गुरुवार, 24 सप्टेंबर 2026
सौजन्य फोटो - सोशल मिडीया
नवी मुंबई : बेलापूर येथील पारसिक हिल परिसरात गुरुवारी दुपारी भीषण अपघात झाला. डोंगरावरून एक कार थेट खाली असलेल्या रेल्वे रुळावर कोसळली. या दुर्घटनेत कारमधील तरुण गंभीर जखमी झाला असून त्याला तातडीने रुग्णालयात दाखल करण्यात आले आहे. दुपारी तीन ते साडेतीनच्या सुमारास ही घटना घडली. मिळालेल्या माहितीनुसार, पारसिक हिलवरून कार थेट पनवेल-उरण दरम्यानच्या रेल्वे मार्गावर पडली. कार प्रचंड उंचीवरून रुळावर कोसळल्याने तिचे मोठे नुकसान झाले. अपघाताच्या वेळी या रुळावरून कोणतीही लोकल जात नसल्याने मोठा अनर्थ टळला. या मार्गावर नियमित लोकल वाहतूक सुरू असल्याने संभाव्य दुर्घटनेची तीव्रता अधिक असण्याची शक्यता होती.
कार रेल्वे रुळावर पडल्याने पनवेल-उरण मार्गावरील अप आणि डाऊन दोन्ही मार्गांवरील रेल्वे वाहतूक तात्पुरती ठप्प करण्यात आली आहे. कारमुळे रेल्वे ट्रॅक तसेच ओव्हरहेड इलेक्ट्रिक वायरिंगचे (OHE) नुकसान झाले आहे का, याची रेल्वे प्रशासनाकडून तपासणी सुरू आहे. खबरदारीचा उपाय म्हणून या मार्गावरील गाड्या थांबवण्यात आल्या असून रेल्वे वाहतुकीवर परिणाम झाला आहे. ओव्हरहेड वायर, विद्युत खांब किंवा अन्य रेल्वे यंत्रणेला नुकसान झाल्याचे आढळल्यास दुरुस्तीचे काम करावे लागणार आहे. त्यामुळे रेल्वे वाहतूक पूर्ववत होण्यास वेळ लागू शकतो.
अपघाताची माहिती मिळताच रेल्वे प्रशासन, स्थानिक पोलिस तसेच आपत्कालीन यंत्रणांनी घटनास्थळी धाव घेतली. रुळावर पडलेली कार हटवून रेल्वे मार्ग मोकळा करण्याचे काम सुरू करण्यात आले आहे. तसेच ट्रॅक आणि विद्युत यंत्रणेची पाहणी केली जात आहे.दरम्यान, कारमधील तरुणाला बाहेर काढून उपचारासाठी रुग्णालयात दाखल करण्यात आले आहे. त्याची प्रकृती गंभीर असल्याचे सांगण्यात आले. अपघात नेमका कोणत्या कारणामुळे झाला, तसेच कारमध्ये अन्य कोणी होते का, याबाबत रेल्वे आणि पोलिसांकडून माहिती घेतली जात आहे.
