चाकूने भोसकून एकाची हत्या; सात वर्षांनी कोर्टाने आरोपीला सुनावली ‘ही’ शिक्षा

रोपी रोहिदास सावंत याने दारूच्या नशेत त्या ठिकाणी येऊन भातात आमटी का वाढत नाही, असे म्हणून भांड्यातील आमटी ओतली. त्यावेळी तेथीलच महेश पवार यांनी त्यास अटकाव केला असता, त्याच्याशी रोहिदास सावंतने बाचाबाची केली.

कराड : किरकोळ कारणावरून एकाचा चाकूने भोसकून खून करण्यात आल्याचा धक्कादायक प्रकार समोर आला आहे. याप्रकरणानंतर पोलिसांनी तातडीने आरोपीला अटक केली असून, त्याला न्यायालयात हजर करण्यात आले. कराड न्यायालयाचे पहिले अतिरिक्त जिल्हा व सत्र न्यायाधीश यु. एल. जोशी यांनी एकास जन्मठेप व दंडाची शिक्षा सुनावली आहे. तर खोटी साक्ष दिल्याप्रकरणी एका महिला डॉक्टरलाही नोटीस बजावण्यात आली आहे.

रोहिदास बाळकृष्ण सावंत (रा. चिंचणी, ता. कराड) असे शिक्षा सुनावण्यात आलेल्या आरोपीचे नाव आहे. याबाबतची माहिती अशी की, 24 जुलै 2018 रोजी चिंचणी (ता. कराड) येथील वरदायिनी देवीच्या मंदिरात गावकऱ्यांनी भंडारा आयोजित केला होता. या भंडाऱ्यात भात-आमटीचे नियोजन करण्यात आले होते. त्यावेळी आरोपी रोहिदास सावंत याने दारूच्या नशेत त्या ठिकाणी येऊन भातात आमटी का वाढत नाही, असे म्हणून भांड्यातील आमटी ओतली. त्यावेळी तेथीलच महेश पवार यांनी त्यास अटकाव केला असता, त्याच्याशी रोहिदास सावंतने बाचाबाची केली.

हेदेखील वाचा : Delhi crime: पत्नीने चेहऱ्यावर टाकले उकळते तेल, नंतर जखमांवर टाकली मिरची पूड आणि…; पहाटे घडलं धक्कादायक प्रकरण!

यानंतर गावकऱ्यांनी मध्यस्थी करून सावंतला घरी पाठवले. मात्र, तासाभरानंतर रोहिदास सावंत हा चाकू घेऊन त्या ठिकाणी आला आणि महेश पवार यास शिवीगाळ करू लागला. त्यावेळी तिथे उपस्थित असलेल्या तेथीलच अमोल अशोक पवार (वय ३४) हा रोहिदास सावंतला समजावून सांगत असताना सावंतने ‘तुला आणि तुझ्या भावाला जिवंत ठेवत नाही’, असे म्हणून अमोल पवारवर चाकूने वार केले. त्यावेळी महेश पवारमध्ये आला असता, तोही चाकूच्या वाराने जखमी झाला.

यानंतर गंभीर जखमी झालेल्या अमोल पवारला कृष्णा हॉस्पिटल येथे उपचारासाठी हलवण्यात आले. मात्र, 27 जुलै 2018 रोजी अमोल पवारचा उपचारादरम्यान मृत्यू झाला. या घटनेची नोंद उंब्रज पोलीस ठाण्यात करण्यात आली होती.

कराड न्यायालयात चालला खटला

खटल्याचे कामकाज कराड न्यायालयाचे पहिले अतिरिक्त जिल्हा व सत्र न्यायाधीश यु.एल. जोशी यांच्यासमोर चालले. सरकार पक्षातर्फे अतिरिक्त सरकारी अभियोक्ता पुष्पा जितेंद्र जाधव यांनी काम पाहिले त्यांनी या खटल्यात 21 साक्षीदार तपासले आणि जोरदार युक्तिवाद केला. त्याचवेळी काही खटल्यांचे प्रमाण देखील न्यायालयासमोर मांडले. न्या. जोशी यांनी प्रत्यक्षदर्शी साक्षीदार पंच तपासी अंमलदार आणि वैद्यकीय अधिकारी यांच्या साक्षी ग्राह्य मानून आरोपी रोहिदास बाळकृष्ण सावंत खून प्रकरणी जन्मठेप व दहा हजार रुपये दंड, तसेच दंड न भरल्यास तीन महिने साधी कैद अशी शिक्षा ठोठावली.