मुंबई-पुणे मिसिंग लिंकवर भीषण अपघात, फॉर्च्युनरचा चुराडा; एकाचा मृत्यू
वडगाव मावळ/सतिश गाडे : मुंबई-पुणे द्रुतगती महामार्गावरील लोणावळा हद्दीतील मिसिंग लिंक बोगद्यात शुक्रवारी (दि. 7) पहाटे झालेल्या भीषण अपघाताने एकच खळबळ उडाली आहे. भरधाव वेगाने धावणाऱ्या फॉर्च्युनर कारने समोरून जात असलेल्या आयशर टेम्पोला पाठीमागून इतक्या जोरात धडक दिली की कारचा अक्षरशः चुराडा झाला. या भीषण अपघातात एका व्यक्तीचा मृत्यू झाला असून, चौघेजण गंभीर जखमी झाले आहेत.
या प्रकरणी आयशर टेम्पो चालक कुलदीप बाबुराव पवार यांनी लोणावळा शहर पोलीस ठाण्यात फिर्याद दाखल केली आहे. अपघातात तुषार वामन भूमकर (वय 38, रा. भूमकर चौक, वाकड, पुणे) यांचा जागीच मृत्यू झाला. तर अमित भाटे, प्रदीप भुसारे, पंकज पाटील आणि प्रसाद विनोदे हे गंभीर जखमी झाले असून त्यांच्यावर रुग्णालयात उपचार सुरू आहेत.
लोणावळा शहर पोलीस ठाण्याचे पोलीस निरीक्षक सचिन पाटील यांनी दिलेल्या माहितीनुसार, MH-14 MG-0007 क्रमांकाची फॉर्च्युनर कार पुण्याहून मुंबईच्या दिशेने भरधाव वेगाने जात होती. पहाटे सुमारे 4 वाजण्याच्या सुमारास मिसिंग लिंक बोगद्यात पुढे जाणाऱ्या MH-01 CR-7075 क्रमांकाच्या आयशर टेम्पोला कारने पाठीमागून जोरदार धडक दिली. धडकेचा आवाज बोगद्यात घुमला आणि काही क्षणांतच घटनास्थळी भीषण परिस्थिती निर्माण झाली. अपघाताची माहिती मिळताच लोणावळा शहर पोलीस, महामार्ग पोलीस तसेच आपत्कालीन यंत्रणा घटनास्थळी दाखल झाली. पोलीस निरीक्षक सचिन पाटील, पोलीस उपनिरीक्षक चमन शेख, महामार्ग पोलीस उपनिरीक्षक शिखरे, पोलीस अंमलदार अंकुश पवार, तेलंग व सहकाऱ्यांनी तत्काळ बचावकार्य सुरू करून जखमींना वाहनातून बाहेर काढले. त्यानंतर त्यांना तातडीने सोमाटणे येथील पवना हॉस्पिटलमध्ये उपचारासाठी दाखल करण्यात आले.
हे सुद्धा वाचा : माफिया डॉन अतीक अहमदचा धाकटा मुलगा ठार, कसं उद्ध्वस्त झालं संपूर्ण कुटुंब?
या भीषण धडकेमुळे काही काळ वाहतुकीवर परिणाम झाला. पोलिसांनी घटनास्थळी पंचनामा करून वाहतूक सुरळीत केली. अपघाताचे नेमके कारण शोधण्यासाठी फॉर्च्युनर कारचा वेग, चालकाचे नियंत्रण आणि इतर तांत्रिक बाबींचा तपास सुरू असून लोणावळा शहर पोलीस पुढील तपास करत आहेत.
.png "Videos"){kind=small}
