मैत्रिणीच्या माध्यमातून ओळख; कॅफेत नेऊन अत्याचार केल्याचा आरोप, धमकीनंतर गरोदरपणाची तपासणी करण्यासाठी दबाव
नागपूर : नंदनवन पोलीस ठाण्याच्या हद्दीत १७ वर्षीय अल्पवयीन मुलीवर लैंगिक अत्याचार केल्याची घटना समोर आली आहे. मैत्रिणीच्या माध्यमातून झालेल्या ओळखीचा गैरफायदा घेत २० वर्षीय तरुणाने मुलीला कॅफेमध्ये नेऊन अत्याचार केल्याचा आरोप आहे. यानंतर कुणाला काही सांगितल्यास गंभीर परिणाम भोगावे लागतील, अशी धमकीही त्याने दिल्याचे तक्रारीत नमूद आहे.
पोलीस सूत्रांनी दिलेल्या माहितीनुसार, सक्करदरा परिसरातील रहिवासी आरोपी समीर शेख (२०) याची पीडित मुलीशी तिच्या मैत्रिणीच्या माध्यमातून ओळख झाली होती. २९ जुलै २०२६ रोजी आरोपीने पीडितेला नंदनवन परिसरातील ‘एफ झोन’ कॅफेत नेले. तेथे तिच्यावर बळजबरीने अत्याचार केल्याचा आरोप आहे. घटनेनंतर आरोपीने तिला जीवे मारण्याची तसेच गंभीर परिणाम भोगण्याची धमकी दिल्याचे पोलिसांनी सांगितले.
धमकीमुळे घाबरलेली पीडिता काही काळ शांत राहिली. मात्र, ४ ऑक्टोबर रोजी आरोपीने तिच्या घरी जाऊन तिच्यावर प्रेग्नन्सी किटद्वारे तपासणी करण्यासाठी दबाव टाकल्याचा आरोप आहे. या प्रकारानंतर पीडितेने धाडस करून आपल्या वडिलांना संपूर्ण घटना सांगितली.
घटनेची माहिती मिळाल्यानंतर कुटुंबीयांनी सामाजिक संस्थेच्या मदतीने नंदनवन पोलीस ठाणे गाठले. पीडितेच्या तक्रारीवरून पोलिसांनी आरोपी समीर शेख याच्याविरोधात पोक्सो कायद्यासह इतर गंभीर कलमांन्वये गुन्हा दाखल केला आहे. प्रकरणाचा पुढील तपास नंदनवन पोलीस करत आहेत.
गुन्हा दाखल झाल्यानंतर आरोपी समीर शेख फरार असल्याचे पोलिसांनी सांगितले. त्याचा शोध घेण्यासाठी पोलिसांकडून तपास सुरू आहे. दरम्यान, ज्या ‘एफ झोन’ कॅफेमध्ये घटना घडल्याचा आरोप आहे, त्या कॅफेच्या चालकाचीही चौकशी करण्यात येत आहे. कॅफेमध्ये अल्पवयीन मुला-मुलींना अशा प्रकारे खासगी जागा उपलब्ध करून दिली जात होती का आणि या प्रकरणात कॅफे चालकाची काही भूमिका आहे का, याचाही तपास केला जात आहे.
.png "Videos"){kind=small}
