आयपीएल क्रिकेट मॅचवर सट्टा लावणाऱ्या दोघांना अटक; गुन्हे शाखेची मोठी कारवाई

सध्या इंडियन प्रीमियर लीग (आयपीएल) क्रिकेटचा १८ वा सिझन सुरू आहे. या टी ट्वेंटी आयपीएल क्रिकेट मॅचच्या माध्यमातून झटपट श्रीमंतीसाठी सट्टा लावण्याचे प्रकार सुरू झाले आहेत.

कराड : सध्या इंडियन प्रीमियर लीग (आयपीएल) क्रिकेटचा १८ वा सिझन सुरू आहे. या टी ट्वेंटी आयपीएल क्रिकेट मॅचच्या माध्यमातून झटपट श्रीमंतीसाठी सट्टा लावण्याचे प्रकार सुरू झाले आहेत. कराड शहर पोलीस ठाण्याच्या गुन्हे शाखेने सोमवारी ‘आयपीएल’चा सट्टा लावणाऱ्या दोघांना अटक केली आहे. या कारवाईत आरोपींकडून सदर गुन्ह्यातील महत्वाची माहिती पोलिसांच्या हाती लागली असून या प्रकरणातील साखळीच्या शोधासाठी पोलिस पथक मुंबईला रवाना झाले असून त्यांनी मुंबईत ठिकठिकाणी छापासत्र सुरू केले आहे.

संदीप संपत बडेकर व प्रथमेश बाळासो कटरे (दोघे रा. कराड) अशी आयपीएल सट्टाप्रकरणी पोलिसांनी अटक केलेल्यांची नावे आहेत. कराडमध्ये गत काही वर्षांपासून ‘आयपीएल’वर सट्टा लावला जात आहे. वेळोवेळी पोलिसांनी या सट्टेबाजांवर कारवाई केली आहे. मात्र, तरीही दरवर्षी ‘आयपीएल’ सुरू होताच शहरात सट्टा लावण्याचे प्रकार घडत आहेत. अशातच गत काही दिवसांपासून शहरात काहीजण ‘आयपीएल’वर सट्टा लावत असल्याची माहिती पोलिसांना मिळाली होती. त्यानुसार पोलिस सट्टेबाजांचा शोध घेत होते.

रविवारी याबाबतची खात्रीशीर माहिती मिळाल्यानंतर सोमवारी पोलिसांनी दोन ठिकाणी छापे टाकून दोघांना ताब्यात घेतले. त्यांच्याकडून मुद्देमालही हस्तगत करण्यात आला आहे. सट्टेबाजारातील साखळीचा शोध घेण्याचे काम सध्या पोलिसांकडून सुरू आहे. कोणाच्या वरदहस्ताखाली सट्टेबाजार चालविला जातो, याचीही माहिती पोलिस घेत आहेत.

महत्वाचे धागेदोरे पोलिसांच्या हाती

अटक केलेल्या आरोपींकडे पोलिसांकडून गोपनीयरीत्या तपास केला जात आहे. त्यांच्याकडून महत्वाचे धागेदोरे पोलिसांच्या हाती लागले आहेत. त्यामुळे तपासासाठी पोलीस पथक मुंबईला रवाना झाले असून, त्याठिकाणी छापासत्र सुरू आहे. या गुन्ह्यात आणखी काही जणांचा सहभाग निष्पन्न झाला आहे. त्यामुळे गुन्ह्यातील आरोपींची संख्या वाढण्याची शक्यता पोलिसांकडून वर्तविण्यात येत आहे.