एपीएमसी पोलीस ठाण्याच्या बाप्पाचे पोलीस आयुक्तांकडून दर्शन; जनजागृती देखाव्याचे कौतुक
या प्रसंगी पोलीस उपआयुक्त विजय खरात आणि वाशी विभागाचे सहाय्यक पोलीस आयुक्त आदिनाथ बुधवंत यांची प्रमुख उपस्थिती होती. वरिष्ठ अधिकाऱ्यांनी गणरायाचे दर्शन घेतल्यानंतर एपीएमसी पोलीस ठाण्याच्या वतीने साकारण्यात आलेल्या विशेष सामाजिक जनजागृतीपर देखाव्याची पाहणी केली.
एपीएमसी पोलीस ठाण्याचे वरिष्ठ पोलीस निरीक्षक आबासाहेब पाटील यांच्या मार्गदर्शनाखाली हा सुंदर व प्रबोधनात्मक देखावा साकारण्यात आला आहे. वाढते सायबर गुन्हे, नागरिकांनी ऑनलाईन व्यवहार करताना घ्यावयाची खबरदारी, अमली पदार्थांचे होणारे प्राणघातक दुष्परिणाम आणि सुरक्षित समाजाची निर्मिती या अत्यंत संवेदनशील विषयांवर या देखाव्यातून प्रभावी संदेश देण्यात आला आहे. धार्मिक उत्सवाच्या व्यासपीठाचा वापर करून समाजात सजगता निर्माण करण्याचा पोलिसांचा हा उपक्रम अत्यंत स्तुत्य असल्याचे सांगत पोलीस आयुक्त मिलिंद भारंबे यांनी या उपक्रमाचे मनापासून कौतुक केले.
नवी मुंबईत आजवर अनेक पोलीस आयुक्त आले, परंतु मिलिंद भारंबे यांच्या कार्यकाळात अमली पदार्थांविरोधी मोहीम आणि सायबर गुन्हेगारीविरोधातील जनजागृतीला एक नवी दिशा मिळाली आहे. त्यांनी राबवलेल्या आक्रमक व प्रभावी मोहिमांमुळे नवी मुंबईतील गुन्हेगारीवर मोठा अंकुश बसला असून अनेक मोहिमा यशस्वीपणे पार पडल्या आहेत. म्हणूनच त्यांच्या नेतृत्वाखाली नवी मुंबई पोलीस दल सामाजिक जनजागृतीच्या कार्यातही अग्रस्थानी दिसून येत आहे. गणेशोत्सवाच्या काळात नागरिकांमध्ये सायबर फसवणूक व व्यसनाधीनतेच्या धोक्यांबाबत सजगता निर्माण व्हावी, यासाठी एपीएमसी पोलीस ठाण्याने घेतलेला हा पुढाकार नागरिकांसाठी अत्यंत महत्त्वपूर्ण ठरत आहे. या कार्यक्रमास एपीएमसी पोलीस ठाण्याचे अधिकारी, कर्मचारी आणि स्थानिक गणेश मंडळाचे पदाधिकारी मोठ्या संख्येने उपस्थित होते.
.png "Videos"){kind=small}
