मिळालेल्या माहितीनुसार, शहरातील वाहतूक नियंत्रण सुरळीत ठेवण्यासाठी काशिमीरा वाहतूक शाखा कार्यरत असून विविध चौकांमध्ये शंभरहून अधिक पोलीस कर्मचारी तैनात आहेत. हे कर्मचारी वाहतूक नियमांचे उल्लंघन करणाऱ्या वाहनचालकांवर कारवाई करून शासनाच्या महसुलात भर घालतात. मात्र, काही ठिकाणी नियमभंग करणाऱ्यांकडून रोख रक्कम घेऊन कारवाई टाळल्याच्या तक्रारी अधूनमधून समोर येत असतात.दरम्यान, एका महिला वाहतूक पोलीस कर्मचाऱ्याकडूनच वरिष्ठांकडून मासिक हप्त्याची मागणी होत असल्याचा गंभीर आरोप पुढे आला. संबंधित महिलेने यासंदर्भात पुरावे गोळा करून लाचलुचपत प्रतिबंधक विभागाकडे (ACB) लेखी तक्रार दाखल केली होती.
या तक्रारीची दखल घेत पोलीस आयुक्तालयाने सहायक पोलीस आयुक्त दयानंद सावंत यांची चौकशी अधिकारी म्हणून नियुक्ती केली. प्राथमिक चौकशीत वरिष्ठ पोलीस निरीक्षक सागर इंगोले यांनी पैशांची मागणी केल्याचे निष्पन्न झाल्यानंतर सावंत यांनी सविस्तर अहवाल सादर केला. त्यानुसार काशिमीरा पोलीस ठाण्यात संबंधित अधिकाऱ्यांविरोधात गुन्हा नोंदविण्यात आला असल्याची माहिती वरिष्ठ पोलीस निरीक्षक राजेंद्र कांबळे यांनी दिली.
कामकाजावर प्रश्नचिन्ह, ‘हप्ता’ पद्धतीचा आरोप
या प्रकरणामुळे वाहतूक पोलिसांच्या कामकाजावर गंभीर प्रश्न निर्माण झाले आहेत. संबंधित महिला कर्मचाऱ्याने आपल्या तक्रारीत इतर काही कर्मचारीही वरिष्ठांना दरमहा ठराविक रक्कम देत असल्याचा उल्लेख केला आहे. ही ‘हप्ता’ पद्धत नवीन नसून पूर्वीपासून सुरू असल्याचा दावा देखील तिने केला आहे. आपण ही रक्कम देण्यास नकार दिल्यामुळेच आपल्यावर दबाव टाकण्यात आला, असेही महिलेने नमूद केले आहे.या घटनेमुळे पोलीस दलातील अंतर्गत शिस्त, पारदर्शकता आणि भ्रष्टाचाराच्या मुद्द्यावर पुन्हा एकदा चर्चा रंगली असून पुढील चौकशीत आणखी धक्कादायक बाबी उघड होण्याची शक्यता व्यक्त केली जात आहे.
.png "Videos"){kind=small}
