दसऱ्याच्या दिवशी हृदयद्रावक घटना; लिफ्टमध्ये अडकून 12 वर्षाच्या मुलाचा मृत्यू
पिंपरी चिंचवड : पुणे जिल्ह्यातून एक मोठी बातमी समोर आली आहे. दसऱ्याच्या सणाच्या गडबडीत चोवीसवाडी परिसरातील राम स्मृती सोसायटीत बुधवारी (दि.२ ऑक्टोबर) संध्याकाळी लिफ्टमध्ये अडकून १२ वर्षीय मुलाचा मृत्यू झाल्याची हृदयद्रावक घटना घडली आहे. या घटनेने परिसरात शोककळा पसरली असून, लिफ्टच्या सुरक्षिततेवर गंभीर प्रश्नचिन्ह निर्माण झाले आहे.
सायंकाळच्या सुमारास राम स्मृती सोसायटीच्या इमारतीतील लिफ्ट तिसऱ्या व चौथ्या मजल्यादरम्यान अचानक बिघाड होऊन थांबली. त्याच वेळी लिफ्टमध्ये एकटाच असलेला १२ वर्षीय मुलगा दरवाज्यात अडकला. दरवाजा अचानक उघडल्याने तो फसला व गंभीर जखमी झाला. याची माहिती मिळताच पिंपरी चिंचवड महापालिकेच्या अग्निशमन दलाला तातडीने पाचारण करण्यात आले. जवानांनी घटनास्थळी पोहोचून युद्धपातळीवर बचावकार्य सुरू केले. अथक प्रयत्नांनंतर मुलाला लिफ्टमधून बाहेर काढण्यात आले.
रुग्णालयात पोहोचण्यापूर्वीच मृत्यू
लिफ्टमध्ये अडकल्यामुळे मुलाला गंभीर दुखापत झाली होती. त्याला तातडीने जवळच्या खासगी रुग्णालयात नेण्यात आले. मात्र, रुग्णालयात दाखल करण्यापूर्वीच त्याचा मृत्यू झाला. अचानक आलेल्या या घटनेने कुटुंबावर दुःखाचा डोंगर कोसळला आहे.
परिसरात हळहळ
दसऱ्याच्या आनंदावर या दुर्दैवी घटनेने पाणी फेरले असून, संपूर्ण चोवीसवाडी परिसरात हळहळ व्यक्त होत आहे. शेजारी व सोसायटीतील रहिवाशांनी ही घटना टाळता आली असती का, असा सवाल उपस्थित केला आहे.
हे सुद्धा वाचा : पावसानं अतोनात नुकसान! शेतकऱ्यांसाठी प्रकाश आंबेडकरांची मोठी मागणी
सुरक्षिततेवर प्रश्नचिन्ह
या दुर्घटनेनंतर सोसायटीतील लिफ्टच्या देखभाल व सुरक्षेबाबत गंभीर प्रश्न उपस्थित झाले आहेत. लिफ्टमध्ये नेमका काय बिघाड झाला? नियमित देखभाल केली जात होती का? सुरक्षेचे निकष पाळले गेले होते का? असे सवाल उपस्थित केले जात आहेत. या संदर्भात पोलिस व संबंधित यंत्रणा तपास करत आहेत. दरम्यान, रहिवाशांनी अशा घटनांची पुनरावृत्ती टाळण्यासाठी काटेकोर उपाययोजना करण्याची मागणी केली आहे.
.png "Videos"){kind=small}
