Pune Crime News: ३ वर्षांपासून फरार आरोपी गुन्हे शाखेच्या जाळ्यात!; मॉडर्न कॉलेज परिसरातून अभिषेक काळेला ठोकल्या बेड्या

Pune Crime: पोलीस हवालदार बाबा दांगडे आणि संतोष अनुसे यांना बातमीदाराकडून माहिती मिळाली की, फरार आरोपी अभिषेक काळे हा पांढऱ्या रंगाचा चौकटी लायनिंगचा शर्ट व काळ्या रंगाची जिन्स पँट घालून मॉडर्न कॉलेज परिसरात फिरत आहे.

• विश्रामबाग पोलीस ठाण्याकडील ३ वर्षांपासून फरार आरोपी अभिषेक संजय काळे याला अटक
• १६ जुलै २०२३ रोजी दांडेकर पुलाजवळ कोयत्याने मारहाण करून आरोपी झाला होता फरार
• IPC १४३, १४८, ३२४ व आर्म्स ॲक्ट अन्वये विश्रामबाग पोलिसांत दाखल होता गुन्हा

म विश्रामबाग पोलीस ठाण्याच्या हद्दीतील एका गंभीर गुन्ह्यात मागील तीन वर्षांपासून फरार असलेल्या पाहिजे आरोपीला पुणे शहर गुन्हे शाखा युनिट-१ च्या पथकाने बेड्या ठोकल्या आहेत. अभिषेक संजय काळे (वय २७ वर्षे, रा. सर्वे नं. १३४, दांडेकर पूल, लोकमान्य नगर समोर, पुणे) असे पकडलेल्या आरोपीचे नाव आहे.

नेमकी घटना काय?

तीन वर्षांपूर्वी १६ जुलै २०२३ रोजी रात्री १०:३० वाजण्याच्या सुमारास दांडेकर पुलाजवळील मांगिरबाबा चौक येथील खराडे वडापाव सेंटर समोरील सार्वजनिक रस्त्यावर मयुर शिवाजी पिलाने, अनिल दिनकर शिंदे, सौरभ संजय काळे व इतर दोन इसम एकत्र जमले होते. त्यांनी एकमेकांना शिवीगाळ, आरडाओरडा करून कोयत्याने मारहाण केली तसेच बेकायदेशीर जमाव जमवून सार्वजनिक शांततेचा भंग केला होता.

Karad News : सह्याद्री कारखाना सर्व आव्हानांना सामोरे जाण्यास सज्ज; बाळासाहेब पाटील यांचा विश्वास

या प्रकरणी विश्रामबाग पोलीस ठाण्यात गुन्हा रजि. नं. १५९/2०२३, भारतीय दंड संहिता कायदा कलम १४३, १४७, १४८, १४९, ३२४, ३२३, ५०४, भारतीय हत्यार कायदा कलम ४ (२५) व महाराष्ट्र पोलीस अधिनियम १३५ अन्वये गुन्हा दाखल करण्यात आला होता. या गुन्ह्यातील आरोपी अभिषेक काळे हा घटनेपासून मागील तीन वर्षांपासून फरार होता.

पोलिसांची कारवाई आणि सापळा

गुन्हे शाखा युनिट-१ चे अधिकारी व अंमलदार पुणे शहरात गस्तीवर असताना, पोलीस हवालदार बाबा दांगडे व संतोष अनुसे यांना गुप्त बातमीदारामार्फत माहिती मिळाली की, पाहिजे आरोपी अभिषेक काळे हा सध्या मॉडर्न कॉलेज परिसरात आला असून त्याने पांढऱ्या रंगाचा चौकटी लायनिंगचा फुल बाह्यांचा शर्ट व काळ्या रंगाची जिन्स पँट घातली आहे.

ही माहिती मिळताच वरिष्ठ पोलीस निरीक्षक दीपक लगड यांनी खात्री करून योग्य ती कायदेशीर कारवाई करण्याचे आदेश दिले. वरिष्ठांच्या मार्गदर्शनाखाली गुन्हे शाखा युनिट-१ च्या पथकाने नमूद ठिकाणी सापळा रचून ९ ऑक्टोबर २०२६ रोजी सायंकाळी ५:३० वाजता आरोपीला ताब्यात घेतले.

Students Exam Fee: दुष्काळग्रस्त विद्यार्थ्यांना दिलासा! परीक्षा शुल्क घेतल्यास थेट महाविद्यालयावर कारवाई होणार

पुढील कायदेशीर कारवाई

गुन्हे शाखा युनिट-१ कार्यालयात आणून चौकशी केली असता, सुरुवातीला आरोपीने उडवाउडवीची व असमाधानकारक उत्तरे दिली. परंतु, अधिक चौकशी केली असता सदर गुन्ह्यात त्याचा सहभाग असल्याचे निष्पन्न झाले. त्यानंतर पुढील कायदेशीर कारवाईसाठी त्यास समर्थ पोलीस स्टेशनच्या ताब्यात देण्यात आले आहे.

ही धडाकेबाज कामगिरी पोलीस आयुक्त अमितेश कुमार, सहपोलीस आयुक्त संजय दराडे, अपर पोलीस आयुक्त तेजस्वीनी सातपुते, पोलीस उपायुक्त गौहर हसन आणि सहायक पोलीस आयुक्त शैलेश संखे यांच्या मार्गदर्शनाखाली वरिष्ठ पोलीस निरीक्षक दीपक लगड, सहायक पोलीस निरीक्षक धिरज राऊत, तसेच पोलीस अंमलदार बाबा दांगडे, संतोष अनुसे, प्रमोद जगताप, भुजबळ, अशिष खरात, उमेश शेलार, संतोष नागरे आणि अतुल साळवे यांच्या पथकाने पार पाडली आहे.