लातूरमध्ये अघोरी पूजेचा कट पोलिसांकडून उद्ध्वस्त; अल्पवयीन मुलीला विवस्त्र करून लोकांसमोर...
लातूर : गेल्या काही दिवसांपासून गुन्हेगारीच्या घटनांमध्ये वाढ होताना दिसत आहे. त्यातच लातूर जिल्ह्यात अंधश्रद्धा आणि कथित काळ्या जादूशी संबंधित एक खळबळजनक प्रकरण उघडकीस आले आहे. पैशांचा वर्षाव होईल, या अंधश्रद्धेच्या आशेने एका १५ वर्षीय अल्पवयीन मुलीला विवस्त्र करून तिच्याकडून अघोरी पूजा करवण्याचा कट रचण्यात आल्याचा आरोप आहे. मात्र, ही घटना घडण्यापूर्वीच पोलिस घटनास्थळी पोहोचले आणि त्यांनी हा कट उघडकीस आणून अल्पवयीन मुलीची सुटका केली.
उदगीर ग्रामीण पोलिस ठाण्याच्या हद्दीतील लातूर-उदगीर रस्त्यावरील करदाखेल पाटीजवळ ही घटना घडली. पोलिसांच्या माहितीनुसार, लक्ष्मी पूजेच्या नावाखाली कथित अघोरी पूजा करण्याची तयारी सुरू होती. या पूजेमध्ये एका अघोरीसह सुमारे १५ जण सहभागी होणार होते, असे सांगण्यात येत आहे. असा आरोप आहे की, पैशांचा पाऊस पडेल, या अंधश्रद्धेखाली, विधीसाठी आलेल्या लोकांसमोर एका १५ वर्षीय मुलीला विवस्त्र अवस्थेत झोपवून तिच्यासोबत अघोरी विधी करण्याचा कट रचण्यात आला होता. त्या अल्पवयीन मुलीला रात्रीच्या वेळी तिथे आणण्याची तयारी सुरू होती.
संभाव्य नेटवर्कचा तपास सुरू
या घटनेची माहिती मिळताच, उदगीर ग्रामीण पोलिस तत्काळ घटनास्थळी पोहोचले आणि कथित विधीची तयारी थांबवली. पोलिसांनी या घटनेत सहभागी असलेल्यांच्या भूमिकेचा तपास सुरू केला आहे. महाराष्ट्र नरबळी आणि इतर अमानवीय, दुष्ट, अघोरी प्रथा व जादूटोणा प्रतिबंधक कायदा, तसेच पॉक्सो कायद्याच्या संबंधित कलमांनुसार गुन्हा दाखल करण्यात आला आहे.
चक्क न्यायाधीशांच्या खुर्चीवर केली काळी जादू
कर्नाटकातून एक धक्कादायक प्रकार उघडकीस आला आहे. न्यायालयातील प्रकरणाचा निकाल आपल्या बाजूने लागावा यासाठी न्यायाधीशांच्या खुर्चीवरच काळी जादू केल्याचा प्रकार समोर आला आहे. यासाठी न्यायाधीशांच्या खुर्चीवर कथितपणे मंत्रोच्चार केलेले पांढऱ्या मोहरीचे दाणे शिंपडल्याचा धक्कादायक प्रकार उघडकीस आला. या प्रकरणी 65 वर्षीय मंजुला नावाच्या महिलेला पोलिसांनी अटक केली असून तिला 14 दिवसांची न्यायालयीन कोठडी सुनावण्यात आली आहे.
.png "Videos"){kind=small}
