मला माझा नवरा परत द्या; गायब पोलीस कर्मचारी निखिल रणदिवे यांच्या पत्नीची विनंती

मला माझा नवरा परत द्या, अशी ह्रदयाला चटका लावणारी विनंती बेपत्ता पोलीस कर्मचारी निखिल कैलास रणदिवे यांच्या पत्नी अक्षदा रणदिवे यांनी केली आहे.

• माझा नवरा मला परत द्या
• माझ्या दोन लहान मुलांकडे बघा
• निखिल रणदिवे यांच्या पत्नीची पोलिसांना विनंती

यवत : “माझे पती गेल्या तीन दिवसांपासून बेपत्ता आहेत. त्यांचा फोन बंद आहे. माझ्या दोन लहान मुलांकडे बघा… मला माझा नवरा परत द्या.” अशी ह्रदयाला चटका लावणारी विनंती बेपत्ता पोलीस कर्मचारी निखिल कैलास रणदिवे यांच्या पत्नी अक्षदा रणदिवे यांनी दौंडचे उपविभागीय पोलीस अधिकारी बापूराव दडस यांच्या समोर केली आहे. यवत पोलीस ठाण्यात कार्यरत असलेल्या निखिल रणदिवे यांनी मानसिक तणाव, सततची ड्युटी आणि वरिष्ठांकडून होत असलेल्या छळामुळे काही दिवसांपूर्वी सोशल मीडियावर भावनिक नोट पोस्ट केली होती. त्यानंतर ते बेपत्ता झाले. त्यांच्या फोनचे नेटवर्क गेल्या गुरुवारपासून बंद आहे. त्यांच्या जवळपास सुसाईड नोटही आढळल्यामुळे ही घटना अधिक गंभीर झाली आहे.

अक्षदा रणदिवे म्हणाल्या, “गेल्या वर्षभरापासून माझे पती निखिल प्रचंड मानसिक तणावात होते. सुट्टी मिळत नव्हती. ड्युटीवरून आले तरी लगेच दुसऱ्या ठिकाणी रवाना करण्याचे आदेश मिळत. मुलीचा पहिला वाढदिवस साजरा करण्याचा त्यांनी शब्द दिला होता, पण त्याच दिवशी बाहेरगावी ड्युटी लावण्यात आली.” त्यांनी पोलिस निरीक्षक नारायण देशमुख यांनी सतत त्रास दिल्याचा आरोप केला आहे.

तपासात विलंबाची चर्चा

तीन दिवस उलटूनही अद्याप तपासात कोणतीही ठोस प्रगती झालेली नाही. वरिष्ठ अधिकाऱ्यांकडून उडवाउडवीची उत्तरे मिळत असल्याचा आरोप रणदिवे यांच्या कुटुंबीयांनी व सहकाऱ्यांनी केला आहे. शनिवारी अक्षदा रणदिवे आपल्या दोन लहान मुलांसहित यवत पोलीस ठाण्यात आल्या. मात्र, त्या वेळी वरिष्ठ अधिकारी अनुपस्थित होते. फक्त “तपास सुरू आहे” एवढेच उत्तर उपविभागीय अधिकारी दडस यांनी दिले.

बदली असूनही यवतला रोखल्याचा आरोप

रणदिवे यांची काही महिन्यांपूर्वी बदली झाली होती. मात्र, अपूर्ण कामाचे कारण सांगून त्यांना यवत ठाण्यातच थांबवण्यात आले. इतर कर्मचाऱ्यांना मात्र तत्काळ रिलीव्हिंग देण्यात आले, असं सहकाऱ्यांकडून सांगण्यात आले आहे.

पोलिस दलात संतापाचा उद्रेक

या घटनेनंतर ग्रामीण पोलीस दलात असंतोष पसरला असून, मागासवर्गीय कर्मचारी यामध्ये जास्त अस्वस्थ असल्याचे चित्र आहे. वंचित बहुजन आघाडी आणि इतर मागासवर्गीय संघटनांनी आंदोलनाची चेतावणी दिली आहे. संघटनेचे कार्यकर्ते रोहित गजरमळे आणि प्रथमेश गायकवाड यांनी, “तपासात पक्षपात होत आहे. निखिल रणदिवे हे छळाचे बळी आहेत. न्याय न मिळाल्यास तीव्र आंदोलन केले जाईल,” असा इशारा दिला.