‘आमचा बंद तर सगळ्यांचा बंद’; अलका चौकात पोलिसांसमोरच डीजेचा दणदणाट, पुण्याच्या विसर्जन मिरवणुकीत आवाजाचा भडका

पोलिसांनी डीजे बंद करण्यास सांगितले, मात्र मंडळाच्या पदाधिकाऱ्याने थेट माईकवरूनच पोलिसांना उलट सवाल केला. ‘आमचा बंद तर सगळ्यांचा बंद’ म्हणत अलका चौकातच डीजे पुन्हा सुरू करण्यात आला. दरम्यान, लक्ष्मी रस्त्यावरील ध्वनी पातळीने यंदा पुन्हा १०० डेसिबलचा टप्पा ओलांडल्याचे पाहणीत समोर आले.

• ‘आमचा बंद तर सगळ्यांचा बंद’; अलका चौकात पोलिसांसमोर डीजे सुरू
• लक्ष्मी रस्त्यावर सरासरी १०४.५ डेसिबल ध्वनी पातळी
• २०२५च्या ९२.६ dBच्या तुलनेत यंदा ११.९ dBने वाढ

पुणे: गणेश विसर्जन मिरवणुकीतील डीजेचा दणदणाट आणि ध्वनी प्रदूषणाचा मुद्दा यंदाही ऐरणीवर आला आहे. अलका चौकात डीजे बंद करण्याच्या पोलिसांच्या सूचनेला एका गणेश मंडळाच्या पदाधिकाऱ्याने माईकवरूनच विरोध केल्याचा प्रकार समोर आला आहे. ‘आमचा बंद तर सगळ्यांचा बंद’ असे म्हणत संबंधित मंडळाने डीजे सुरू ठेवल्याचा व्हिडीओ सोशल मीडियावर व्हायरल झाला आहे. पुण्यातील लक्ष्मी रस्ता, कुमठेकर रस्ता, टिळक रस्ता आणि केळकर रस्त्यावरून सार्वजनिक गणेश मंडळांच्या विसर्जन मिरवणुका अलका टॉकीज चौकाकडे येत होत्या. अलका चौकात पोलिसांनी डीजे वाजवण्यास निर्बंध घातले होते. मात्र, एका मंडळाची मिरवणूक चौकात पोहोचल्यानंतर मोठ्या स्पीकर्सचा आवाज सुरूच राहिला. व्हिडीओमध्ये पोलिसांकडून स्पीकर बंद करण्यास सांगितल्यानंतर मंडळाचा पदाधिकारी माईकवरून पोलिसांशी बोलताना दिसत आहे. ‘आमचा बंद तर सगळ्यांचा बंद’ असे म्हणत त्याने इतर मंडळांचेही स्पीकर बंद करण्याची मागणी केली. त्यानंतर डीजे पुन्हा सुरू करण्यात आल्याचे व्हिडीओत दिसते. या प्रकारामुळे पोलिसांच्या आदेशाची अंमलबजावणी आणि विसर्जन मिरवणुकीतील ध्वनी नियंत्रणाचा मुद्दा पुन्हा चर्चेत आला आहे.

हेही वाचा: Crime News: आईला फोन करून म्हणाली, ‘माझ्यासोबत मारहाण झाली’; काही वेळातच होमस्टेमध्ये विद्यार्थिनीला पाहताच…

लक्ष्मी रस्त्यावर १०४.५ डेसिबल

दरम्यान, सीओईपी तंत्रज्ञान विद्यापीठाच्या पर्यावरण विभागाने केलेल्या पाहणीत लक्ष्मी रस्त्यावरील विसर्जन मिरवणुकीदरम्यान ध्वनी पातळी मोठ्या प्रमाणात असल्याचे समोर आले आहे. दिलेल्या आकडेवारीनुसार, लक्ष्मी रस्त्यावरील प्रमुख चौकांची एकूण सरासरी ध्वनी पातळी १०४.५ डेसिबल नोंदविण्यात आली.  होळकर चौकात १०६.८, शेडगे विठोबा चौकात १०६.३, टिळक चौकात १०५.५, गोखले चौकात १०४.४ आणि खंडोजीबाबा चौकात १०४.२ डेसिबलची सरासरी नोंद झाली. उंबऱ्या चौकात १०४.१, बेलबाग चौकात १०४, लिंबराज महाराज चौकात १०३.५, गणपती चौकात १०३.३ आणि कुंटे चौकात १०२.८ डेसिबल ध्वनी पातळी नोंदली गेली.

पाच वर्षांत पुन्हा वाढ

पाहणीतील आकडेवारीनुसार लक्ष्मी रस्त्यावरील सरासरी ध्वनी पातळीत २०२२ ते २०२५ या काळात घट झाली होती. २०२२मध्ये १०५.२, २०२३मध्ये १०१.२, २०२४मध्ये ९४.८ आणि २०२५मध्ये ९२.६ डेसिबलची सरासरी नोंद झाली. मात्र, २०२६मध्ये ही सरासरी पुन्हा वाढून १०४.५ डेसिबल झाली आहे. तसेच शुक्रवारी दुपारी चार ते मध्यरात्रीपर्यंतच्या कालावधीतही ध्वनीची तीव्रता मोठी होती. दुपारी चार वाजता सरासरी ११३.४, रात्री आठ वाजता १११.९ आणि मध्यरात्री बारा वाजता ११२.६ डेसिबलची नोंद झाल्याचे आकडेवारीत नमूद आहे. त्यामुळे एका बाजूला पोलिसांकडून डीजेवर निर्बंध घालण्याचे प्रयत्न सुरू असताना दुसऱ्या बाजूला काही मंडळांकडून नियमांना विरोध आणि मोठ्या आवाजात ध्वनिवर्धक सुरू ठेवण्याचे प्रकार समोर आल्याने विसर्जन मिरवणुकीतील ध्वनी प्रदूषणाचा प्रश्न पुन्हा चर्चेत आला आहे.