ड्रिंक अँड ड्राइव्हची कारवाई टाळण्यासाठी ५ हजारांची लाच मागितल्याचा आरोप; व्हिडिओ व्हायरल होताच ए एस आय निलंबित

ड्रिंक अँड ड्राइव्हची कारवाई टाळण्यासाठी वाहनचालकाकडे ५ हजार रुपयांची लाच मागितल्याचा आरोप नवी मुंबईत समोर आला आहे. सीबीडी बेलापूर वाहतूक शाखेतील एएसआय रमेश पवार यांच्याशी संबंधित कथित व्हिडिओ सोशल मीडियावर व्हायरल झाला. त्यानंतर वरिष्ठ अधिकाऱ्यांनी तातडीने दखल घेत त्यांना निलंबित केलं. नेमकं प्रकरण काय?

• ५ हजारांची लाच मागितल्याचा आरोप
• व्हायरल व्हिडिओची उपायुक्तांकडून दखल
• एएसआय रमेश पवार निलंबित

 

नवी मुंबई : ड्रिंक अँड ड्राइव्हची कारवाई टाळण्यासाठी वाहनचालकाकडे पाच हजार रुपयांची लाच मागितल्याचा आरोप सीबीडी बेलापूर वाहतूक शाखेतील सहाय्यक पोलीस उपनिरीक्षक (एएसआय) रमेश पवार यांच्यावर करण्यात आला आहे. या कथित प्रकाराचा व्हिडिओ समाजमाध्यमांवर व्हायरल झाल्यानंतर वाहतूक पोलीस उपायुक्त डॉ. राहुल खाडे यांनी या प्रकरणाची गंभीर दखल घेतली. प्राथमिक चौकशीनंतर रमेश पवार यांना निलंबित करण्यात आलं असून, पुढील तपासाचे आदेश देण्यात आले आहेत.

नेमकं प्रकरण काय?

मिळालेल्या माहितीनुसार, शनिवारी रात्री सीबीडी बेलापूर येथील सिडको कार्यालयाच्या प्रवेशद्वारासमोर वाहतूक पोलिसांकडून नाकाबंदी करण्यात आली होती. मद्यप्राशन करून वाहन चालवणाऱ्या चालकांविरोधात कारवाई करण्यासाठी ही मोहीम राबवली जात होती. यावेळी एक कारचालक मद्यप्राशन केलेल्या अवस्थेत आढळल्याचं सांगण्यात येत आहे. नियमानुसार संबंधित चालकावर मोटार वाहन कायद्यानुसार कारवाई होणं अपेक्षित होतं. मात्र, ही कारवाई टाळण्यासाठी एएसआय रमेश पवार यांनी चालकाकडे पाच हजार रुपयांची मागणी केल्याचा आरोप आहे. या कथित प्रकाराचा व्हिडिओ सोशल मीडियावर प्रसारित झाल्यानंतर प्रकरण चर्चेत आलं.

हेही वाचा: कुर्ल्यातील १३ मजली इमारतीला भीषण आग; ५ वर्षांच्या चिमुकल्यासह ९ जण जखमी, इलेक्ट्रिक डक्टमधील वायरिंगने घेतला पेट

व्हिडिओ व्हायरल होताच वरिष्ठांची कारवाई

या घटनेची दखल घेत वाहतूक पोलीस उपायुक्त डॉ. राहुल खाडे यांनी तातडीने चौकशीचे आदेश दिले. प्राथमिक चौकशीत गंभीर स्वरूपाची कसूर आढळल्याने रमेश पवार यांना पुढील आदेश मिळेपर्यंत निलंबित करण्यात आलं आहे. या प्रकरणाचा पुढील तपास खारघर वाहतूक विभागाचे वरिष्ठ पोलीस निरीक्षक मुजावर यांच्याकडे सोपवण्यात आला आहे. चौकशीतून या कथित प्रकाराबाबत अधिक माहिती समोर येण्याची शक्यता आहे.

गैरप्रकारांबाबत वाहतूक विभागाची कठोर भूमिका

या कारवाईबाबत बोलताना डॉ. राहुल खाडे यांनी सांगितलं की, संबंधित कर्मचाऱ्याबाबतची माहिती समोर आल्यानंतर तातडीने निलंबनाची कारवाई करण्यात आली. भविष्यात अशा घटना घडू नयेत आणि पोलीस दलाच्या प्रतिमेला धक्का लागू नये, हा या कारवाईमागील उद्देश असल्याचं त्यांनी स्पष्ट केलं. दरम्यान, नागरिकांच्या सुरक्षिततेसाठी आणि वाहतुकीचे नियम लागू करण्यासाठी जबाबदार असलेल्या कर्मचाऱ्याविरोधात लाच मागितल्याचा आरोप झाल्याने या प्रकरणाची चर्चा सुरू आहे. पुढील चौकशीत नेमकी काय माहिती समोर येते, याकडे लक्ष लागलं आहे.