
देशी बनावटीचे पिस्तूल बाळगणाऱ्याला ठोकल्या बेड्या; पुणे पोलीसांची मोठी कारवाई
पुणे : राज्यात गुन्हेगारीचे प्रमाण वाढले आहे. राज्यातील वेगवेगळ्या भागातून गुन्हेगारीच्या घटना उघडकीस येत असतात. अशातचं आता पुणे जिल्ह्यातून एक मोठी बातमी समोर आली आहे. बेकायदा देशी बनावटीचे पिस्तूल बाळगणाऱ्या एका सराइताला गुन्हे शाखेने सापळा रचून अटक केली आहे. गुलटेकडी येथे ही कारवाई करण्यात आली असून, त्याच्याकडून देशी बनावटीचे पिस्तूल आणि काडतूस जप्त केले. ओंकार बाळू मावस (वय २१, रा. डायस प्लॉट, गुलटेकडी) असे अटक करण्यात आलेल्याचे नाव आहे.
पोलीस निरीक्षक प्रताप मानकर, सहायक निरीक्षक आशिष कवठेकर, अमोल रसाळ, उज्वल मोकाशी, शंकर कुंभार, संजय जाधव, साधना ताम्हाणे यांनी ही कारवाई केली आहे. गुन्हे शाखेच्या युनिट दोनचे पथक कोंढवा भागात गस्त घालत होते. मावस हा डायस प्लॉट परिसरात थांबला होता. त्याच्याकडे देशी बनावटीचे पिस्तूल आणि काडतूस असल्याची माहिती पोलीस कर्मचारी उज्वल मोकाशी आणि शंकर कुंभार यांना मिळाली. पोलिसांच्या पथकाने सापाळा लावून त्याला पकडले. त्याची झडती घेण्यात आली. त्याच्याकडून देशी बनावटीचे पिस्तूल आणि काडतूस जप्त करण्यात आले.
पिस्तूल घेऊन फिरणाऱ्या एकाला पकडले
महाराष्ट्र संघटित गुन्हेगारी नियंत्रण कायद्यान्वये (मोक्का) कारवाई केल्यानंतर काही महिन्यातच कारागृहातून जामीन मिळवत बाहेर पडल्यानंतर पिस्तूल घेऊन फिरणाऱ्या एकाला गेल्या काही दिवसाखाली गुन्हे शाखेच्या पथकाने सापळा रचून पकडले आहे. त्याच्याकडून एक पिस्तूल व जीवंत काडतूस जप्त केले असून, ही कारवाई लोणी काळभोर परिसरात करण्यात आली आहे. अनिकेत गुलाब यादव (वय २२, रा. सोपाननगर, कदमवाक वस्ती, लोणी काळभोर) असे अटक करण्यात आलेल्याचे नाव आहे. ही कारवाई पोलीस उपायुक्त निखील पिंगळे यांच्या मार्गदर्शनाखाली रमेश मेमाणे, कानिफनाथ कारखेले, ऋषीकेश ताकवणे यांनी ही कारवाई केली. यादव याच्यावर लोणी काळभोर पोलीस ठाण्यात गुन्हा दाखल होता. या गुन्ह्यात पोलिसांनी महाराष्ट्र संघटित गुन्हेगारी नियंत्रण कायद्यान्वये (मोक्का) कारवाई केली होती. त्यानंतर यादव येरवडा कारागृहात होता. न्यायालयाकडून त्याने जामीन मिळविला. नुकताच तो कारागृहातून बाहेर पडला. दरम्यान, यादव याच्याकडे देशी बनावटीचे पिस्तूल असल्याची माहिती गुन्हे शाखेच्या युनिट सहाचे पोलीस कर्मचारी बाळासाहेब सकटे यांना मिळाली. त्यानंतर पोलिसांच्या पथकाने सापळा लावून त्याला पकडले. त्याची झडती घेतली. तेव्हा त्याच्याकडून देशी बनावटीचे एक पिस्तूल आणि काडतूस जप्त करण्यात आले.