काळाचा घाला! भरधाव बसची ज्येष्ठ दाम्पत्याला धडक; ज्येष्ठाचा मृत्यू

पुणे-सोलापूर महामार्गावरील शेवाळवाडी परिसरात भरधाव बसने पादचारी ज्येष्ठ दाम्पत्याला दिलेल्या धडकेत ज्येष्ठाचा मृत्यू झाला आहे. याप्रकरणी हडपसर पोलिसांनी बस चालकावर गुन्हा दाखल केला आहे.

पुणे : पुण्यातून अपघाताची एक मोठी बातमी समोर आली आहे. पुणे-सोलापूर महामार्गावरील शेवाळवाडी परिसरात भरधाव बसने पादचारी ज्येष्ठ दाम्पत्याला दिलेल्या धडकेत ज्येष्ठाचा मृत्यू झाला आहे. याप्रकरणी हडपसर पोलिसांनी बस चालकावर गुन्हा दाखल केला आहे. जयंत भामरे (वय ६३, रा. ग्रीनवुड्स, मांजरी, हडपसर) असे मृत्यू झालेल्या ज्येष्ठ नागरिकाचे नाव आहे. अपघातात भामरे यांची पत्नी वैशाली गंभीर जखमी झाल्या असून, त्यांच्यावर खासगी रुग्णालयात उपचार सुरू असल्याची माहिती पोलिसांनी दिली. याबाबत भामरे यांची मुलगी प्रियांका (वय २८) यांनी हडपसर पोलीस ठाण्यात तक्रार दिली आहे. त्यानूसार, बस चालक संजय उज्जैनराव दिंडे (वय ४६, रा. संतकृपा सोसायटी, चिखली) याच्यावर गुन्हा दाखल करण्यात आला आहे.

पोलिसांच्या माहितीनुसार, भामरे दाम्पत्य शनिवारी सायंकाळी पावणेसातच्या सुमारास पुणे-सोलापूर रस्त्यावरुन निघाले होते. शेवाळवाडी भाजी मंडईजवळ रस्ता ओलांडणाऱ्या भामरे दाम्पत्याला भरधाव बसने धडक दिली. अपघातात जयंत आणि त्यांची पत्नी वैशाली जखमी झाल्या. या घटनेची माहिती मिळताच पोलिसांनी घटनास्थळी धाव घेतली. दोघांना ताताडीने खासगी रुग्णालयात दाखल करण्यात आले. उपचारांपूर्वीच जयंत यांचा मृत्यू झाला होता. पोलीस उपनिरीक्षक अशोक गांधले अधिक तपास करत आहेत.

हे सुद्धा वाचा : केअर टेकरकने मनोरुग्ण महिलेवर केला अत्याचार; पुण्यातील संतापजनक प्रकार

दीर- भावजयचा मृत्यू

पुण्यातील जेल रोडवरील एका रुग्णालयासमोर गेल्या काही दिवसाखाली भरधाव कारने दिलेल्या धडकेत दीर भावजयीचा मृत्यू झाल्याची घटना घडली आहे. लोहगाव परिसरातील जेल रस्त्यावरील संजय पार्क येथे हा अपघात गुरूवारी सकाळी झाला. याप्रकरणी चालकावर गुन्हा दाखल करण्यात आला आहे. आशीर्वाद गोवेकर (वय ५२), रेश्मा गोवेकर (वय ४७) असे अपघातात मृत्युमुखी पडलेल्या दाम्पत्याचे नाव आहे. याप्रकरणी कारचालक अचलकुमार (वय ४३) याच्यावर गुन्हा दाखल करण्यात आला. याबाबत प्रसाद गोवेकर (वय ५४, रा. शिव पार्वती मंगल कार्यालयाजवळ, गोकुळनगर, कात्रज-कोंढवा रस्ता) यांनी विमानतळ पोलीस ठाण्यात तक्रार दिली आहे.

महिला पोलिसाला कारने उडवले

राज्यात अपघाताचे प्रमाण मोठ्या प्रमाणात वाढले आहे. दरम्यान गेल्या काही दिवसाखाली ड्रंक अँड ड्राईव्हच्या कारवाईनिमित्त नाकाबंदी करून कारवाई करत असताना एका भरधाव आलिशान कारने कर्तव्य बजावणाऱ्या वाहतूक विभागातील महिला कर्मचाऱ्याला उडविल्याची धक्कादायक घटना घडली. यात महिला कर्मचारी गंभीररित्या जखमी झाल्या असून, त्यांच्यावर खासगी रुग्णालयात उपचार सुरू आहेत. दरम्यान, आलिशान कारमध्ये चौघेजन असल्याचे माहिती समोर आली. महिला अंमलदार दीपमाला राजू नायर (वय ३५) असे गंभीर जखमी झालेल्या महिला कर्मचाऱ्याचे नाव आहे. याप्रकरणी बंडगार्डन पोलीस ठाण्यात अज्ञात चालकाविरोधात गुन्हा दाखल करण्यात आला आहे.