पुण्यातील लॉजवर सुरू होता भलताच प्रकार; पोलिसांनी छापा टाकला आणि सगळं उघड झालं
पुणे : पुण्यातील वेश्या व्यवसाय बहुचर्चित आणि सातत्याने वादातित राहिलेला असून, पुन्हा एकदा एका प्रकरणाने ती आठवण झाली आहे. कल्याणीनगर येथील निवासी भागात सुरू असलेल्या वेश्या व्यवसायावर येरवडा पोलिसांनी छापा कारवाई केली अन् वेश्या व्यवसायाचा पर्दाफाश केला आहे. कारवाईनंतर पोलीस अंमलदाराच्या तक्रारीवरून लॉजच्या मालकासह तिघांनी संगनमताने वेश्या व्यवसाय चालविल्याचे म्हटले. मात्र, असे असताना गुन्हा केवळ दोघांवर दाखल केला. यात मालक महिलेला आरोपी न केल्याने पोलीस दलात उलट-सुलट चर्चा सुरू असून, पोलिसांनी गुन्हा दाखल करताना हात आखडता का घेतला, असा चर्चा सुरू झाली आहे.
येरवडा पोलीस ठाण्याच्या हद्दीत कल्याणीनगर येथे स्प्रिंग ब्रुक्स लॉजमध्ये वेश्या व्यवसाय सुरू होता. माहितीनुसार येरवडा पोलिसांनी येथे कारवाई केली. पोलीस निरीक्षक विजय ठाकर यांच्या सुचनेननुसार पथकाने छापा टाकला. लॉज व्यवस्थापक अमोल तांबडे (वय २८, रा. श्रीरामपूर, अहिल्यानगर) आणि एजंट बंटी या दोघांना अटक केली. याप्रकरणी आरोपींवर भारतीय न्याय संहिता २०२३ सह, अनैतिक व्यापार प्रतिबंध अधिनियम १९५६ च्या विविध कलमांनुसार गुन्हा दाखल केला. लॉजच्या खोली क्रमांक १०२ मध्ये एक २६ वर्षीय पीडित तरुणी आढळून आली. तिला आरोपींनी जबरदस्तीने वेश्या व्यवसायास ठेवले असे म्हंटले आहे. दरम्यान, पोलिसांनी छाप्यादरम्यान गुन्ह्याशी संबंधित काही पुरावे जप्त केले. लॉजमध्ये असलेल्या नोंद वहीत संशयास्पद नोंदी आढळून आल्या.
पंचांसमक्ष पडताळणी
पोलिसांना संबंधित लॉजवर छापा टाकण्यापूर्वी दोन पंचांना पाचारण केले होते. तसेच, बनावट ग्राहकाकडे सात हजार रुपये रोख दिले होते. पोलिसांनी छापा टाकला तेव्हा बनावट ग्राहकाकडील सात हजार रुपये आरोपींकडे सापडले. त्या नोटांचे नंबरही जुळले आहेत, असे तक्रारीत नमूद आहे. तसेच, लॉजमधून अन्य पुरावे पंचासमक्ष गोळा करण्यात आले आहेत. मात्र, यात महिलेला आरोपी केले गेले नाही.
याप्रकरणात संबंधित महिलेच्या सहभागाविषयी चौकशी सुरू आहे. चौकशीत तिचा गुन्ह्यात सहभाग असल्याचे सिद्ध झाल्यास तिच्यावर गुन्हा दाखल करता येईल. – हिमंत जाधव (पोलीस उपायुक्त, परिमंडळ चार)
.png "Videos"){kind=small}
