केले आहेत. त्यांनी अश्या अनेक तक्रारी माझ्याकडे आलेल्या असल्याचे सांगितले. त्यांनी हा गंभीर गुन्हा केला असून, त्याबाबत अधिवेशनात हा प्रश्न मांडणार असून, मुख्यमंत्र्यांना कडक कारवाईबाबत मागणी करणार असल्याचे म्हटले आहे. हे रुग्णालय ट्रस्ट म्हणून गरिबांसाठी आहे. परंतु, त्यांच्याकडून असे होत आहे.